นิคมนํ
สตฺตปฺปกรณนามโต , อภิธมฺมมเทสยิ;
เทวาติเทโว เทวานํ, เทวโลกมฺหิ ตํ ปุเรฯ
ตสฺสายํ มาติกา สพฺพา, สกลสฺสาปิ อุทฺธรา;
จิรฏฺฐิตตฺถํ ธมฺมสฺส, ตํ ปคฺคณฺหนฺตุ สาธโวฯ
ทฺวาวีสติ ติกา เจว, ตเถว เหตุโคจฺฉกํ;
จูฬนฺตรทุกา สตฺต, โคจฺฉกา จ ตโต ปรํฯ
มหนฺตรทุกา จาปิ, ตโต จุทฺทส นิทฺทิเส;
โคจฺฉกานิ ทุเว ปิฏฺฐิ-ทุกานิฏฺฐารเสทิสาฯ
ทฺวาจตฺตาลีส สุตฺตนฺต-ทุกา เตวนฺติ ปญฺจธา;
สตฺตปฺปกรณิกา ภินฺนา, ธมฺมสงฺคณิมาติกาฯ
อภิธมฺมมาติกาปาฬิ นิฏฺฐิตาฯ
ฯ นโม ตสฺส ภควโต อรหโต สมฺมาสมฺพุทฺธสฺสฯ
โมหวิจฺเฉทนี
คนฺถารมฺภกถา
[1] การุญฺญภาวิตํ ยสฺส, ญาณจกฺขุ มโหทยํฯ
อนฺธภูตสฺส โลกสฺส, ชาตํ สามญฺญโลจนํฯ
[2] ตํ พุทฺธํ สุคตํ ธีรํ, สสทฺธมฺมํ สสาวกํฯ
วนฺทิตฺวานุสฺสริตฺวา จ, โถเมตฺวา จ วินายกํฯ
[3] เถเร จ ถิรสีลาทิ-คุณาลงฺการโสภิเตฯ
สาสนุชฺโชตเก ธีเร, ปุพฺพเก วํสปาลเกฯ
[4] วิสุทฺธิเทวเทโว ยํ, เทวานํ ติทสาลเยฯ
ปญฺญาย เทสยี ตสฺส, อภิธมฺมสฺส มาติกาฯ
[5] ยา ตสฺสา วิปุลตฺถาย, ธมฺมสงฺคณิอาทิหิฯ
อเนเกหิ ปกาเรหิ, ปาฬิอฏฺฐกถาหิ จฯ
[6] อตฺโถ วินิจฺฉโย เจว,
วิภตฺโต สาครูปโม;
อนนฺตนยโวกิณฺโณ,
ทุกฺโขคาโห ยโต ตโตฯ
[7] สมาเสนาภิธมฺมตฺถํ, มาติกามุขโตขิลํฯ
ญาตุกาเมหิ สุทฺเธหิ, อนฺเตวาสีหิ ยาจิโตฯ