เมนู

3. ธาตุกถามาติกา

นยมาติกา

สงฺคโห อสงฺคโห (ธาตุ. 1)ฯ สงฺคหิเตน อสงฺคหิตํฯ อสงฺคหิเตน สงฺคหิตํฯ สงฺคหิเตน สงฺคหิตํฯ อสงฺคหิเตน อสงฺคหิตํฯ สมฺปโยโค วิปฺปโยโคฯ สมฺปยุตฺเตน วิปฺปยุตฺตํฯ วิปฺปยุตฺเตน สมฺปยุตฺตํฯ สมฺปยุตฺเตน สมฺปยุตฺตํฯ วิปฺปยุตฺเตน วิปฺปยุตฺตํฯ สงฺคหิเตน สมฺปยุตฺตํ วิปฺปยุตฺตํฯ สมฺปยุตฺเตน สงฺคหิตํ อสงฺคหิตํฯ อสงฺคหิเตน สมฺปยุตฺตํ วิปฺปยุตฺตํฯ วิปฺปยุตฺเตน สงฺคหิตํ อสงฺคหิตํฯ

อพฺภนฺตรมาติกา

ปญฺจกฺขนฺธาฯ ทฺวาทสายตนานิฯ อฏฺฐารส ธาตุโยฯ จตฺตาริ สจฺจานิฯ พาวีสตินฺทฺริยานิฯ ปฏิจฺจสมุปฺปาโทฯ จตฺตาโร สติปฏฺฐานาฯ จตฺตาโร สมฺมปฺปธานาฯ จตฺตาโร อิทฺธิปาทา ฯ จตฺตาริ ฌานานิฯ จตสฺโส อปฺปมญฺญาโยฯ ปญฺจินฺทฺริยานิฯ ปญฺจ พลานิฯ สตฺต โพชฺฌงฺคาฯ อริโย อฏฺฐงฺคิโก มคฺโคฯ ผสฺโส เวทนา สญฺญา เจตนา จิตฺตํ อธิโมกฺโข มนสิกาโรฯ

นยมุขมาติกา

ตีหิ สงฺคโหฯ ตีหิ อสงฺคโหฯ จตูหิ สมฺปโยโคฯ จตูหิ วิปฺปโยโคฯ

ลกฺขณมาติกา

สภาโคฯ วิสภาโคฯ

พาหิรมาติกา

สพฺพาปิ ธมฺมสงฺคณี ธาตุกถาย มาติกาติฯ

ธาตุกถามาติกา นิฏฺฐิตาฯ

4. ปุคฺคลปญฺญตฺติมาติกา

ฉ ปญฺญตฺติโย (ปุ. ป. มาติกา 1) – ขนฺธปญฺญตฺติ อายตนปญฺญตฺติ ธาตุปญฺญตฺติ สจฺจปญฺญตฺติ อินฺทฺริยปญฺญตฺติ ปุคฺคลปญฺญตฺตีติฯ

ปุคฺคลปญฺญตฺติมาติกา นิฏฺฐิตาฯ

5. กถาวตฺถุมาติกา

ปุคฺคลกถา

สุทฺธสจฺจิกฏฺฐอนุโลมปจฺจนีกํ

ปุคฺคโล อุปลพฺภติ สจฺจิกฏฺฐปรมตฺเถนาติ (กถา. 1), อามนฺตาฯ โย สจฺจิกฏฺโฐ ปรมตฺโถ, ตโต โส ปุคฺคโล อุปลพฺภติ สจฺจิกฏฺฐปรมตฺเถนาติ? น เหวํ วตฺตพฺเพฯ

อาชานาหิ นิคฺคหํ – หญฺจิ ปุคฺคโล อุปลพฺภติ สจฺจิกฏฺฐปรมตฺเถน, เตน วต เร วตฺตพฺเพ ‘‘โย สจฺจิกฏฺโฐ ปรมตฺโถ, ตโต โส ปุคฺคโล อุปลพฺภติ สจฺจิกฏฺฐปรมตฺเถนา’’ติฯ ยํ ตตฺถ วเทสิ ‘‘วตฺตพฺเพ โข ‘ปุคฺคโล อุปลพฺภติ สจฺจิกฏฺฐปรมตฺเถน’, โน จ วตฺตพฺเพ ‘โย สจฺจิกฏฺโฐ ปรมตฺโถ, ตโต โส ปุคฺคโล อุปลพฺภติ สจฺจิกฏฺฐปรมตฺเถนา’’’ติ, มิจฺฉาฯ

โน เจ ปน วตฺตพฺเพ ‘‘โย สจฺจิกฏฺโฐ ปรมตฺโถ, ตโต โส ปุคฺคโล อุปลพฺภติ สจฺจิกฏฺฐปรมตฺเถนา’’ติ, โน จ วต เร วตฺตพฺเพ ‘‘ปุคฺคโล อุปลพฺภติ สจฺจิกฏฺฐปรมตฺเถนา’’ติฯ ยํ ตตฺถ วเทสิ ‘‘วตฺตพฺเพ โข ‘ปุคฺคโล อุปลพฺภติ สจฺจิกฏฺฐปรมตฺเถน’, โน จ วตฺตพฺเพ ‘โย สจฺจิกฏฺโฐ ปรมตฺโถ, ตโต โส ปุคฺคโล อุปลพฺภติ สจฺจิกฏฺฐปรมตฺเถนา’’’ติ, มิจฺฉาฯ

อนุโลมปญฺจกํฯ

ปุคฺคโล นุปลพฺภติ สจฺจิกฏฺฐปรมตฺเถนาติ? อามนฺตาฯ โย สจฺจิกฏฺโฐ ปรมตฺโถ, ตโต โส ปุคฺคโล นุปลพฺภติ สจฺจิกฏฺฐปรมตฺเถนาติ? น เหวํ วตฺตพฺเพฯ