[1376] เยน เยน ปฐมมคฺคาทิญาเณน โย โย สํโยชนาทิโก ปหาตพฺโพ ธมฺโม ฆาตํ วินาสํ ยาติ, โส โส ธมฺโม เตน เตน อเสเสน ญาเณน เอวํ สาธุ มยา สนฺทสฺสิโตฯ

[1383] ปริญฺญาภิสมเยนาติ ปริจฺฉินฺทิตฺวา ชานเนนฯ ทุกฺขํ อภิสเมตีติ ทุกฺขํ ปฏิวิชฺฌติฯ

[1394] โย โยคี อิมํ วิทิตฺวา หิตภาวนํ วนํ วเนตพฺพํ วิทิตฺวา ชานิตฺวา เว เอกนฺเตน สุขสํหิตํ หิตํ อุเปติ, จิตฺตสฺส ตมํ อนุตฺตมํ หีนํ วิธูย วินาเสตฺวา อวิคฺคหกมฺปทํ ปทํ อวิคฺคหกํ สรีรรหิตํ ปทํ ปฏิปชฺชิตพฺพํ ญาตพฺพํ ปทํ นิพฺพานํ อุเปติ ปาปุณาติ จฯ

อิติ อภิธมฺมาวตารฏีกาย

กิเลสปหานนิทฺเทสวณฺณนา นิฏฺฐิตาฯ

เตวีสติโม ปริจฺเฉโทฯ

24. จตุวีสติโม ปริจฺเฉโท

ปจฺจยนิทฺเทสวณฺณนา

[1395] รูปํ รูปสฺสาติ รูปํ รูปสฺสฯ อรูปสฺส นามสฺสฯ

[1396] มิสฺสกสฺสาติ นามรูปมิสฺสกสฺสาติ อตฺโถฯ

[1397] ติปญฺจ จาติ ปนฺนรส จฯ

[1399] เอโกติ กมฺมปจฺจโยฯ ทฺเวกาลิโกติ อตีตปจฺจุปฺปนฺนกาลวเสน ทฺวีสุ กาเลสุ นิยุตฺโตฯ ทสฺสิโตติ ภควตา เทสิโตฯ

อิติ อภิธมฺมาวตารฏีกาย

ปจฺจยนิทฺเทสวณฺณนา นิฏฺฐิตาฯ

จตุวีสติโม ปริจฺเฉโทฯ

นิคมนกถาวณฺณนา

[1401] สุมติมติวิจารโพธโนติ สุมตีนํ สุนฺทรปญฺญานํ กวีนํ มติยา วิจารสฺส โพธโนฯ วิมติวิโมหวินาสโนติ วิมตีนํ พาลานํ วิโมหสฺส วินาสโนฯ กุมติมติมหาตโมนาโสติ กุมตีนํ พาลานํ มหาตมสนฺนิภาย มติยา นาสโกฯ ปฏุมติภาสกโรติ ปฏูนํ ปณฺฑิตานํ ติกฺขปญฺญาย โอภาสกโรฯ

[1402] สุมตินามโก ภิกฺขุ อสมานโต อสทิสาย ปูชาย มม อายาจิโต ยโต ยสฺมา การณา, ตโต ตสฺมา การณา อยํ อภิธมฺมาวตาโรฯ ปทาโต ปทาติ โกฏฺฐาสโต โกฏฺฐาสโตฯ หิตวิภาวนา ภาวนาติ หิตปฺปกาสนาย ภาวนาย มยา รจิโตฯ อถ วา อหํ สุมตินา ภิกฺขุนา อสมานโต มานโต อายาจิโต ยโต ยสฺมา, ตโต ตสฺมาฯ

[1405] ติวิธา พฺยปฺปถานญฺหิ คติโยติ พฺยปฺปถานํ วจนานํ อตฺถคนฺถยุตฺติวเสน ติวิธา คติโยฯ

[1406] นิกายนฺตรลทฺธีหีติ อญฺญสฺมิํ นิกาเย ลทฺธีหิฯ วาจนามคฺคนิสฺสิโตติ วจนปฺปพนฺธนิสฺสิโตฯ