[3] วิตกฺโก วิจาโร อธิโมกฺโข วีริยํ ปีติ ฉนฺโท จาติ ฉ อิเม เจตสิกา ปกิณฺณกา นามฯ
[4] เอวเมเต เตรส เจตสิกา อญฺญสมานาติ เวทิตพฺพาฯ
อกุสลเจตสิกํ
[5] โมโห อหิริกํ อโนตฺตปฺปํ อุทฺธจฺจํ โลโภ ทิฏฺฐิ มาโน โทโส อิสฺสา มจฺฉริยํ กุกฺกุจฺจํ ถินํ มิทฺธํ วิจิกิจฺฉา เจติ จุทฺทสิเม เจตสิกา อกุสลา นามฯ
โสภนเจตสิกํ
[6] สทฺธา สติ หิรี โอตฺตปฺปํ อโลโภ อโทโส ตตฺรมชฺฌตฺตตา กายปสฺสทฺธิ จิตฺตปสฺสทฺธิ กายลหุตา จิตฺตลหุตา กายมุทุตา จิตฺตมุทุตา กายกมฺมญฺญตา จิตฺตกมฺมญฺญตา กายปาคุญฺญตา จิตฺตปาคุญฺญตา กายุชุกตา จิตฺตุชุกตา เจติ เอกูนวีสติเม เจตสิกา โสภนสาธารณา นามฯ
[7] สมฺมาวาจา สมฺมากมฺมนฺโต สมฺมาอาชีโว เจติ ติสฺโส วิรติโย นามฯ
[8] กรุณา มุทิตา อปฺปมญฺญาโย นามาติ สพฺพถาปิ ปญฺญินฺทฺริเยน สทฺธิํ ปญฺจวีสติเม เจตสิกา โสภนาติ เวทิตพฺพาฯ
[9] เอตฺตาวตา จ –
เตรสญฺญสมานา จ, จุทฺทสากุสลา ตถา;
โสภนา ปญฺจวีสาติ, ทฺวิปญฺญาส ปวุจฺจเรฯ
สมฺปโยคนโย
[10] เตสํ จิตฺตาวิยุตฺตานํ, ยถาโยคมิโต ปรํฯ
จิตฺตุปฺปาเทสุ ปจฺเจกํ, สมฺปโยโค ปวุจฺจติฯ
[11] สตฺต สพฺพตฺถ ยุชฺชนฺติ, ยถาโยคํ ปกิณฺณกาฯ
จุทฺทสากุสเลสฺเวว, โสภเนสฺเวว โสภนาฯ
อญฺญสมานเจตสิกสมฺปโยคนโย
[12] กถํ? สพฺพจิตฺตสาธารณา ตาว สตฺติเม เจตสิกา สพฺเพสุปิ เอกูนนวุติจิตฺตุปฺปาเทสุ ลพฺภนฺติฯ
[13] ปกิณฺณเกสุ ปน วิตกฺโก ตาว ทฺวิปญฺจวิญฺญาณวชฺชิตกามาวจรจิตฺเตสุ เจว เอกาทสสุ ปฐมชฺฌานจิตฺเตสุ เจติ ปญฺจปญฺญาสจิตฺเตสุ อุปฺปชฺชติฯ
[14] วิจาโร ปน เตสุ เจว เอกาทสสุ ทุติยชฺฌานจิตฺเตสุ จาติ ฉสฏฺฐิจิตฺเตสุฯ
[15] อธิโมกฺโข ทฺวิปญฺจวิญฺญาณวิจิกิจฺฉาสหคตวชฺชิตจิตฺเตสุฯ
[16] วีริยํ ปญฺจทฺวาราวชฺชนทฺวิปญฺจวิญฺญาณสมฺปฏิจฺฉนสนฺตีรณวชฺชิตจิตฺเตสุฯ
[17] ปีติ โทมนสฺสุเปกฺขาสหคตกายวิญฺญาณจตุตฺถชฺฌานวชฺชิตจิตฺเตสุฯ
[18] ฉนฺโท อเหตุกโมมูหวชฺชิตจิตฺเตสูติฯ
[19] เต ปน จิตฺตุปฺปาทา ยถากฺกมํ –
ฉสฏฺฐิ ปญฺจปญฺญาส, เอกาทส จ โสฬส;
สตฺตติ วีสติ เจว, ปกิณฺณกวิวชฺชิตาฯ