[50] ปญฺจุปาทานกฺขนฺธาติ , ตถา เตภูมกา มตาฯ
เภทาภาเวน นิพฺพานํ, ขนฺธสงฺคหนิสฺสฏํฯ
[51] ทฺวารารมฺมณเภเทน, ภวนฺตายตนานิ จฯ
ทฺวาราลมฺพตทุปฺปนฺน-ปริยาเยน ธาตุโยฯ
[52] ทุกฺขํ เตภูมกํ วฏฺฏํ, ตณฺหา สมุทโย ภเวฯ
นิโรโธ นาม นิพฺพานํ, มคฺโค โลกุตฺตโร มโตฯ
[53] มคฺคยุตฺตา ผลา เจว, จตุสจฺจวินิสฺสฏาฯ
อิติ ปญฺจปฺปเภเทน, ปวุตฺโต สพฺพสงฺคโหฯ
อิติ อภิธมฺมตฺถสงฺคเห สมุจฺจยสงฺคหวิภาโค นาม
สตฺตโม ปริจฺเฉโทฯ
8. ปจฺจยปริจฺเฉโท
[1] เยสํ สงฺขตธมฺมานํ, เย ธมฺมา ปจฺจยา ยถาฯ
ตํ วิภาคมิเหทานิ, ปวกฺขามิ ยถารหํฯ
[2] ปฏิจฺจสมุปฺปาทนโย ปฏฺฐานนโย เจติ ปจฺจยสงฺคโห ทุวิโธ เวทิตพฺโพฯ
[3] ตตฺถ ตพฺภาวภาวีภาวาการมตฺโตปลกฺขิโต ปฏิจฺจสมุปฺปาทนโย, ปฏฺฐานนโย ปน อาหจฺจปจฺจยฏฺฐิติมารพฺภ ปวุจฺจติ, อุภยํ ปน โวมิสฺเสตฺวา ปปญฺเจนฺติ อาจริยาฯ
ปฏิจฺจสมุปฺปาทนโย
[4] ตตฺถ อวิชฺชาปจฺจยา สงฺขารา, สงฺขารปจฺจยา วิญฺญาณํ, วิญฺญาณปจฺจยา นามรูปํ, นามรูปปจฺจยา สฬายตนํ, สฬายตนปจฺจยา ผสฺโส, ผสฺสปจฺจยา เวทนา, เวทนาปจฺจยา ตณฺหา, ตณฺหาปจฺจยา อุปาทานํ, อุปาทานปจฺจยา ภโว , ภวปจฺจยา ชาติ, ชาติปจฺจยา ชรามรณํ โสกปริเทวทุกฺขโทมนสฺสุปายาสา สมฺภวนฺติฯ เอวเมตสฺส เกวลสฺส ทุกฺขกฺขนฺธสฺส สมุทโย โหตีติ อยเมตฺถ ปฏิจฺจสมุปฺปาทนโยฯ
[5] ตตฺถ ตโย อทฺธา ทฺวาทสงฺคานิ วีสตาการา ติสนฺธิ จตุสงฺเขปา ตีณิ วฏฺฏานิ ทฺเว มูลานิ จ เวทิตพฺพานิฯ
[6] กถํ? อวิชฺชาสงฺขารา อตีโต อทฺธา, ชาติชรามรณํ อนาคโต อทฺธา, มชฺเฌ อฏฺฐ ปจฺจุปฺปนฺโน อทฺธาติ ตโย อทฺธาฯ
[7] อวิชฺชา สงฺขารา วิญฺญาณํ นามรูปํ สฬายตนํ ผสฺโส เวทนา ตณฺหา อุปาทานํ ภโว ชาติ ชรามรณนฺติ ทฺวาทสงฺคานิฯ
[8] โสกาทิวจนํ ปเนตฺถ นิสฺสนฺทผลนิทสฺสนํฯ
[9] อวิชฺชาสงฺขารคฺคหเณน ปเนตฺถ ตณฺหุปาทานภวาปิ คหิตา ภวนฺติ, ตถา ตณฺหุปาทานภวคฺคหเณน จ อวิชฺชาสงฺขารา, ชาติชรามรณคฺคหเณน จ วิญฺญาณาทิผลปญฺจกเมว คหิตนฺติ กตฺวา –
[10] อตีเต เหตโว ปญฺจ, อิทานิ ผลปญฺจกํฯ
อิทานิ เหตโว ปญฺจ, อายติํ ผลปญฺจกนฺติ;
วีสตาการา ติสนฺธิ, จตุสงฺเขปา จ ภวนฺติฯ
[11] อวิชฺชาตณฺหุปาทานา จ กิเลสวฏฺฏํ, กมฺมภวสงฺขาโต ภเวกเทโส สงฺขารา จ กมฺมวฏฺฏํ, อุปปตฺติภวสงฺขาโต ภเวกเทโส อวเสสา จ วิปากวฏฺฏนฺติ ตีณิ วฏฺฏานิฯ
[12] อวิชฺชาตณฺหาวเสน ทฺเว มูลานิ จ เวทิตพฺพานิฯ