[58] รูปโลเก ปน ฆานชิวฺหากายภาวทสกานิ จ อาหารชกลาปานิ จ น ลพฺภนฺติ, ตสฺมา เตสํ ปฏิสนฺธิกาเล จกฺขุโสตวตฺถุวเสน ตีณิ ทสกานิ ชีวิตนวกญฺเจติ จตฺตาโร กมฺมสมุฏฺฐานกลาปา, ปวตฺติยํ จิตฺโตตุสมุฏฺฐานา จ ลพฺภนฺติฯ
[59] อสญฺญสตฺตานํ ปน จกฺขุโสตวตฺถุสทฺทาปิ น ลพฺภนฺติ, ตถา สพฺพานิปิ จิตฺตชรูปานิ, ตสฺมา เตสํ ปฏิสนฺธิกาเล ชีวิตนวกเมว, ปวตฺติยญฺจ สทฺทวชฺชิตํ อุตุสมุฏฺฐานรูปํ อติริจฺฉติฯ
[60] อิจฺเจวํ กามรูปาสญฺญีสงฺขาเตสุ ตีสุ ฐาเนสุ ปฏิสนฺธิปวตฺติวเสน ทุวิธา รูปปฺปวตฺติ เวทิตพฺพาฯ
[61] อฏฺฐวีสติ กาเมสุ, โหนฺติ เตวีส รูปิสุฯ
สตฺตรเสว สญฺญีนํ, อรูเป นตฺถิ กิญฺจิปิฯ
สทฺโท วิกาโร ชรตา, มรณญฺโจปปตฺติยํ;
น ลพฺภนฺติ ปวตฺเต ตุ, น กิญฺจิปิ น ลพฺภติฯ
อยเมตฺถ รูปปวตฺติกฺกโมฯ
นิพฺพานเภโท
[62] นิพฺพานํ ปน โลกุตฺตรสงฺขาตํ จตุมคฺคญาเณน สจฺฉิกาตพฺพํ มคฺคผลานมารมฺมณภูตํ วานสงฺขาตาย ตณฺหาย นิกฺขนฺตตฺตา นิพฺพานนฺติ ปวุจฺจติฯ
[63] ตเทตํ สภาวโต เอกวิธมฺปิ สอุปาทิเสสนิพฺพานธาตุ อนุปาทิเสสนิพฺพานธาตุ เจติ ทุวิธํ โหติ การณปริยาเยนฯ
[64] ตถา สุญฺญตํ อนิมิตฺตํ อปฺปณิหิตญฺเจติ ติวิธํ โหติ อาการเภเทนฯ
[65] ปทมจฺจุตมจฺจนฺตํ, อสงฺขตมนุตฺตรํฯ
นิพฺพานมิติ ภาสนฺติ, วานมุตฺตา มเหสโยฯ
อิติ จิตฺตํ เจตสิกํ, รูปํ นิพฺพานมิจฺจปิ;
ปรมตฺถํ ปกาเสนฺติ, จตุธาว ตถาคตาฯ
อิติ อภิธมฺมตฺถสงฺคเห รูปสงฺคหวิภาโค นาม
ฉฏฺโฐ ปริจฺเฉโทฯ
7. สมุจฺจยปริจฺเฉโท
[1] ทฺวาสตฺตติวิธา วุตฺตา, วตฺถุธมฺมา สลกฺขณาฯ
เตสํ ทานิ ยถาโยคํ, ปวกฺขามิ สมุจฺจยํฯ
[2] อกุสลสงฺคโห มิสฺสกสงฺคโห โพธิปกฺขิยสงฺคโห สพฺพสงฺคโห เจติ สมุจฺจยสงฺคโห จตุพฺพิโธ เวทิตพฺโพฯ
อกุสลสงฺคโห
[3] กถํ? อกุสลสงฺคเห ตาว จตฺตาโร อาสวา – กามาสโว ภวาสโว ทิฏฺฐาสโว อวิชฺชาสโวฯ
[4] จตฺตาโร โอฆา – กาโมโฆ ภโวโฆ ทิฏฺโฐโฆ อวิชฺโชโฆฯ
[5] จตฺตาโร โยคา – กามโยโค ภวโยโค ทิฏฺฐิโยโค อวิชฺชาโยโคฯ
[6] จตฺตาโร คนฺถา – อภิชฺฌากายคนฺโถ, พฺยาปาโท กายคนฺโถ, สีลพฺพตปรามาโส กายคนฺโถ, อิทํสจฺจาภินิเวโส กายคนฺโถฯ