เมนู

ปฏิสงฺขายปเนตมทฺธุวํ , อธิคนฺตฺวา ปทมจฺจุตํ พุธา;

สุสมุจฺฉินฺนสิเนหพนฺธนา, สมเมสฺสนฺติ จิราย สุพฺพตาฯ

อิติ อภิธมฺมตฺถสงฺคเห วีถิมุตฺตสงฺคหวิภาโค นาม

ปญฺจโม ปริจฺเฉโทฯ

6. รูปปริจฺเฉโท

[1] เอตฺตาวตา วิภตฺตา หิ, สปฺปเภทปฺปวตฺติกาฯ

จิตฺตเจตสิกา ธมฺมา, รูปํ ทานิ ปวุจฺจติฯ

[2] สมุทฺเทสา วิภาคา จ, สมุฏฺฐานา กลาปโตฯ

ปวตฺติกฺกมโต เจติ, ปญฺจธา ตตฺถ สงฺคโหฯ

รูปสมุทฺเทโส

[3] จตฺตาริ มหาภูตานิ, จตุนฺนญฺจ มหาภูตานํ อุปาทายรูปนฺติ ทุวิธมฺเปตํ รูปํ เอกาทสวิเธน สงฺคหํ คจฺฉติฯ

[4] กถํ? ปถวีธาตุ อาโปธาตุ เตโชธาตุ วาโยธาตุ ภูตรูปํ นามฯ

[5] จกฺขุ โสตํ ฆานํ ชิวฺหา กาโย ปสาทรูปํ นามฯ

[6] รูปํ สทฺโท คนฺโธ รโส อาโปธาตุวิวชฺชิตํ ภูตตฺตยสงฺขาตํ โผฏฺฐพฺพํ โคจรรูปํ นามฯ

[7] อิตฺถตฺตํ ปุริสตฺตํ ภาวรูปํ นามฯ

[8] หทยวตฺถุ หทยรูปํ นามฯ

[9] ชีวิตินฺทฺริยํ ชีวิตรูปํ นามฯ

[10] กพฬีกาโร อาหาโร อาหารรูปํ นามฯ