[43] อกนิฏฺฐานํ โสฬส กปฺปสหสฺสานิฯ
[44] ปฐมารุปฺปาทิวิปากานิ ปฐมารุปฺปาทิภูมีสุ ยถากฺกมํ ปฏิสนฺธิภวงฺคจุติวเสน ปวตฺตนฺติฯ อิมา จตสฺโส อรูปปฏิสนฺธิโย นามฯ
[45] เตสุ ปน อากาสานญฺจายตนูปคานํ เทวานํ วีสติกปฺปสหสฺสานิ อายุปฺปมาณํฯ
[46] วิญฺญาณญฺจายตนูปคานํ เทวานํ จตฺตาลีสกปฺปสหสฺสานิฯ
[47] อากิญฺจญฺญายตนูปคานํ เทวานํ สฏฺฐิกปฺปสหสฺสานิฯ
[48] เนวสญฺญานาสญฺญายตนูปคานํ เทวานํ จตุราสีติกปฺปสหสฺสานิฯ
[49] ปฏิสนฺธิ ภวงฺคญฺจ, ตถา จวนมานสํฯ
เอกเมว ตเถเวกวิสยญฺเจกชาติยํฯ
อิทเมตฺถ ปฏิสนฺธิจตุกฺกํฯ
กมฺมจตุกฺกํ
[50] ชนกํ อุปตฺถมฺภกํ อุปปีฬกํ อุปฆาตกญฺเจติ กิจฺจวเสนฯ
[51] ครุกํ อาสนฺนํ อาจิณฺณํ กฏตฺตากมฺมญฺเจติ ปากทานปริยาเยนฯ
[52] ทิฏฺฐธมฺมเวทนียํ อุปปชฺชเวทนียํ อปราปริยเวทนียํ อโหสิกมฺมญฺเจติ ปากกาลวเสน จตฺตาริ กมฺมานิ นามฯ
[53] ตถา อกุสลํ กามาวจรกุสลํ รูปาวจรกุสลํ อรูปาวจรกุสลญฺเจติ ปากฐานวเสนฯ
[54] ตตฺถ อกุสลํ กายกมฺมํ วจีกมฺมํ มโนกมฺมญฺเจติ กมฺมทฺวารวเสน ติวิธํ โหติฯ
[55] กถํ? ปาณาติปาโต อทินฺนาทานํ กาเมสุมิจฺฉาจาโร เจติ กายวิญฺญตฺติสงฺขาเต กายทฺวาเร พาหุลฺลวุตฺติโต กายกมฺมํ นามฯ
[56] มุสาวาโท ปิสุณวาจา ผรุสวาจา สมฺผปฺปลาโป เจติ วจีวิญฺญตฺติสงฺขาเต วจีทฺวาเร พาหุลฺลวุตฺติโต วจีกมฺมํ นามฯ
[57] อภิชฺฌา พฺยาปาโท มิจฺฉาทิฏฺฐิ เจติ อญฺญตฺราปิ วิญฺญตฺติยา มนสฺมิํเยว พาหุลฺลวุตฺติโต มโนกมฺมํ นามฯ
[58] เตสุ ปาณาติปาโต ผรุสวาจา พฺยาปาโท จ โทสมูเลน ชายนฺติฯ
[59] กาเมสุมิจฺฉาจาโร อภิชฺฌา มิจฺฉาทิฏฺฐิ จ โลภมูเลนฯ
[60] เสสานิ จตฺตาริปิ ทฺวีหิ มูเลหิ สมฺภวนฺติฯ
[61] จิตฺตุปฺปาทวเสน ปเนตํ อกุสลํ สพฺพถาปิ ทฺวาทสวิธํ โหติฯ
[62] กามาวจรกุสลมฺปิ กายทฺวาเร ปวตฺตํ กายกมฺมํ, วจีทฺวาเร ปวตฺตํ วจีกมฺมํ, มโนทฺวาเร ปวตฺตํ มโนกมฺมญฺเจติ กมฺมทฺวารวเสน ติวิธํ โหติฯ
[63] ตถา ทานสีลภาวนาวเสนฯ
[64] จิตฺตุปฺปาทวเสน ปเนตํ อฏฺฐวิธํ โหติฯ
[65] ทานสีลภาวนาปจายนเวยฺยาวจฺจปตฺติทานปตฺตานุโมทนธมฺมสฺสวนธมฺมเทสนา ทิฏฺฐิชุกมฺมวเสน ทสวิธํ โหติฯ
[66] ตํ ปเนตํ วีสติวิธมฺปิ กามาวจรกมฺมมิจฺเจว สงฺขํ คจฺฉติฯ
[67] รูปาวจรกุสลํ ปน มโนกมฺมเมว, ตญฺจ ภาวนามยํ อปฺปนาปฺปตฺตํ, ฌานงฺคเภเทน ปญฺจวิธํ โหติฯ
[68] ตถา อรูปาวจรกุสลญฺจ มโนกมฺมํ, ตมฺปิ ภาวนามยํ อปฺปนาปฺปตฺตํฯ อารมฺมณเภเทน จตุพฺพิธํ โหติฯ
[69] เอตฺถากุสลกมฺมมุทฺธจฺจรหิตํ อปายภูมิยํ ปฏิสนฺธิํ ชเนติ, ปวตฺติยํ ปน สพฺพมฺปิ ทฺวาทสวิธํ สตฺตากุสลปากานิ สพฺพตฺถาปิ กามโลเก รูปโลเก จ ยถารหํ วิปจฺจติฯ
[70] กามาวจรกุสลมฺปิ กามสุคติยเมว ปฏิสนฺธิํ ชเนติ, ตถา ปวตฺติยญฺจ มหาวิปากานิ , อเหตุกวิปากานิ ปน อฏฺฐปิ สพฺพตฺถาปิ กามโลเก รูปโลเก จ ยถารหํ วิปจฺจติฯ
[71] ตตฺถาปิ ติเหตุกมุกฺกฏฺฐํ กุสลํ ติเหตุกํ ปฏิสนฺธิํ ทตฺวา ปวตฺเต โสฬส วิปากานิ วิปจฺจติฯ
[72] ติเหตุกโมมกํ ทฺวิเหตุกมุกฺกฏฺฐญฺจ กุสลํ ทฺวิเหตุกํ ปฏิสนฺธิํ ทตฺวา ปวตฺเต ติเหตุกรหิตานิ ทฺวาทส วิปากานิ วิปจฺจติฯ
[73] ทฺวิเหตุกโมมกํ ปน กุสลํ อเหตุกเมว ปฏิสนฺธิํ เทติ, ปวตฺเต จ อเหตุกวิปากาเนว วิปจฺจติฯ
[74] อสงฺขารํ สสงฺขาร-วิปากานิ น ปจฺจติฯ
สสงฺขารมสงฺขาร-วิปากานีติ เกจนฯ
เตสํ ทฺวาทส ปากานิ, ทสาฏฺฐ จ ยถากฺกมํ;
ยถาวุตฺตานุสาเรน ยถาสมฺภวมุทฺทิเสฯ
[75] รูปาวจรกุสลํ ปน ปฐมชฺฌานํ ปริตฺตํ ภาเวตฺวา พฺรหฺมปาริสชฺเชสุ อุปฺปชฺชติฯ
[76] ตเทว มชฺฌิมํ ภาเวตฺวา พฺรหฺมปุโรหิเตสุฯ
[77] ปณีตํ ภาเวตฺวา มหาพฺรหฺเมสุฯ
[78] ตถา ทุติยชฺฌานํ ตติยชฺฌานญฺจ ปริตฺตํ ภาเวตฺวา ปริตฺตาเภสุฯ
[79] มชฺฌิมํ ภาเวตฺวา อปฺปมาณาเภสุฯ
[80] ปณีตํ ภาเวตฺวา อาภสฺสเรสุฯ
[81] จตุตฺถชฺฌานํ ปริตฺตํ ภาเวตฺวา ปริตฺตสุเภสุฯ
[82] มชฺฌิมํ ภาเวตฺวา อปฺปมาณสุเภสุฯ
[83] ปณีตํ ภาเวตฺวา สุภกิณฺเหสุฯ
[84] ปญฺจมชฺฌานํ ภาเวตฺวา เวหปฺผเลสุฯ
[85] ตเทว สญฺญาวิราคํ ภาเวตฺวา อสญฺญสตฺเตสุฯ
[86] อนาคามิโน ปน สุทฺธาวาเสสุ อุปฺปชฺชนฺติฯ
[87] อรูปาวจรกุสลญฺจ ยถากฺกมํ ภาเวตฺวา อารุปฺเปสุ อุปฺปชฺชนฺตีติฯ
[88] อิตฺถํ มหคฺคตํ ปุญฺญํ, ยถาภูมิววตฺถิตํฯ
ชเนติ สทิสํ ปากํ, ปฏิสนฺธิปวตฺติยํฯ
อิทเมตฺถ กมฺมจตุกฺกํฯ
จุติปฏิสนฺธิกฺกโม
[89] อายุกฺขเยน กมฺมกฺขเยน อุภยกฺขเยน อุปจฺเฉทกกมฺมุนา เจติ จตุธา มรณุปฺปตฺติ นามฯ