(ข) เตน ปกรณปฺปสุเตน วิปุเลน ปุญฺเญน ปญฺญาวทาเตน อริยมคฺคปญฺญาปริสุทฺเธน สีลาทิคุเณน โสภิตาฯ ตโตเยว ลชฺชิโน ภิกฺขู, ธญฺญานํ อธิวาสภูตํ, อุทิโตทิตํ อจฺจนฺตปฺปสิทฺธํ, มูลโสมํ นาม วิหารํ, ปุญฺญวิภวสฺส อุทยสงฺขาตาย มงฺคลตฺถาย อายุกนฺตํ มญฺญนฺตุ, ตตฺถ นิวาสิโน ภิกฺขู อีทิสา โหนฺตูตฺยธิปฺปาโยฯ

นิคมนวณฺณนา นิฏฺฐิตาฯ

นิฏฺฐิตา จายํ อภิธมฺมตฺถวิภาวินี นามฯ

อภิธมฺมตฺถสงฺคหฏีกาฯ

นิคมนกถา

[1] รมฺเม ปุลตฺถินคเร นคราธิราเช,

รญฺญา ปรกฺกมภุเชน มหาภุเชน;

การาปิเต วสติ เชตวเน วิหาเร;

โย รมฺมหมฺมิยวรูปวนาภิราเมฯ

[2] สมฺปนฺนสีลทมสํยมโตสิเตหิ,

สมฺมานิโต วสิคเณหิ คุณากเรหิ;

ปตฺโต มุนินฺทวจนาทิสุ เนกคนฺถ-

ชาเตสุ จาจริยตํ มหิตํ วิทูหิฯ

[3] ญาณานุภาวมิห ยสฺส จ สูจยนฺตี,

สํวณฺณนา จ วินยฏฺฐกถาทิกานํ;

สารตฺถทีปนิมุขา มธุรตฺถสาร-

สนฺทีปเนน สุชนํ ปริโตสยนฺตีฯ

[4] ตสฺสานุกมฺปมวลมฺพิย สาริปุตฺต-

ตฺเถรสฺส ถามคตสารคุณากรสฺส;

โย เนกคนฺถวิสยํ ปฏุตํ อลตฺถํ,

ตสฺเสส ญาณวิภโว วิภเวกเหตุฯ

[5] โสหเมตสฺส สํสุทฺธ-วายามสฺสานุภาวโตฯ

อทฺธาสาสนทายาโท, เหสฺสํ เมตฺเตยฺยสตฺถุโนฯ

[6] โชตยนฺตํ ตทา ตสฺส, สาสนํ สุทฺธมานสํฯ

ปสฺเสยฺยํ สกฺกเรยฺยญฺจ, ครุํ เม สาริสมฺภวํฯ

[7] ทิเนหิ จตุวีเสหิ, ฏีกายํ นิฏฺฐิตา ยถาฯ

ตถา กลฺยาณสงฺกปฺปา, สีฆํ สิชฺฌนฺตุ ปาณินนฺติฯ

อิติ ภทนฺตสาริปุตฺตมหาเถรสฺส สิสฺเสน รจิตา

อภิธมฺมตฺถวิภาวินี นาม

อภิธมฺมตฺถสงฺคหฏีกา นิฏฺฐิตาฯ