เมนู

ชวนนิยโม

[31] ชวเนสุ จ ปริตฺตชวนวีถิยํ กามาวจรชวนานิ สตฺตกฺขตฺตุํ ฉกฺขตฺตุเมว วา ชวนฺติฯ

[32] มนฺทปฺปวตฺติยํ ปน มรณกาลาทีสุ ปญฺจวารเมวฯ

[33] ภควโต ปน ยมกปาฏิหาริยกาลาทีสุ ลหุกปฺปวตฺติยํ จตฺตาริปญฺจ วา ปจฺจเวกฺขณจิตฺตานิ ภวนฺตีติปิ วทนฺติฯ

[34] อาทิกมฺมิกสฺส ปน ปฐมกปฺปนายํ มหคฺคตชวนานิอภิญฺญาชวนานิ จ สพฺพทาปิ เอกวารเมว ชวนฺติ, ตโต ปรํ ภวงฺคปาโตฯ

[35] จตฺตาโร ปน มคฺคุปฺปาทา เอกจิตฺตกฺขณิกา, ตโต ปรํ ทฺเว ตีณิ ผลจิตฺตานิ ยถารหํ อุปฺปชฺชนฺติ, ตโต ปรํ ภวงฺคปาโตฯ

[36] นิโรธสมาปตฺติกาเล ทฺวิกฺขตฺตุํ จตุตฺถารุปฺปชวนํ ชวติ, ตโต ปรํ นิโรธํ ผุสติฯ

[37] วุฏฺฐานกาเล จ อนาคามิผลํ วา อรหตฺตผลํ วา ยถารหเมกวารํ อุปฺปชฺชิตฺวา นิรุทฺเธ ภวงฺคปาโตว โหติฯ

[38] สพฺพตฺถาปิ สมาปตฺติวีถิยํ ภวงฺคโสโต วิย วีถินิยโม นตฺถีติ กตฺวา พหูนิปิ ลพฺภนฺตีติฯ

[39] สตฺตกฺขตฺตุํ ปริตฺตานิ, มคฺคาภิญฺญา สกิํ มตาฯ

อวเสสานิ ลพฺภนฺติ, ชวนานิ พหูนิปิฯ

อยเมตฺถ ชวนนิยโมฯ

ปุคฺคลเภโท

[40] ทุเหตุกานมเหตุกานญฺจ ปเนตฺถ กิริยชวนานิ เจว อปฺปนาชวนานิ จ ลพฺภนฺติฯ

[41] ตถา ญาณสมฺปยุตฺตวิปากานิ จ สุคติยํฯ

[42] ทุคฺคติยํ ปน ญาณวิปฺปยุตฺตานิ จ มหาวิปากานิ น ลพฺภนฺติฯ

[43] ติเหตุเกสุ จ ขีณาสวานํ กุสลากุสลชวนานิ น ลพฺภนฺติฯ

[44] ตถา เสกฺขปุถุชฺชนานํ กิริยชวนานิฯ

[45] ทิฏฺฐิคตสมฺปยุตฺตวิจิกิจฺฉาชวนานิ จ เสกฺขานํฯ

[46] อนาคามิปุคฺคลานํ ปน ปฏิฆชวนานิ จ น ลพฺภนฺติฯ

[47] โลกุตฺตรชวนานิ จ ยถารหํ อริยานเมว สมุปฺปชฺชนฺตีติฯ

[48] อเสกฺขานํ จตุจตฺตาลีส เสกฺขานมุทฺทิเสฯ

ฉปฺปญฺญาสาวเสสานํ, จตุปญฺญาส สมฺภวาฯ

อยเมตฺถ ปุคฺคลเภโทฯ

ภูมิวิภาโค

[49] กามาวจรภูมิยํ ปเนตานิ สพฺพานิปิ วีถิจิตฺตานิ ยถารหมุปลพฺภนฺติฯ

[50] รูปาวจรภูมิยํ ปฏิฆชวนตทารมฺมณวชฺชิตานิฯ

[51] อรูปาวจรภูมิยํ ปฐมมคฺครูปาวจรหสนเหฏฺฐิมารุปฺปวชฺชิตานิ จ ลพฺภนฺติฯ