[26] อฏฺฐ มหาวิปากานิ เจว สนฺตีรณตฺตยญฺเจติ เอกาทส ตทารมฺมณกิจฺจานิฯ
[27] เตสุ ปน ทฺเว อุเปกฺขาสหคตสนฺตีรณจิตฺตานิ ปฏิสนฺธิภวงฺคจุติตทารมฺมณสนฺตีรณวเสน ปญฺจกิจฺจานิ นามฯ
[28] มหาวิปากานิ อฏฺฐ ปฏิสนฺธิภวงฺคจุติตทารมฺมณวเสน จตุกิจฺจานิ นามฯ
[29] มหคฺคตวิปากานิ นว ปฏิสนฺธิภวงฺคจุติวเสน ติกิจฺจานิ นามฯ
[30] โสมนสฺสสนฺตีรณํ สนฺตีรณตทารมฺมณวเสน ทุกิจฺจํฯ
[31] ตถา โวฏฺฐพฺพนํ โวฏฺฐพฺพนาวชฺชนวเสนฯ
[32] เสสานิ ปน สพฺพานิปิ ชวนมโนธาตุตฺติกทฺวิปญฺจวิญฺญาณานิ ยถาสมฺภวเมกกิจฺจานีติฯ
[33] ปฏิสนฺธาทโย นาม, กิจฺจเภเทน จุทฺทสฯ
ทสธา ฐานเภเทน, จิตฺตุปฺปาทา ปกาสิตาฯ
[34] อฏฺฐสฏฺฐิ ตถา ทฺเว จ, นวาฏฺฐ ทฺเว ยถากฺกมํฯ
เอกทฺวิติจตุปญฺจกิจฺจฐานานิ นิทฺทิเสฯ
ทฺวารสงฺคโห
[35] ทฺวารสงฺคเห ทฺวารานิ นาม จกฺขุทฺวารํ โสตทฺวารํ ฆานทฺวารํ ชิวฺหาทฺวารํ กายทฺวารํ มโนทฺวารญฺเจติ ฉพฺพิธานิ ภวนฺติฯ
[36] ตตฺถ จกฺขุเมว จกฺขุทฺวารํฯ
[37] ตถา โสตาทโย โสตทฺวาราทีนิฯ