[46] จตุตฺเถ ตเถว โลภมาเนนฯ
[47] ปญฺจเม ปน ปฏิฆสมฺปยุตฺเต อสงฺขาริเก โทโส อิสฺสา มจฺฉริยํ กุกฺกุจฺจญฺจาติ จตูหิ สทฺธิํ ปีติวชฺชิตา เต เอว วีสติ ธมฺมา สงฺคยฺหนฺติ, อิสฺสามจฺฉริยกุกฺกุจฺจานิ ปเนตฺถ ปจฺเจกเมว โยเชตพฺพานิฯ
[48] สสงฺขาริกปญฺจเกปิ ตเถว ถินมิทฺเธน วิเสเสตฺวา โยเชตพฺพาฯ
[49] ฉนฺทปีติวชฺชิตา ปน อญฺญสมานา เอกาทส, อกุสลสาธารณา จตฺตาโร จาติ ปนฺนรส ธมฺมา อุทฺธจฺจสหคเต สมฺปยุชฺชนฺติฯ
[50] วิจิกิจฺฉาสหคตจิตฺเต จ อธิโมกฺขวิรหิตา วิจิกิจฺฉาสหคตา ตเถว ปนฺนรส ธมฺมา สมุปลพฺภนฺตีติ สพฺพถาปิ ทฺวาทสากุสลจิตฺตุปฺปาเทสุ ปจฺเจกํ โยชิยมานาปิ คณนวเสน สตฺตธาว สงฺคหิตา ภวนฺตีติฯ
[51] เอกูนวีสาฏฺฐารส, วีเสกวีส วีสติฯ
ทฺวาวีส ปนฺนรเสติ, สตฺตธา กุสเลฐิตาฯ
[52] สาธารณา จ จตฺตาโร, สมานา จ ทสาปเรฯ
จุทฺทเสเต ปวุจฺจนฺติ, สพฺพากุสลโยคิโนฯ
อเหตุกจิตฺตสงฺคหนโย
[53] อเหตุเกสุ ปน หสนจิตฺเต ตาว ฉนฺทวชฺชิตา อญฺญสมานา ทฺวาทส ธมฺมา สงฺคหํ คจฺฉนฺติฯ
[54] ตถา โวฏฺฐพฺพเน ฉนฺทปีติวชฺชิตาฯ
[55] สุขสนฺตีรเณ ฉนฺทวีริยวชฺชิตาฯ
[56] มโนธาตุตฺติกาเหตุกปฏิสนฺธิยุคเฬ ฉนฺทปีติวีริยวชฺชิตาฯ
[57] ทฺวิปญฺจวิญฺญาเณ ปกิณฺณกวชฺชิตา เตเยว สงฺคยฺหนฺตีติ สพฺพถาปิ อฏฺฐารสสุ อเหตุเกสุ คณนวเสน จตุธาว สงฺคโห โหตีติฯ
[58] ทฺวาทเสกาทส ทส, สตฺต จาติ จตุพฺพิโธฯ
อฏฺฐารสาเหตุเกสุ, จิตฺตุปฺปาเทสุ สงฺคโหฯ
[59] อเหตุเกสุ สพฺพตฺถ, สตฺต เสสา ยถารหํฯ
อิติ วิตฺถารโต วุตฺโต, เตตฺติํสวิธสงฺคโหฯ
[60] อิตฺถํ จิตฺตาวิยุตฺตานํ, สมฺปโยคญฺจ สงฺคหํฯ
ญตฺวา เภทํ ยถาโยคํ, จิตฺเตน สมมุทฺทิเสฯ
อิติ อภิธมฺมตฺถสงฺคเห เจตสิกสงฺคหวิภาโค นาม
ทุติโย ปริจฺเฉโทฯ
3. ปกิณฺณกปริจฺเฉโท
[1] สมฺปยุตฺตา ยถาโยคํ, เตปญฺญาส สภาวโตฯ
จิตฺตเจตสิกา ธมฺมา, เตสํ ทานิ ยถารหํฯ
[2] เวทนาเหตุโต กิจฺจทฺวาราลมฺพณวตฺถุโตฯ
จิตฺตุปฺปาทวเสเนว, สงฺคโห นาม นียเตฯ
เวทนาสงฺคโห
[3] ตตฺถ เวทนาสงฺคเห ตาว ติวิธา เวทนา สุขํ ทุกฺขํ อทุกฺขมสุขา เจติ, สุขํ ทุกฺขํ โสมนสฺสํ โทมนสฺสํ อุเปกฺขาติ จ เภเทน ปน ปญฺจธา โหติฯ
[4] ตตฺถ สุขสหคตํ กุสลวิปากํ กายวิญฺญาณเมกเมว, ตถา ทุกฺขสหคตํ อกุสลวิปากํฯ