[29] วิรติโย ปน ติสฺโสปิ โลกุตฺตรจิตฺเตสุ สพฺพถาปิ นิยตา เอกโตว ลพฺภนฺติ, โลกิเยสุ ปน กามาวจรกุสเลสฺเวว กทาจิ สนฺทิสฺสนฺติ วิสุํ วิสุํฯ

[30] อปฺปมญฺญาโย ปน ทฺวาทสสุ ปญฺจมชฺฌานวชฺชิตมหคฺคตจิตฺเตสุ เจว กามาวจรกุสเลสุ จ สเหตุกกามาวจรกิริยจิตฺเตสุ จาติ อฏฺฐวีสติจิตฺเตสฺเวว กทาจิ นานา หุตฺวา ชายนฺติ, อุเปกฺขาสหคเตสุ ปเนตฺถ กรุณามุทิตา น สนฺตีติ เกจิ วทนฺติฯ

[31] ปญฺญา ปน ทฺวาทสสุ ญาณสมฺปยุตฺตกามาวจรจิตฺเตสุ เจว สพฺเพสุปิ ปญฺจติํสมหคฺคตโลกุตฺตรจิตฺเตสุ จาติ สตฺตจตฺตาลีสจิตฺเตสุ สมฺปโยคํ คจฺฉตีติฯ

[32] เอกูนวีสติ ธมฺมา, ชายนฺเตกูนสฏฺฐิสุฯ

ตโย โสฬสจิตฺเตสุ, อฏฺฐวีสติยํ ทฺวยํฯ

ปญฺญา ปกาสิตา, สตฺตจตฺตาลีสวิเธสุปิ;

สมฺปยุตฺตา จตุเธวํ, โสภเนสฺเวว โสภนาฯ

[33] อิสฺสามจฺเฉรกุกฺกุจฺจ-วิรติกรุณาทโยฯ

นานา กทาจิ มาโน จ, ถิน มิทฺธํ ตถา สหฯ

[34] ยถาวุตฺตานุสาเรน, เสสา นิยตโยคิโนฯ

สงฺคหญฺจ ปวกฺขามิ, เตสํ ทานิ ยถารหํฯ

สงฺคหนโย

[35] ฉตฺติํสานุตฺตเร ธมฺมา, ปญฺจติํส มหคฺคเตฯ

อฏฺฐติํสาปิ ลพฺภนฺติ, กามาวจรโสภเนฯ

สตฺตวีสติปุญฺญมฺหิ, ทฺวาทสาเหตุเกติ จ;

ยถาสมฺภวโยเคน, ปญฺจธา ตตฺถ สงฺคโหฯ

โลกุตฺตรจิตฺตสงฺคหนโย

[36] กถํ ? โลกุตฺตเรสุ ตาว อฏฺฐสุ ปฐมชฺฌานิกจิตฺเตสุ อญฺญสมานา เตรส เจตสิกา, อปฺปมญฺญาวชฺชิตา เตวีสติ โสภนเจตสิกา เจติ ฉตฺติํส ธมฺมา สงฺคหํ คจฺฉนฺติ, ตถา ทุติยชฺฌานิกจิตฺเตสุ วิตกฺกวชฺชา, ตติยชฺฌานิกจิตฺเตสุ วิตกฺกวิจารวชฺชา, จตุตฺถชฺฌานิกจิตฺเตสุ วิตกฺกวิจารปีติวชฺชา, ปญฺจมชฺฌานิกจิตฺเตสุปิ อุเปกฺขาสหคตา เต เอว สงฺคยฺหนฺตีติ สพฺพถาปิ อฏฺฐสุ โลกุตฺตรจิตฺเตสุ ปญฺจกชฺฌานวเสน ปญฺจธาว สงฺคโห โหตีติฯ

[37] ฉตฺติํส ปญฺจติํส จ, จตุตฺติํส ยถากฺกมํฯ

เตตฺติํสทฺวยมิจฺเจวํ, ปญฺจธานุตฺตเร ฐิตาฯ

มหคฺคตจิตฺตสงฺคหนโย

[38] มหคฺคเตสุ ปน ตีสุ ปฐมชฺฌานิกจิตฺเตสุ ตาว อญฺญสมานา เตรส เจตสิกา, วิรติตฺตยวชฺชิตา ทฺวาวีสติ โสภนเจตสิกา เจติ ปญฺจติํส ธมฺมา สงฺคหํ คจฺฉนฺติ, กรุณามุทิตา ปเนตฺถ ปจฺเจกเมว โยเชตพฺพา, ตถา ทุติยชฺฌานิกจิตฺเตสุ วิตกฺกวชฺชา, ตติยชฺฌานิกจิตฺเตสุ วิตกฺกวิจารวชฺชา, จตุตฺถชฺฌานิกจิตฺเตสุ วิตกฺกวิจารปีติวชฺชา, ปญฺจมชฺฌานิกจิตฺเตสุ ปน ปนฺนรสสุ อปฺปมญฺญาโย น ลพฺภนฺตีติ สพฺพถาปิ สตฺตวีสติมหคฺคตจิตฺเตสุ ปญฺจกชฺฌานวเสน ปญฺจธาว สงฺคโห โหตีติฯ

[39] ปญฺจติํส จตุตฺติํส, เตตฺติํส จ ยถากฺกมํฯ

พาตฺติํส เจว ติํเสติ, ปญฺจธาว มหคฺคเตฯ