ปญฺจปญฺญาส ฉสฏฺฐิฏฺฐสตฺตติ ติสตฺตติ;
เอกปญฺญาส เจกูนสตฺตติ สปกิณฺณกาฯ
อกุสลเจตสิกสมฺปโยคนโย
[20] อกุสเลสุ ปน โมโห อหิริกํ อโนตฺตปฺปํ อุทฺธจฺจญฺจาติ จตฺตาโรเม เจตสิกา สพฺพากุสลสาธารณา นาม, สพฺเพสุปิ ทฺวาทสา กุสเลสุ ลพฺภนฺติฯ
[21] โลโภ อฏฺฐสุ โลภสหคตจิตฺเตสฺเวว ลพฺภติฯ
[22] ทิฏฺฐิ จตูสุ ทิฏฺฐิคตสมฺปยุตฺเตสุฯ
[23] มาโน จตูสุ ทิฏฺฐิคตวิปฺปยุตฺเตสุฯ
[24] โทโส อิสฺสา มจฺฉริยํ กุกฺกุจฺจญฺจาติ ทฺวีสุ ปฏิฆสมฺปยุตฺตจิตฺเตสุฯ
[25] ถินมิทฺธํ ปญฺจสุ สสงฺขาริกจิตฺเตสุฯ
[26] วิจิกิจฺฉา วิจิกิจฺฉาสหคตจิตฺเตเยวาติฯ
[27] สพฺพาปุญฺเญสุ จตฺตาโร,
โลภมูเล ตโย คตา;
โทสมูเลสุ จตฺตาโร,
สสงฺขาเร ทฺวยํ ตถาฯ
วิจิกิจฺฉา วิจิกิจฺฉา-จิตฺเต จาติ จตุทฺทส;
ทฺวาทสากุเลสฺเวว, สมฺปยุชฺชนฺติ ปญฺจธาฯ
โสภนเจตสิกสมฺปโยคนโย
[28] โสภเนสุ ปน โสภนสาธารณา ตาว เอกูนวีสติเม เจตสิกา สพฺเพสุปิ เอกูนสฏฺฐิโสภนจิตฺเตสุ สํวิชฺชนฺติฯ
[29] วิรติโย ปน ติสฺโสปิ โลกุตฺตรจิตฺเตสุ สพฺพถาปิ นิยตา เอกโตว ลพฺภนฺติ, โลกิเยสุ ปน กามาวจรกุสเลสฺเวว กทาจิ สนฺทิสฺสนฺติ วิสุํ วิสุํฯ
[30] อปฺปมญฺญาโย ปน ทฺวาทสสุ ปญฺจมชฺฌานวชฺชิตมหคฺคตจิตฺเตสุ เจว กามาวจรกุสเลสุ จ สเหตุกกามาวจรกิริยจิตฺเตสุ จาติ อฏฺฐวีสติจิตฺเตสฺเวว กทาจิ นานา หุตฺวา ชายนฺติ, อุเปกฺขาสหคเตสุ ปเนตฺถ กรุณามุทิตา น สนฺตีติ เกจิ วทนฺติฯ
[31] ปญฺญา ปน ทฺวาทสสุ ญาณสมฺปยุตฺตกามาวจรจิตฺเตสุ เจว สพฺเพสุปิ ปญฺจติํสมหคฺคตโลกุตฺตรจิตฺเตสุ จาติ สตฺตจตฺตาลีสจิตฺเตสุ สมฺปโยคํ คจฺฉตีติฯ
[32] เอกูนวีสติ ธมฺมา, ชายนฺเตกูนสฏฺฐิสุฯ
ตโย โสฬสจิตฺเตสุ, อฏฺฐวีสติยํ ทฺวยํฯ
ปญฺญา ปกาสิตา, สตฺตจตฺตาลีสวิเธสุปิ;
สมฺปยุตฺตา จตุเธวํ, โสภเนสฺเวว โสภนาฯ
[33] อิสฺสามจฺเฉรกุกฺกุจฺจ-วิรติกรุณาทโยฯ
นานา กทาจิ มาโน จ, ถิน มิทฺธํ ตถา สหฯ
[34] ยถาวุตฺตานุสาเรน, เสสา นิยตโยคิโนฯ
สงฺคหญฺจ ปวกฺขามิ, เตสํ ทานิ ยถารหํฯ
สงฺคหนโย
[35] ฉตฺติํสานุตฺตเร ธมฺมา, ปญฺจติํส มหคฺคเตฯ
อฏฺฐติํสาปิ ลพฺภนฺติ, กามาวจรโสภเนฯ
สตฺตวีสติปุญฺญมฺหิ, ทฺวาทสาเหตุเกติ จ;
ยถาสมฺภวโยเคน, ปญฺจธา ตตฺถ สงฺคโหฯ