วิญฺญาณกฺขนฺธปกิณฺณกนยสงฺเขโป

[192]

เอกธาทินโยทานิ , ปฏุวฑฺฒาย โยคินํ;

วุจฺจเต วิสยคฺคาหา, สพฺพเมกวิธํ มนํฯ

[193]

เอกาสีติ ติภูมฏฺฐํ, โลกิยํ สุตฺตรญฺจ ตํ;

เสสํ โลกุตฺตรํ อฏฺฐ, อนุตฺตรญฺจิตี ทฺวิธาฯ

[194]

โลกปากกฺริยาเหตู , เจกเหตูติ สตฺตหิ;

ติํส นาธิปติ สาธิ-ปติ เสสาติปี ทฺวิธาฯ

[195]

ฉนฺทจิตฺตีหวีมํสา-สฺเวเกน มติมา ยุตํ;

วินา วีมํสเมเกน, ญาณหีนมนํ ยุตํฯ

[196]

ปริตฺตานปฺปมาณานิ, มหคฺคตมนานิติ;

ติธา ฉนว จฏฺฐ จ, ตินวา จ ยถากฺกมํฯ

[197]

ทฺวิปญฺจ จิตฺตํ วิญฺญาณํ, ติสฺโส หิ มโนธาตุโย;

ฉสตฺตติ มโนญาณ-ธาตูติ ติวิธา ปุนฯ

[198]

เอการมฺมณจิตฺตานิ, อนภิญฺญํ มหคฺคตํ;

อมลํ ปญฺจวิญฺญาณํ, นวปญฺจ ภวนฺติเมฯ

[199]

ปญฺจาลมฺพํ มโนธาตุ, สาภิญฺญํ กามธาตุชํ;

เสสํ ฉารมฺมณํ ตํ หิ, เตจตฺตาลีส สงฺขฺยโตฯ

[200]

กามปากทุสา จาทิ-มคฺโค จาทิกฺริยา ทุเว;

รูปา สพฺเพติรูเป น, เตจตฺตาลีส โหนฺติเมฯ

[201]

วินาว รูเปนารุปฺป-วิปากา จตุโร สิยุํ;

ทฺเวจตฺตาลีส เสสานิ, วตฺตนฺตุภยถาปิ จฯ

[202]

จตุธาปิ อเหตฺเวกทฺวิเหตุกติเหตุโต;

อฏฺฐารส ทฺเว พาวีส, สตฺตจตฺตาลิสํ ภเวฯ

[203]

กาเม ชวา สโวฏฺฐพฺพา, อภิญฺญาทฺวยเมว จ;

รูปิริยาปถวิญฺญตฺติกราเม จตุรฏฺฐกาฯ

[204]

ฉพฺพีสติ ชวา เสสา, กรา รูปิริยาปเถ;

ทฺวิปญฺจมนวชฺชานิ, กามรูปผลานิ จฯ

[205]

อาทิกฺริยาติ เจกูน-วีส รูปกรา อิเม;

เสสา จุทฺทส ภินฺนาวจุติ สนฺธิ น ตีณิปิฯ

[206]

เอกกิจฺจาทิโต ปญฺจ-วิธา ตตฺเถกกิจฺจกา;

ทฺวิปญฺจจิตฺตํ ชวนํ, มโนธาตุฏฺฐสฏฺฐิเมฯ

[207]

ทฺวิกิจฺจาทีนิ โวฏฺฐพฺพํ, สุขตีรํ มหคฺคเต;

ปากา กามมหาปากา, เสสา ตีรา ยถากฺกมํฯ

[208]

ทสฺสนํ สวนํ ทิฏฺฐํ, สุตํ ฆายนกาทิกํ;

ตยํ มุตํ มโนธาตุตฺตยํ ทิฏฺฐํ สุตํ มุตํฯ

[209]

ทิฏฺฐํ สุตํ มุตํ ญาตํ, สาภิญฺญํ เสสกามิกํ;

วิญฺญาตารมฺมณํ เสสเมวํ ฉพฺพิธมีรเยฯ

[210]

สตฺตธา สตฺตวิญฺญาณธาตูนํ ตุ วสา ภเว;

วุจฺจเตทานิ ตสฺเสว, อนนฺตรนยกฺกโมฯ

[211]

ปุญฺเญสฺวาทิทฺวยา กาเม, รูปปุญฺญมนนฺตกํ;

ตปฺปาทกุตฺตรานนฺตํ, ภวงฺคญฺจาทิตีรณํฯ

[212]

ทุติยนฺตทฺวยา ตีรํ, ภวงฺคํ ตติยทฺวยา;

เต อนนฺตามลํ ปุญฺญํ, มชฺฌตฺตญฺจ มหคฺคตํฯ

[213]

สพฺพวาเร สยญฺเจติ, เตปญฺญาส ติสตฺต จ;

เตตฺติํส จ ภวนฺเตเต, รูเปสุ ปน ปุญฺญโตฯ

[214]

ตปฺปากา จ มติยุตฺต-กามปากา สยํ ทส;

อารุปฺปปุญฺญโต เต จ, สโก ปาโก สยํ ปุนฯ

[215]

อโธปากา จ อนฺตมฺหา, ตติยญฺจ ผลนฺติเม;

ทเสกทฺวิติปญฺจาหิ, มคฺคา เจกํ สกํ ผลํฯ

[216]

โลภมูเลกเหตูหิ , อนฺตกามสุภา วิย;

สตฺต โทสทฺวยา กาม-ภวงฺคเปกฺขวา สยํฯ

[217]

มหาปากติเหตูหิ, สาวชฺชา สพฺพสนฺธิโย;

กามจฺจุตีหิ เสสาหิ, สาวชฺชา กามสนฺธิโยฯ

[218]

กามจฺจุติ จ โวฏฺฐพฺพํ, สยญฺจ สุขตีรโต;

ปฏิจฺฉา ตีรณานิ ทฺเว, อิตรา สกตีรณํฯ

[219]

สกํ สกํ ปฏิจฺฉํ ตุ, วิญฺญาเณหิ ทฺวิปญฺจหิ;

รูปปาเกหิ สาวชฺชา, สนฺธิโยเหตุวชฺชิตาฯ

[220]

อรูปปาเกสฺวาทิมฺหา, กามปากา ติเหตุกา;

อนฺตาวชฺชมฺปิ จารุปฺป-ปากา จ นว โหนฺติเมฯ

[221]

ทุติยาทีหิ เตเยว, อโธปากํ วินา วินา;

ผลา ติเหตุกา ปากา, สยญฺเจติ จตุทฺทสฯ

[222]

ทฺวิปญฺจาทิกฺริยา หาสา, สยญฺจารุปฺปวชฺชิตา;

ญาณยุตฺตภวงฺคาติ, ทส โวฏฺฐพฺพโต ปนฯ

[223]

กาเม ชวา ภวงฺคา จ, กามรูเป สยมฺปิ วา;

นวปญฺจ สเหตาทิ-กิริยทฺวยโต ปนฯ

[224]

สยํ ภวงฺคมติมา, รูเป สาตกฺริยาปิ จ;

ตปฺปาทกนฺติมญฺเจติ, พาวีส ตติยา ปนฯ

[225]

เต จ ปากา สยญฺจนฺเต, ผลํ มชฺฌา มหคฺคตา;

กฺริยาติ วีสติ โหนฺติ, เสสทฺวีหิ ทุเกหิ ตุฯ

[226]

วุตฺตปากา สยญฺเจติ, จุทฺทเสวํ กฺริยาชวา;

ตทารมฺมณํ มุญฺจิตฺวา, ปฏฺฐานนยโต นเยฯ

[227]

อถ สาตกฺริยา สาตํ, เสสํ เสสกฺริยาปิ จ;

ตทาลมฺพํ ยถาโยคํ, วเท อฏฺฐกถานยาฯ

[228]

มหคฺคตา กฺริยา สพฺพา, สกปุญฺญสมา ตหิํ;

อนฺตา ผลนฺติมํ โหติ, อยเมว วิเสสตาฯ

[229]

อิมสฺสานนฺตรา ธมฺมา, เอตฺตกาติ ปกาสิตา;

อิมํ ปเนตฺตเกหีติ, วุจฺจเตยํ นโยธุนาฯ

[230]

ทฺวีหิ กามชวา ตีหิ, รูปารูปา จตูหิ ตุ;

มคฺคา ฉหิ ผลาทิ ทฺเว, เสสา ทฺเว ปน สตฺตหิฯ

[231]

เอกมฺหา ทส ปญฺจหิ, ปฏิจฺฉา สุขตีรณํ;

กาเม โทสกฺริยาหีน-ชเวหิ คหโต สกาฯ

[232]

กาเม ชวา กฺริยาหีนา, ตทาลมฺพา สโวฏฺฐพฺพา;

สคหญฺเจติ เตตฺติํสจิตฺเตหิ ปรตีรณาฯ

[233]

กามปุญฺญสุขีตีรกณฺหโวฏฺฐพฺพโต ทฺวยํ;

มหาปากนฺติมํ โหติ, อนารุปฺปจุตีหิ จฯ

[234]

สตฺตติํส ปเนตานิ, เอตฺถ หิตฺวา ทุสทฺวยํ;

เอเตหิ ปญฺจติํเสหิ, ชายเต ทุติยทฺวยํฯ

[235]

สุขตีราทิ สตฺเตเต, กฺริยโต จาปิ สมฺภวา;

เญยฺยา เสสานิ จตฺตาริ, ภวงฺเคน จ ลพฺภเรฯ

[236]

มคฺควชฺชา สโวฏฺฐพฺพสุขิตีรชวาขิลา;

จุตีติ นวกฏฺฐาหิ, ตติยทฺวยมาทิเสฯ

[237]

เอเตหิ โทสวชฺเชหิ, สตฺตตีหิตรทฺวยํ;

รูปปากา วินารุปฺปปากาเหตุทุเหตุเกฯ

[238]

เตเหเวกูนสฏฺฐีหิ, โหนฺติรุปฺปาทิกํ วินา;

หาสาวชฺเช ชเว รูเป, อฏฺฐฉกฺเกหิ เตหิ ตุฯ

[239]

สาโธปาเกหิ เตเหว, ทุติยาทีนิ อตฺตนา;

อโธโธชวหีเนหิ, เอเกกูเนหิ ชายเรฯ

[240]

สุขตีรภวงฺคานิ, สยญฺจาติ ติสตฺตหิ;

อนฺตาวชฺชํ อนารุปฺปภวงฺเคหิ ปเนตรํฯ

[241]

วุตฺตานนฺตรสงฺขาโต, นโย ทานิ อเนกธา;

ปุคฺคลาทิปฺปเภทาปิ, ปวตฺติ ตสฺส วุจฺจเตฯ

[242]

ปุถุชฺชนสฺส ชายนฺเต, ทิฏฺฐิกงฺขายุตานิ เว;

เสกฺขสฺเสวามลา สตฺต, อนนฺตานิตรสฺส ตุฯ

[243]

อนฺตามลํ อนาวชฺชกฺริยา เจกูนวีสติ;

กุสลากุสลา เสสา, โหนฺติ เสกฺขปุถุชฺชเนฯ

[244]

อิตรานิ ปนาวชฺชทฺวยํ ปากา จ สาสวา;

ติณฺณนฺนมฺปิ สิยุํ เอวํ, ปญฺจธา สตฺตเภทโตฯ

[245]

กาเม โสฬส ฆานาทิตฺตยํ โทสมหาผลา;

รูปารูเป สปาโกติ, ปญฺจวีสติ เอกชาฯ

[246]

กามปากา จ เสสาทิมคฺโค อาทิกฺริยา ทุเว;

รูเป ชวาติ พาวีส, ทฺวิชา เสสา ติธาตุชาฯ

[247]

วิตฺถาโรปิ จ ภูมีสุ, เญยฺโย กามสุภาสุภํ;

หาสวชฺชมเหตุญฺจ, อปาเย สตฺตติํสิเมฯ

[248]

หิตฺวา มหคฺคเต ปาเก, อสีติ เสสกามิสุ;

จกฺขุโสตมโนธาตุ, ตีรณํ โวฏฺฐพฺพมฺปิ จฯ

[249]

โทสหีนชวา โส โส, ปาโก รูเป อนาริเย;

ปญฺจสฏฺฐิ ฉสฏฺฐี ตุ, ปริตฺตาภาทีสุ ตีสุฯ

[250]

อาทิปญฺจามลา กงฺขาทิฏฺฐิยุตฺเต วินา ตหิํ;

เตเยว ปญฺจปญฺญาส, ชายเร สุทฺธภูมิสุฯ

[251]

อาทิมคฺคทุสาหาสรูปหีนชวา สโก;

ปาโก โวฏฺฐพฺพนญฺจาติ, ติตาลีสํ สิยุํ นเภฯ

[252]

อโธโธมนวชฺชา เต,

ปาโก เจว สโก สโก;

ทุติยาทีสุ ชายนฺเต,

ทฺเว ทฺเว อูนา ตโต ตโตฯ

[253]

อรูเปสฺเวกเมกสฺมิํ , รูเปสฺวาทิตฺติเกปิ จ;

ติเก จ ตติเย เอกํ, ทฺเว โหนฺติ ทุติยตฺติเกฯ

[254]

อนฺติมํ รูปปากํ ตุ, ฉสุ เวหปฺผลาทิสุ;

กามสุคติยํเยว, มหาปากา ปวตฺตเรฯ

[255]

ฆายนาทิตฺตยํ กาเม, ปฏิฆทฺวยเมว จ;

สตฺตรเสสุ ปฐมํ, อมลํ มานวาทิสุฯ

[256]

อริยาปายวชฺเชสุ, จตุโรทิปฺผลาทิกา;

อปายารุปฺปวชฺเชสุ, หาสรูปสุภกฺริยํฯ

[257]

อปายุทฺธตฺตยํ หิตฺวา, โหตากาสสุภกฺริยํ;

ตถาปายุทฺธทฺเว หิตฺวา, วิญฺญาณกุสลกฺริยํฯ

[258]

ภวคฺคาปายวชฺเชสุ, อากิญฺจญฺญสุภกฺริยํ;

ทิฏฺฐิกงฺขายุตา สุทฺเธ, วินา สพฺพาสุ ภูมิสุฯ

[259]

อมลานิ จ ตีณนฺเต,

ภวคฺเค จ สุภกฺริยา;

มหากฺริยา จ โหนฺเตเต,

เตรเสวานปายิสุฯ

[260]

อนารุปฺเป มโนธาตุ, ทสฺสนํ สวตีรณํ;

กาเม อนิฏฺฐสํโยเค, พฺรหฺมานํ ปาปชํ ผลํฯ

[261]

โวฏฺฐพฺพํ กามปุญฺญญฺจ, ทิฏฺฐิหีนํ สอุทฺธวํ;

จุทฺทเสตานิ จิตฺตานิ, ชายเร ติํสภูมิสุฯ

[262]

อินฺทฺริยานิ ทุเว อนฺตทฺวยวชฺเชสฺวเหตุสุ;

ตีณิ กงฺเขตราเหตุปาเป จตฺตาริ เตรสฯ

[263]

ฉ ญาณหีเน ตพฺพนฺตสาสเว สตฺต นิมฺมเล;

จตฺตาลีเส ปนฏฺเฐวํ, เญยฺยมินฺทฺริยเภทโตฯ

[264]

ทฺเว พลานิ อเหตฺวนฺตทฺวเย ตีณิ ตุ สํสเย;

จตฺตาริตรปาเป ฉ, โหนฺติ เสสทุเหตุเกฯ

[265]

เอกูนาสีติจิตฺเตสุ, มติยุตฺเตสุ สตฺต ตุ;

อพลานิ หิ เสสานิ, วีริยนฺตํ พลํ ภเวฯ

[266]

อฌานงฺคานิ ทฺเวปญฺจ, ตกฺกนฺตา หิ ตทงฺคตา;

ฌาเน ปีติวิรตฺเต ต-ปฺปาทเก อมเล ทุเวฯ

[267]

ตติเย สามเล ตีณิ, จตฺตาริ ทุติเย ตถา;

กาเม นิปฺปีติเก จาปิ, ปญฺจงฺคานิ หิ เสสเกฯ

[268]

มคฺคา ทฺเว สํสเย ทิฏฺฐิหีนเสสาสุเภ ตโย;

ทุเหตุเกตเร สุทฺธชฺฌาเน จ ทุติยาทิเกฯ

[269]

จตฺตาโร ปญฺจ ปฐมฌานกามติเหตุเก;

สตฺตามเล ทุติยาทิ-ฌานิเก อฏฺฐ เสสเกฯ

[270]

เหตฺวนฺตโต หิ มคฺคสฺส, อมคฺคงฺคมเหตุกํ;

ฉมคฺคงฺคยุตํ นตฺถิ, พเลหิปิ จ ปญฺจหิฯ

[271]

สุขิตีรตทาลมฺพํ, อิฏฺเฐ ปุญฺญชุเปกฺขวา;

อิฏฺฐมชฺเฌตรํ โหติ, ตพฺพิปกฺเข ตุ โคจเรฯ

[272]

โทสทฺวยา ตทาลมฺพํ, น สุขิกฺริยโต ปน;

สพฺพํ สุภาสุเภ นฏฺเฐ, ตทาลมฺพณวาจโตฯ

[273]

กฺริยโต วา ตทาลมฺพํ, โสเปกฺขาย สุขี น หิ;

อิตรา อิตรญฺเจติ, อิทํ สุฏฺฐุปลกฺขเยฯ

[274]

สนฺธิทายกกมฺเมน, ตทาลมฺพปวตฺติยํ;

นิยามนํ ชวสฺสาห, กมฺมสฺเสวญฺญกมฺมโตฯ

[275]

จิตฺเต เจตสิกา ยสฺมิํ,

เย วุตฺตา เต สมาสโต;

วุจฺจเร ทานิ ทฺเวปญฺเจ,

สพฺพคา สตฺต ชายเรฯ

[276]

ตกฺกจาราธิโมกฺเขหิ, เตเยว ชายเร ทส;

ปญฺจฏฺฐานมโนธาตุ-ปญฺจเก สุขตีรเณฯ

[277]

เอเต ปีตาธิกา หาเส, วายาเมน จ ทฺวาธิกา;

โวฏฺฐพฺพเนปิ เอเตว, ทเสกา ปีติวชฺชิตาฯ

[278]

ปาปสาธารณา เต จ, ติปญฺจุทฺธจฺจสญฺญุเต;

กงฺขายุตฺเตปิ เอเตว, สกงฺขา หีนนิจฺฉยาฯ

[279]

กงฺขาวชฺชา ปเนเตว, สโทสจฺฉนฺทนิจฺฉยา;

สตฺตรส ทุเส โหนฺติ, สโลภนฺตทฺวเย ปนฯ

[280]

โทสวชฺชา สโลภา เต,

ตติยาทิทุเกสุ เต;

ทิฏฺฐิปีติทฺวยาธิกา,

ทฺวินเวกูนวีสติฯ

[281]

ปีติจารปฺปนาวชฺชา, อาทิโต ยาว ติํสิเม;

อุปฺปชฺชนฺติ จตุตฺถาทิ-รูปารูปมเนสุ เวฯ

[282]

ปีติจารวิตกฺเกสุ,

เอเกน ทฺวิติติกฺกมา;

ตติยาทีสุ เตเยว,

ติํเสกทฺเวตโยธิกาฯ

[283]

เอเตวาทิทฺวเย กาเม, ทุติยาทิทุเกสุ หิ;

มติํ ปีติํ มติปฺปีติํ, หิตฺวา เต กมโต สิยุํฯ

[284]

ฌาเน วุตฺตาว ตชฺฌานิกามเล วิรตาธิกา;

ตตฺเถตา นิยตา วิตฺติํ, วเท สพฺพตฺถ สมฺภวาฯ

[285]

กามปุญฺเญสุ ปจฺเจกํ,

ชยนฺตานิยเตสุ หิ;

วิรตีโย ทยาโมทา,

กาเม สาตสุภกฺริเยฯ

[286]

มชฺฌตฺเตปิ วทนฺเตเก, สเหตุกสุภกฺริเย;

สุขชฺฌาเนปิ ปจฺเจกํ, โหนฺติเยว ทยามุทาฯ

[287]

ถินมิทฺธํ สสงฺขาเร, ทิฏฺฐิหีนทฺวเย ตหิํ;

มาเนน วา ตโย เสสทิฏฺฐิหีเน วิเธกโกฯ

[288]

อิสฺสามจฺเฉรกุกฺกุจฺจา , วิสุํ โทสยุตทฺวเย;

ตตฺถนฺตเก สิยุํ ถินมิทฺธเกน ตโยปิ วาฯ

[289]

เย วุตฺตา เอตฺตกา เอตฺถ, อิติ เจตสิกาขิลา;

ตตฺเถตฺตเกสฺวิทนฺเตวํ, วุจฺจเตยํ นโยธุนาฯ

[290]

เตสฏฺฐิยา สุขํ ทุกฺขํ, ตีสุเปกฺขาปิ เวทนา;

ปญฺจปญฺญาสจิตฺเตสุ, ภเว อินฺทฺริยโต ปนฯ

[291]

เอกตฺเถกตฺถ เจว ทฺเวสฏฺฐิยา ทฺวีสุ ปญฺจหิ;

ปญฺญาสายาติ วิญฺเญยฺยํ, สุขาทินฺทฺริยปญฺจกํฯ

[292]

ทสุตฺตรสเต โหติ, นิจฺฉโย วีริยํ ตโต;

ปญฺจหีเน ตโตกูเน, สมาธินฺทฺริยมาทิเสฯ

[293]

ฉนฺโท เอกสเตกูนวีส สทฺธาทโย ปน;

ญาณวชฺชา นวหีนสเต โหนฺติ มตี ปนฯ

[294]

เอกูนาสีติยา จาโร, ฉสฏฺฐีสุ ปนปฺปนา;

ปญฺจปญฺญาสเก ปีติ, เอกปญฺญาสเก สิยาฯ

[295]

วิรตี ฉฏฺฐเก วีเส, กรุณามุทิตาถ วา;

อฏฺฐโสเปกฺขจิตฺเตน, อฏฺฐวีสติยา สิยุํฯ

[296]

อหีริกมโนตฺตปฺปโมหุทฺธจฺจา ทฺวาทเสว;

โลโภ อฏฺฐสุ จิตฺเตสุ, ถินมิทฺธํ ตุ ปญฺจสุฯ

[297]

มาโน จตูสุ ทิฏฺฐิ จ, ตถา ทฺวีสุ มเนสุ หิ;

โทโส อิสฺสา จ มจฺเฉรํ, กุกฺกุจฺจญฺจ ภวนฺติเมฯ

[298]

เอกสฺมิํ วิมตี โหติ, เอวํ วุตฺตานุสารโต;

อปฺปวตฺตินโย จาปิ, สกฺกา ญาตุํ วิชานตาฯ

[299]

อสฺมิํ ขนฺเธว วิญฺเญยฺโย, เวทนาทีสฺวยํ นโย;

เอกธาทิวิโธ ยุตฺติ-วสาเตนาวิโยคโตฯ

[300]

อุปมา เผณุปิณฺโฑ จ, พุพฺพุโฬ มิคตณฺหิกา;

กทลี มายา วิญฺเญยฺยา, ขนฺธานํ ตุ ยถากฺกมํฯ

[301]

เตสํ วิมทฺทาสหนขณโสภปฺปโลภน-

นิสารวญฺจกตฺเตหิ, สมานตฺตํ สมาหฏํฯ

[302]

เต สาสวา อุปาทานกฺขนฺธา ขนฺธาวนาสวา;

ตตฺถาที ทุกฺขวตฺถุตฺตา, ทุกฺขา ภารา จ ขาทกาฯ

[303]

ขนฺธานิจฺจาทิธมฺมา เต, วธกา สภยา อิตี;

อสุขทฺธมฺมโต จิกฺขา, อุกฺขิตฺตาสิกรี ยถาฯ

อิติ สจฺจสงฺเขเป วิญฺญาณกฺขนฺธปกิณฺณกนยสงฺเขโป นาม

จตุตฺโถ ปริจฺเฉโทฯ

5. ปญฺจโม ปริจฺเฉโท

นิพฺพานปญฺญตฺติปริทีปโน

[304]

ราคาทีนํ ขยํ วุตฺตํ, นิพฺพานํ สนฺติลกฺขณํ;

สํสารทุกฺขสนฺตาปตตฺตสฺสาลํ สเมตเวฯ

[305]

ขยมตฺตํ น นิพฺพานํ, สคมฺภีราทิวาจโต;

อภาวสฺส หิ กุมฺมานํ, โลมสฺเสว น วาจตาฯ

[306]

ขโยติ วุจฺจเต มคฺโค, ตปฺปาปตฺตา อิทํ ขยํ;

อรหตฺตํ วิยุปฺปาท-วยาภาวา ธุวญฺจ ตํฯ

[307]

สงฺขตํ สมฺมุติญฺจาปิ, ญาณมาลมฺพ เนว หิ;

ฉินฺเท มเล ตโต วตฺถุ, อิจฺฉิตพฺพมสงฺขตํฯ

[308]

ปตฺตุกาเมน ตํ สนฺติํ, ฉพฺพิสุทฺธิํ สมาทิย;

ญาณทสฺสนสุทฺธี ตุ, สาเธตพฺพา หิตตฺถินาฯ

[309]

เจตนาทิวิธา สีล-สุทฺธิ ตตฺถ จตุพฺพิธา;

โสปจารสมาธี ตุ, จิตฺตสุทฺธีติ วุจฺจเตฯ

[310]

สมฺปาเทตฺวาทิทฺเวสุทฺธิํ, นมนา นามํ ตุ รุปฺป-

โต รูปํ นตฺถิ อตฺตาทิวตฺถูติ จ ววตฺถเปฯ

[311]