อเหตุเก ปนฏฺฐาถ, ทเสกทฺวิตยาธิกา;
ทสปญฺจ ทฺวิเกกาติ, ภวนฺเตกูนวีสติฯ
[532]
ลพฺภมานานุสาเรน, ธมฺมานํ ปน สงฺคโห;
สกฺกา วุตฺตนเยเนว, วิญฺญาตุํ ปน วิญฺญุนาติฯ
อิติ เจตสิกวิภาเค ราสิสงฺคหกถา นิฏฺฐิตาฯ
ปนฺนรสโม ปริจฺเฉโทฯ
โสฬสโม ปริจฺเฉโท
16. จิตฺตุปฺปาทกถา
[533]
จิตฺตุปฺปาเทสุ ธมฺมานํ, อิติ ญตฺวา วินิจฺฉยํ;
จิตฺตุปฺปาทานเมวาถ, ญาตพฺโพ เภทสงฺคโหฯ
[534]
เวทนาหารโต เจว, เหตาธิปติโต ตถา;
ฌานินฺทฺริยมคฺคพลา, เยวาปนปถาทิโตฯ
[535]
ตตฺถ สุขา จ ทุกฺขา จ, อทุกฺขมสุขาติ จ;
ติสฺโส จ เวทนา วุตฺตา, สมฺโภคตฺถวิเสสโตฯ
[536]
สุขํ ทุกฺขํ โสมนสฺสํ, โทมนสฺสมถาปรํ;
อุเปกฺขินฺทฺริยมิจฺเจวํ, ปญฺจินฺทฺริยวิภาคโตฯ
[537]
กายวิญฺญาณยุคเฬ, สุขทุกฺขา หิ เวทนา;
โสมนสฺสํ โทมนสฺสํ, อิติ นามํ ลภนฺติ นฯ
[538]
อญฺญตฺถ ปน สพฺพตฺถ, สุขา ทุกฺขา จ เวทนา;
โสมนสฺสํ โทมนสฺสํ, อิติ นามํ ลภนฺติ จฯ
[539]
อทุกฺขิ อสุโขเปกฺขา, มชฺฌตฺตาติ จ เวทนา;
ปญฺจปญฺญาสจิตฺเตสุ, ตทญฺเญสุ ปกาสิตาฯ
[540]
สุขทุกฺขินฺทฺริยยุตฺตํ, กายวิญฺญาณกทฺวยํ;
โทมนสฺสินฺทฺริยยุตฺตํ, ปฏิฆทฺวยมานสํฯ
[541]
อฏฺฐารส ปริตฺตานิ, จตุกฺกชฺฌานมาทิโต;
โสมนสฺสินฺทฺริยยุตฺตา, ทฺวาสฏฺฐิวิธ มานสาฯ
[542]
ทฺวตฺติํส จ ปริตฺตานิ, เตวีส ฌานปญฺจมา;
โหนฺติเปกฺขินฺทฺริยยุตฺตา, ปญฺจปญฺญาส มานสาฯ
[543]
สุขยุตฺตา ตุ เตสฏฺฐิ, ทุกฺขยุตฺตา ตโย ตหิํ;
อทุกฺขมสุขยุตฺตา, ปญฺจปญฺญาสุเปกฺขกาฯ
[544]
โอชฏฺฐมกรูปญฺจ, เวทนํ สนฺธิมานสํ;
นามรูปญฺจ กมโต, อาหรนฺตีติ เทสิตาฯ
[545]
อาหารา กพฬีกาโร, ผสฺโส สญฺเจตนา ตถา;
วิญฺญาณญฺเจติ จตฺตาโร, อุปตฺถมฺภา จ สมฺภวาฯ
[546]
จิตฺตุปฺปาเทสุ สพฺพตฺถ,
อาหารารูปิโน ตโย;
กพฬีกาโร อาหาโร,
กาเม กายานุปาลโกฯ
[547]
อโลโภ จ อโทโส จ,
อโมโห จ ตถาปโร;
โลโภ โทโส จ โมโห จ,
เหตู ธมฺมา ฉ เทสิตาฯ
[548]
กุสลากุสลา เหตู, ตโย อพฺยากตาติ จ;
นวทฺวาทสธา ตตฺถ, วิปากกฺริยเภทโตฯ
[549]
ทส ปญฺจาธิกา โหนฺติ, ภูมิเภทา ตโต ตหิํ;
ปุญฺญปากกฺริยาเภทา, ตาลีส จตุนูนกาฯ
[550]
สนฺตีรณมโนธาตุ-ปญฺจวิญฺญาณมานเส;
โวฏฺฐพฺพเน จ หสิเต, เหตุ นาม น วิชฺชติฯ
[551]
โลภมูเลสุ โลโภ จ,
โมโห จ ปฏิฆทฺวเย;
โทโส โมโห จ ลพฺภนฺติ,
โมโห เอโกว โมมุเหฯ
[552]
ญาเณน วิปฺปยุตฺเตสุ,
อโลภาทิทฺวยํ ภเว;
ตโต เสเสสุ สพฺพตฺถ,
อโลภาทิตโยปิ จฯ
[553]
ติเหตุกา สตฺตจตฺตา-ลีส โหนฺติ ทฺวิเหตุกา;
พาวีส ทฺเวกเหตุกา, อฏฺฐารส อเหตุกาฯ
[554]
ฉนฺโท จิตฺตญฺจ วีริยํ, วีมํสาติ จตุพฺพิธา;
สหชาตาธิปา ธมฺมา, วุตฺตาธิปตโย สิยุํฯ
[555]
ยมาลมฺพํ ครุํ กตฺวา, นามธมฺมา ปวตฺตเร;
อารมฺมณาธิปนาเมน, ตทาลมฺพณมีริตํฯ
[556]
ติเหตุกชเวสฺเวโก, จตูสุปิ ยถารหํ;
ทฺวิเหตุเกสุ สมฺโภติ, วีมํสาธิปติํ วินาฯ
[557]
อนุตฺตเร กามปุญฺเญ, ติเหตุกมหากฺริเย;
โลภมูเล จ สาวชฺเช, ลพฺภตาลมฺพณาธิโปฯ
[558]
ตตฺถ จานิยตา กาเม, ลพฺภมานาปิ ลพฺภเร;
มหคฺคตานุตฺตเรสุ, นิยตาว ยถารหํฯ
[559]
กฺริยาทฺวิเหตุปฏิเฆ ,
นตฺเถวาลมฺพณาธิโป;
โมมูหาเหตุเก ปาเก,
โลกิเย จ น โกจิปิฯ
[560]
อุภยาธิปยุตฺตา จ, สหชาธิปโยคิโน;
อุภยานิยตาธิปฺปา, สหชานิยตาธิปาฯ
[561]
อุภยวิปฺปยุตฺตา จ, ปญฺจธา ตตฺถ มานสา;
อฏฺฐฏฺฐารส วีสํ ฉ, สตฺตติํส ยถากฺกมํฯ
[562]
ปญฺจาธิปติโยคา จ, จตุราธิปโยคิโน;
ติวิธาธิปยุตฺตา จ, วิมุตฺตาปิ จ สพฺพถาฯ
[563]
โสฬสาถ สมตฺติํส, ฉเฬวาถ ยถากฺกมํ;
สตฺตติํสติวิธาติ, จตุเธวมฺปิ นิทฺทิเสฯ
[564]
วีมํสาธิปยุตฺตา จ, สหชาธิปโยคิโน;
อาลมฺพาธิปยุตฺตา จ, วิปฺปมุตฺตาปิ สพฺพถาฯ
[565]
จตุตฺติํส ทฺวิปญฺญาส, อฏฺฐวีส ยถากฺกมํ;
สตฺตติํสติ เจเวติ, จตุเธวมฺปิ นิทฺทิเสฯ
[566]
สหชาธิปลทฺธา ตุ, ทฺเวปญฺญาเสว สพฺพถา;
อาลมฺพาธิปลทฺธา จ, อุภยาธิปลาภิโนฯ
[567]
อฏฺฐวีเสว สพฺเพปิ, ทฺเวปญฺญาเสว สาธิปา;
เสสา นิราธิปา สพฺเพ, สตฺตติํสาปิ สพฺพถาฯ
[568]
เวทนาทิวเสเนวํ, ญตฺวา เภทํ จตุพฺพิธํ;
ฌานินฺทฺริยมคฺคพล-วเสนาปิ วิภาวเยฯ
[569]
วิตกฺกเหฏฺฐิมํ ฌานํ, มโนปรํ มนินฺทฺริยํ;
เหตุปรญฺจ มคฺคงฺคํ, พลํ วีริยปจฺฉิมํฯ
[570]
อวิตกฺเก ปกติยา, ตสฺมา ฌานํ น วิชฺชติ;
อเหตุเก จ มคฺคงฺคํ, พลญฺจาวีริเย ยถาฯ
[571]
อฏฺฐ รูปินฺทฺริยาเนตฺถ, อคยฺหนฺเตว สพฺพถา;
มคฺคินฺทฺริยพลฏฺเฐสุ, สมาธิ จ น กงฺขิเตฯ
[572]
กามปุญฺเญสฺวนิยตา, วิรตีปิ อนุทฺธตา;
ปญฺญานุตฺตรจิตฺเตสุ, อินฺทฺริยตฺตยภาชิตาฯ
[573]
เสสา วุตฺตานุสาเรน, ลพฺภมานชฺฌานาทิกา;
เตหิ ยุตฺตา จ วิญฺเญยฺยา, จิตฺตุปฺปาทา ยถากฺกมํฯ
[574]
โสมนสฺสยุตฺตา กาเม, โลกุตฺตรมหคฺคเต;
ปฐมชฺฌานจิตฺตา จ, ปญฺจฌานงฺคิกา มตาฯ
[575]
ทุกฺขุเปกฺขายุตฺตา กาเม, ปญฺจวิญฺญาณวชฺชิตา;
ทุติยชฺฌานจิตฺตา จ, จตุฌานงฺคิกา สิยุํฯ
[576]
ฌานงฺคตฺตยสํยุตฺตา, ตติยชฺฌานมานสา;
จตุตฺถปญฺจมารุปฺปา, ฌานงฺคทฺวยโยคิโนฯ
[577]
ปญฺจวิญฺญาณยุคเฬ, ฌานงฺคํ นตฺถิ กิญฺจิปิ;
อิตฺถํ ฌานานํ เภเทน, ปญฺจธา มานสา ฐิตาฯ
[578]
เอกูนติํสติ สตฺต-ติํส เจกาทสาปเร;
จตุตฺติํส ทเสวาถ, คณิกา ตุ ยถากฺกมํฯ
[579]
โลกุตฺตเรสุ สพฺเพสุ, อินฺทฺริยานิ นวุจฺจเร;
ติเหตุเกสุ สพฺเพสุ, โลกิเยสุ ปนฏฺฐธาฯ
[580]
ญาเณน วิปฺปยุตฺเตสุ, สตฺตธาว สมุทฺธเร;
สิตโวฏฺฐพฺพนา ปุญฺเญ, ปญฺจธาว ปกาสเยฯ
[581]
วิจิกิจฺฉาสหคเต, จตุธาว วินิทฺทิเส;
ตีณินฺทฺริยานิ วุตฺตานิ, เสสาเหตุกมานเสฯ
[582]
อฏฺฐ เจกูนตาลีส, ทฺวาทส วาถ เตรส;
เอกญฺจ โสฬส เจติ, ฉพฺพิธา ตตฺถ สงฺคโหฯ
[583]
ปฐมานุตฺตรํ ฌานํ, อฏฺฐมคฺคงฺคิกํ มตํ;
สตฺตมคฺคงฺคิกํ นาม, เสสํ ฌานมนุตฺตรํฯ
[584]
โลกิยํ ปฐมํ ฌานํ, ตถา กาเม ติเหตุกํ;
ปญฺจมคฺคงฺคิกา นาม, จิตฺตุปฺปาทา ปกาสิตาฯ
[585]
เสสํ มหคฺคตํ ฌานํ, สมฺปยุตฺตา จ ทิฏฺฐิยา;
ญาเณน วิปฺปยุตฺตา จ, จตุมคฺคงฺคิกา มตาฯ
[586]
โทสมูลทฺวยญฺเจว, อุทฺธจฺจสหิตํ ตถา;
ทิฏฺฐิยา วิปฺปยุตฺตา จ, มคฺคงฺคตฺตยโยคิโนฯ
[587]
วิจิกิจฺฉาสมฺปยุตฺโต , วุตฺโต มคฺโค ทุวงฺคิโก;
อมคฺคาเหตุโก เจติ, สตฺตธา ตตฺถ สงฺคโหฯ
[588]
อฏฺฐ ทฺวตฺติํสติ เจว, ทส ปญฺจาธิกาปเร;
ตาลีส กมโต สตฺต, เอกญฺจฏฺฐทสาปเรฯ
[589]
พลานิ ปน สตฺเตว, สพฺพตฺถาปิ ติเหตุเก;
ญาเณน วิปฺปยุตฺเตสุ, ฉ พลานิ สมุทฺทิเสฯ
[590]
จตุธากุสเล โหนฺติ, ติวิธา กงฺขิเต ปน;
ทฺวิพลํ สิตโวฏฺฐพฺพํ, อพลํ เสสมีริตํฯ
[591]
ฉพฺพิโธ สงฺคโห ตตฺถ, สตฺตตาลีสถาปเร;
ทฺวาทเสกาทเสกํ ทฺเว, โสฬเสติ ยถากฺกมํฯ
[592]
อิตฺถํ ปญฺจ ฉ สตฺต ฉ-โกฏฺฐาสา กมโต ฐิตา;
จตุวีสติ สพฺเพปิ, ฌานงฺคาทิวสา กถาฯ
อิติ เจตสิกวิภาเค จิตฺตุปฺปาทกถา นิฏฺฐิตาฯ
โสฬสโม ปริจฺเฉโทฯ
สตฺตรสโม ปริจฺเฉโท
17. ทิฏฺฐิสงฺคหกถา
[593]
เยวาปนกนาเมน , ธมฺมา ฉนฺทาทโย ตถา;
ขนฺธาทโย จ โกฏฺฐาสา, อุทฺทิฏฺฐา หิ ยถารหํฯ
[594]
ตตฺถ ฉนฺทาทโย ธมฺมา, วิภตฺตาว ยถารหํ;
ขนฺธาทิราสโย วาปิ, วิญฺเญยฺยา ทานิ สมฺภวาฯ
[595]
เวทนา เวทนากฺขนฺโธ, จกฺขุสมฺผสฺสชาทิกา;
สญฺญา จ สญฺญากฺขนฺโธติ, ฉพฺพิธาปิ ปกาสิตาฯ
[596]
สงฺขารกฺขนฺธนาเมน, เสสา เจตสิกา มตา;
วุตฺตา วิญฺญาณกายา ฉ, วิญฺญาณกฺขนฺธนามโตฯ
[597]