ฉนฺทาธิโมกฺขวีริยา , สทฺธาเทกูนวีสติ;

ผสฺสาทโย ฉเฬวาติ, น จลนฺตฏฺฐวีสติฯ

[351]

เตรเสว ตุ สาวชฺเช, ฉเฬวาเหตุมานเส;

น จลนฺติ ทส อญฺเญ, จุทฺทสา ฉ จ สมฺภวาติฯ

อิติ เจตสิกวิภาเค เจตสิกสงฺคหกถา นิฏฺฐิตาฯ

นวโม ปริจฺเฉโทฯ

ทสโม ปริจฺเฉโท

10. ปเภทกถา

[352]

เอกุปฺปาทา นิโรธา จ, เอกาลมฺพณวตฺถุกา;

สหคตา สหชาตา, สํสฏฺฐา สหวุตฺติโนฯ

[353]

เตปญฺญาส ปนิจฺเจเต, สมฺปยุตฺตา ยถารหํ;

จิตฺตเจตสิกา ธมฺมา, อฏฺฐารสวิธาปิ จฯ

[354]

เอกธา ฉพฺพิธา เจว, จตุธา สตฺตธา ฐิตา;

จิตฺตุปฺปาทปเภเทน, ภินฺทิตพฺพา วิภาวินาฯ

[355]

อฏฺฐ ธมฺมาวินิพฺโภคา, ภินฺนาสีติ นวุตฺตรา;

สตฺตสตํ ทส ทฺเว จ, สพฺเพ โหนฺติ สมิสฺสิตาฯ

[356]

สนฺตีรณมโนธาตุ, สิตโวฏฺฐพฺพนา ตถา;

อปุญฺญา กามปุญฺญา จ, มหาปากา มหากฺริยาฯ

[357]

ปฐมชฺฌานธมฺมา จ, โลกุตฺตรมหคฺคตา;

ปญฺจปญฺญาส สพฺเพปิ, วิตกฺกา โหนฺติ เภทิตาฯ

[358]

วิจาราปิ จ เตเยว, ทุติยชฺฌานนามกา;

เอกาทสาปเร เจติ, ฉสฏฺฐิ ปริทีปิตาฯ

[359]

อปุญฺญา กามปุญฺญา จ, มหาปากา มหากฺริยา;

จตุกฺกา เจว จตฺตาโร, สิตญฺจ สุขตีรณํฯ

[360]

ปฐมาทิติกชฺฌานา , โลกุตฺตรมหคฺคตา;

อิจฺเจวเมกปญฺญาส, ปีติโย โหนฺติ สพฺพถาฯ

[361]

สิตโวฏฺฐพฺพนา ทฺเว จ, สาวชฺชา จานวชฺชกา;

ภินฺนเมวํ ตุ วีริยํ, เตสตฺตติวิธํ ภเวฯ

[362]

สาวชฺชา จานวชฺชา จ, โมมูหทฺวยวชฺชิตา;

ฉนฺทา ภวนฺติ สพฺเพปิ, สฏฺฐิเภทา นวุตฺตราฯ

[363]

สนฺตีรณมโนธาตุ, สิตโวฏฺฐพฺพนา ตถา;

สาวชฺชา จานวชฺชา จ, วิจิกิจฺฉาวิวชฺชิตาฯ

[364]

อธิโมกฺขา ปนิจฺเจวํ, อฏฺฐสตฺตติ เภทิตา;

ติสตํ นวุติ ทฺเว จ, ภินฺนา โหนฺติ ปกิณฺณกาฯ

[365]

เอกูนสฏฺฐิ วา โหนฺติ, สทฺธาเทกูนวีสติ;

สหสฺสญฺจ สตญฺเจกํ, เอกวีสญฺจ สพฺพถาฯ

[366]

ญาเณน สมฺปยุตฺตา จ, กาเม ทฺวาทสธาปเร;

ปญฺจติํสาติ ปญฺญาปิ, สตฺตตาลีสธา กถาฯ

[367]

รูปชฺฌานจตุกฺกา จ, กามปุญฺญา มหากฺริยา;

อฏฺฐวีสปฺปมญฺเญวํ, ฉปฺปญฺญาส ภวนฺติ จฯ

[368]

อนุตฺตรา กามปุญฺญา, ติสฺโส วิรติโย ปน;

โหนฺติ โสฬสธา ภินฺนา, อฏฺฐตาลีส ปิณฺฑิตาฯ

[369]

ปญฺจวีสานวชฺเชวํ, สมฺปยุตฺตา จตุพฺพิธา;

สหสฺสทฺวิสตญฺเจว, ทฺวิ จ สตฺตติ เภทโตฯ

[370]

จตฺตาโร ปาปสามญฺญา, ภินฺนา ทฺวาทสธา ปน;

อฏฺฐตาลีสธา โหนฺติ, เต สพฺเพ ปริปิณฺฑิตาฯ

[371]

โลโภ ปนฏฺฐธา ภินฺโน, ถินมิทฺธญฺจ ปญฺจธา;

จตุธา ทิฏฺฐิมาโน จ, จตุธา ทิฏฺฐิโย วิสุํฯ

[372]

ทฺวิธา โทสาทิจตฺตาโร, วิจิกิจฺเฉกธาติ จ;

สาวชฺชา สตฺตธา วุตฺตา, ภินฺนาสีติ ติกุตฺตราฯ

[373]

อิจฺจฏฺฐารสธา วุตฺตา, เตปญฺญาสาปิ เภทโต;

ทฺวิสหสฺสญฺจ ตุ สตํ, ภวนฺเตกูนสฏฺฐิ จฯ

[374]

วิตกฺกวิจารปีติสุโขเปกฺขาสุ ปญฺจสุ;

ภินฺทิตฺวา ฌานเภเทน, คเหตพฺพา อนุตฺตราฯ

[375]

อญฺญตฺร ปน สพฺพตฺถ, นตฺถิ เภทปฺปโยชนํ;

อฏฺเฐว กสฺมา คยฺหนฺติ, อเภเทนาติ ลกฺขเยฯ

[376]

ปฐมาทิจตุชฺฌานา, โลกุตฺตรมหคฺคตา;

อิจฺเจกเมกทสธา, จตุตาลีส ปิณฺฑิตาฯ

[377]

เตวีส ปญฺจมา เจติ, สตฺตสฏฺฐิ สมิสฺสิตา;

อปฺปนา ตตฺถ สพฺพาปิ, อฏฺฐปญฺญาส ทีปิตาฯ

[378]

ปญฺจติํเสว สงฺเขปา, โลกุตฺตรมหคฺคตา;

อปฺปนา ตตฺถ สพฺพาปิ, ฉพฺพีสติ ปกาสิตาฯ

[379]

อิทฺธิวิธํ ทิพฺพโสตํ, เจโตปริยนามกา;

ปุพฺเพนิวาสานุสฺสติ, ทิพฺพจกฺขูติ ปญฺจธาฯ

[380]

อภิญฺญาญาณมีเรนฺติ, รูปาวจรปญฺจมา;

กุสลญฺจ กฺริยา เจติ, เภทิตํ ทุวิธมฺปิ จฯ

[381]

ตํ ทฺวยมฺปิ สมฺมิสฺเสตฺวา, ปญฺจาภิญฺญา จ โลกิยา;

อาสวกฺขยญาณญฺจ, ฉฬภิญฺญา ปวุจฺจเรฯ

[382]

โลกิยา จ ทสาภิญฺญา, ภินฺทิตฺวา กุสลกฺริยา;

สตฺตสตฺตติ ฌานานิ, อฏฺฐสฏฺฐิ ปนปฺปนาฯ

[383]

สตฺตสตฺตติ จิตฺตานิ, จตุปญฺญาส สพฺพถา;

ปจิตานิ จ จิตฺตานิ, เอกติํสสตํ สิยุนฺติฯ

อิติ เจตสิกวิภาเค ปเภทกถา นิฏฺฐิตาฯ

ทสโม ปริจฺเฉโทฯ

เอกาทสโม ปริจฺเฉโท