7. ภูมิปุคฺคลสมฺภวกถา
[270]
ทฺวิเหตุกาเหตุกานํ , น สมฺปชฺชติ อปฺปนา;
อรหตฺตญฺจ นตฺถีติ, นตฺเถว ชวนกฺริยาฯ
[271]
ญาณปากา น วตฺตนฺติ, ชฬตฺตา มูลสนฺธิยา;
ทฺวิเหตุกตทาลมฺพํ, สิยา สุคติยํ น วาฯ
[272]
ติเหตุกานํ สตฺตานํ, สมถญฺจ วิปสฺสนํ;
ภาเวนฺตานํ ปวตฺตนฺติ, ฉพฺพีสติปิ อปฺปนาฯ
[273]
อรหนฺตาน สตฺตานํ, ภวนฺติ ชวนกฺริยา;
ยถาภูมินิยาเมน, ญาณปากา จ ลพฺภเรฯ
[274]
วชฺฌา ปฐมมคฺเคน, กงฺขาทิฏฺฐิยุตา ปน;
ปฏิฆํ ตติเยเนว, กมฺมมนฺเตน สาสวํฯ
[275]
ตสฺมา เตสํ น วตฺตนฺติ, ตานิ จิตฺตานิ สพฺพถา;
มคฺคฏฺฐานํ ตุ มคฺโคว, นาญฺญํ สมฺโภติ กิญฺจิปิฯ
[276]
อเหตุกวิปากานิ, ลพฺภมานาย วีถิยา;
สพฺพถาปิ จ สพฺเพสํ, สมฺภวนฺติ ยถารหํฯ
[277]
ปญฺจทฺวาเร มโนทฺวาเร, ธุวมาวชฺชนทฺวยํ;
ปริตฺตปุญฺญาปุญฺญานิ, ลพฺภนฺติ ลหุวุตฺติโตฯ
[278]
กฺริยาชวนมปฺปนา, นตฺถาปาเยสุ การณํ;
นตฺถิ สเหตุกา ปากา, ทุคฺคตตฺตา หิ สนฺธิยาฯ
[279]
พฺรหฺมานํ ปฏิฆํ นตฺถิ, ฌานวิกฺขมฺภิตํ ตถา;
เหฏฺฐาฌานํ วิรตฺตตฺตา, น ภาเวนฺติ อรูปิโนฯ
[280]
ปุพฺเพว ทิฏฺฐสจฺจาว, อริยารูปภูมกา;
ตสฺมาทิมคฺโค นตฺเถตฺถ, กายาภาวา สิตํ ตถาฯ
[281]
สุทฺธาวาสาปิ ปตฺตาว, เหฏฺฐานุตฺตรปญฺจกํ;
สตฺตปาปปหีนา จ, ตสฺมา นตฺเถตฺถ ตานิ จฯ
[282]
ปญฺจทฺวาริกจิตฺตานิ , ทฺวาราภาเว น วิชฺชเร;
สเหตุกวิปากา จ, ยถาภูมิววตฺถิตาฯ
[283]
สมฺภวาสมฺภวญฺเจวํ, ญตฺวา ปุคฺคลภูมิสุ;
ลพฺภมานวสา ตตฺถ, จิตฺตสงฺคหมุทฺทิเสฯ
[284]
กุสลาทิปฺปเภทา จ, ตถา ภูมาทิเภทโต;
วตฺถุทฺวารารมฺมณโต, ภูมิปุคฺคลโตปิ จฯ
[285]
วิภาโค โย สมุทฺทิฏฺโฐ,
จิตฺตานญฺจ ตุ สมฺภวา;
เญยฺโย เจตสิกานญฺจ,
สมฺปโยคานุสารโตติฯ
อิติ จิตฺตวิภาเค ภูมิปุคฺคลสมฺภวกถา นิฏฺฐิตาฯ
สตฺตโม ปริจฺเฉโทฯ
นิฏฺฐิโต จ จิตฺตวิภาโคฯ
อฏฺฐโม ปริจฺเฉโท
2. เจตสิกวิภาโค
8. เจตสิกสมฺปโยคกถา
[286]
อิติ จิตฺตวิธิํ ญตฺวา, ทฺเวปญฺญาส วิภาวินา;
เญยฺยา เจตสิ สมฺภูตา, ธมฺมา เจตสิกา กถํฯ
[287]
ผสฺโส จ เวทนา สญฺญา, เจตเนกคฺคตา ตถา;
ชีวิตํ มนสิกาโร, สตฺต สาธารณา อิเมฯ
[288]
วิตกฺโก จ วิจาโร จ, ปีติ จ วีริยํ ตถา;
ฉนฺโท จ อธิโมกฺโข จ, ฉ ปกิณฺณกนามกาฯ
[289]
ปุญฺญาปุญฺเญสุ ปาเกสุ, กฺริยาสุ จ ยถารหํ;
มานเสสุ ปวตฺตนฺติ, วิปฺปกิณฺณา ปกิณฺณกาฯ
[290]