เอตฺตาวตา กุสลากุสลวิปากกิริยเภทภินฺเนน เอกูนนวุติยา จิตฺเตน สมฺปยุตฺตา เจตสิกา นิทฺทิฏฺฐา โหนฺติฯ
[87]
กุสลากุสเลหิ วิปากกฺริยา-
หทเยหิ ยุตา ปน เจตสิกา;
สกลาปิ จ สาธุ มยา กถิตา,
สุคเตน มหามุนินา กถิตาฯ
[88]
อวคจฺฉติ โย อิมํ อนุนํ,
ปรมํ ตสฺส สมนฺตโต มติ;
อภิธมฺมนเย ทูราสเท,
อติคมฺภีรฐาเน วิชมฺภเตฯ
อิติ อภิธมฺมาวตาเร เจตสิกนิทฺเทโส นาม
ทุติโย ปริจฺเฉโทฯ
3. ตติโย ปริจฺเฉโท
เจตสิกวิภาคนิทฺเทโส
[89]
สพฺเพ เจตสิกา วุตฺตา, พุทฺเธนาทิจฺจพนฺธุนา;
นามสามญฺญโตเยว, ทฺเวปญฺญาส ภวนฺติ เตฯ
เสยฺยถิทํ – ผสฺโส เวทนา สญฺญา เจตนา วิตกฺโก วิจาโร ปีติ จิตฺเตกคฺคตา วีริยํ ชีวิตํ ฉนฺโท อธิโมกฺโข มนสิกาโร ตตฺรมชฺฌตฺตตา สทฺธา สติ หิรี โอตฺตปฺปํ อโลโภ อโทโส อโมโห กายปฺปสฺสทฺธิอาทีนิ ฉ ยุคานิ, ติสฺโส วิรติโย, กรุณา มุทิตา โลโภ โทโส โมโห อุทฺธจฺจํ มาโน ทิฏฺฐิ อิสฺสา มจฺฉริยํ กุกฺกุจฺจํ ถินํ มิทฺธํ วิจิกิจฺฉา อหิริกํ อโนตฺตปฺปญฺจาติฯ
[90]
จตุปญฺญาสธา กาเม, รูเป ปญฺจทเสริตา;
เต โหนฺติ ทฺวาทสารูเป, จตฺตาลีสมนาสวาฯ
[91]
เอกวีสสตํ สพฺเพ, จิตฺตุปฺปาทา สมาสโต;
เอเตสุ เตสมุปฺปตฺติํ, อุทฺธริตฺวา ปเนกกํฯ
[92]
ผสฺสาทีนํ ตุ ธมฺมานํ, ปวกฺขามิ อิโต ปรํ;
ปาฏวตฺถาย ภิกฺขูนํ, จิตฺตเจตสิเกสฺวหํฯ
[93]
เอกคฺคตา มนกฺกาโร, ชีวิตํ ผสฺสปญฺจกํ;
อฏฺเฐเต อวินิพฺโภคา, เอกุปฺปาทา สหกฺขยาฯ
[94]
ผสฺโส จ เวทนา สญฺญา, เจตนา ชีวิตินฺทฺริยํ;
เอกคฺคตา มนกฺกาโร, สพฺพสาธารณา อิเมฯ
[95]
วิตกฺโก ปญฺจปญฺญาส-จิตฺเตสุ สมุทีริโต;
จาโร ฉสฏฺฐิจิตฺเตสุ, ชายเต นตฺถิ สํสโยฯ
[96]
เอกปญฺญาสจิตฺเตสุ , ปีติ เตสฏฺฐิยา สุขํ;
อุเปกฺขา ปญฺจปญฺญาส-จิตฺเต ทุกฺขํ ตุ ตีสุ หิฯ
[97]
โหติ ทฺวาสฏฺฐิจิตฺเตสุ, โสมนสฺสินฺทฺริยํ ปน;
ทุกฺขินฺทฺริยํ ปเนกสฺมิํ, ตเถกมฺหิ สุขินฺทฺริยํฯ
[98]
ปญฺจุตฺตรสเต จิตฺเต, วีริยํ อาห นายโก;
จตุตฺตรสเต จิตฺเต, สมาธินฺทฺริยมพฺรวิฯ
[99]
สพฺพาเหตุกจิตฺตานิ, ฐเปตฺวา เจกเหตุเก;
เอกุตฺตรสเต จิตฺเต, ฉนฺทสฺสุปฺปตฺติมุทฺทิเสฯ
[100]
ฐเปตฺวา ทส วิญฺญาเณ, วิจิกิจฺฉายุตมฺปิ จ;
ทสุตฺตรสเต จิตฺเต, อธิโมกฺโข อุทีริโตฯ
[101]
สทฺธา สติ หิโรตฺตปฺปํ, อโลภาโทสมชฺฌตา;
ฉเฬว ยุคฬา จาติ, ธมฺมา เอกูนวีสติฯ
[102]
เอกนวุติยา จิตฺเต, ชายนฺติ นิยตา อิเม;
อเหตุเกสุ จิตฺเตสุ, อปุญฺเญสุ น ชายเรฯ
[103]
เอกูนาสีติยา จิตฺเต, ปญฺญา ชายติ สพฺพทา;
อฏฺฐวีสติยา จิตฺเต, กรุณามุทิตา สิยุํฯ
[104]
กามาวจรปุญฺเญสุ, สพฺพโลกุตฺตเรสุ จ;
จตฺตาลีสวิเธ จิตฺเต, สาฏฺฐเก วิรติตฺตยํฯ
[105]
สทฺธา สติ หิโรตฺตปฺปํ, อโลภาทิตฺตยมฺปิ จ;
ยุคฬานิ ฉ มชฺฌตฺตํ, กรุณามุทิตาปิ จฯ
[106]
ตถา วิรติโย ติสฺโส, สพฺเพ เต ปญฺจวีสติ;
กุสลาพฺยากตา จาปิ, กุสเลน ปกาสิตาฯ
[107]
อหิรีกมโนตฺตปฺปํ, โมโห อุทฺธจฺจเมว จ;
ทฺวาทสาปุญฺญจิตฺเตสุ, นิยตาเยว ชายเรฯ
[108]
โลโภ โทโส จ โมโห จ, มาโน ทิฏฺฐิ จ สํสโย;
มิทฺธมุทฺธจฺจกุกฺกุจฺจํ, ถินํ มจฺฉริยมฺปิ จฯ
[109]
อหิรีกมโนตฺตปฺปํ, อิสฺสา จ โทมนสฺสกํ;
เอเต อกุสลา วุตฺตา, เอกนฺเตน มเหสินาฯ
[110]
โลโภ อฏฺฐสุ นิทฺทิฏฺโฐ, วุตฺตา จตูสุ ทิฏฺฐิตุ;
มาโน ทิฏฺฐิวิยุตฺเตสุ, โทโสทฺวีสฺเวว ชายเตฯ
[111]
อิสฺสามจฺเฉรกุกฺกุจฺจา, ทฺวีสุ ชายนฺติ โน สห;
วิจิกิจฺฉา ปเนกสฺมิํ, ถินมิทฺธํ ตุ ปญฺจสุฯ
[112]
ผสฺโส จ เวทนา สญฺญา, เจตนา ชีวิตํ มโน;
วิตกฺโก จ วิจาโร จ, ปีติ วีริยสมาธิ จฯ
[113]
ฉนฺโท เจวาธิโมกฺโข จ, มนสิกาโร จ จุทฺทส;
กุสลากุสลา เจว, โหนฺติ อพฺยากตาปิ จฯ
[114]
เอกูนติํสจิตฺเตสุ, ฌานํ ปญฺจงฺคิกํ มตํ;
จตุฌานงฺคยุตฺตานิ, สตฺตติํสาติ นิทฺทิเสฯ
[115]
เอกาทสวิธํ จิตฺตํ, ติวงฺคิกมุทีริตํ;
จตุติํสวิธํ จิตฺตํ, ทุวงฺคิกมุทีริตํฯ
[116]
สภาเวนาวิตกฺเกสุ , ฌานงฺคานิ น อุทฺธเร;
สพฺพาเหตุกจิตฺเตสุ, มคฺคงฺคานิ น อุทฺธเรฯ
[117]
ตีณิ โสฬสจิตฺเตสุ, อินฺทฺริยานิ วเท พุโธ;
เอกสฺมิํ ปน จตฺตาริ, ปญฺจ เตรสสุทฺธเรฯ
[118]
สตฺต ทฺวาทสจิตฺเตสุ, อินฺทฺริยานิ ชิโนพฺรวิ;
เอเกนูเนสุ อฏฺเฐว, จตฺตาลีสมเนสุ จฯ
[119]
จตฺตาลีสาย จิตฺเตสุ, นวกํ นายโกพฺรวิ;
เอวํ อินฺทฺริยโยโคปิ, เวทิตพฺโพ วิภาวินาฯ
[120]
อมคฺคงฺคานิ นาเมตฺถ, อฏฺฐารส อเหตุกา;
ฌานงฺคานิ น วิชฺชนฺติ, วิญฺญาเณสุ ทฺวิปญฺจสุฯ
[121]
เอกํ จิตฺตํ ทุมคฺคงฺคํ, ติมคฺคงฺคานิ สตฺตสุ;
จตฺตาลีสาย จิตฺเตสุ, มคฺโค โส จตุรงฺคิโกฯ
[122]
ปญฺจทฺทสสุ จิตฺเตสุ, มคฺโค ปญฺจงฺคิโก มโต;
วุตฺโต ทฺวตฺติํสจิตฺเตสุ, มคฺโค สตฺตงฺคิโกปิ จฯ
[123]
มคฺโค อฏฺฐสุ จิตฺเตสุ, มโต อฏฺฐงฺคิโกติ หิ;
เอวํ ตุ สพฺพจิตฺเตสุ, มคฺคงฺคานิ สมุทฺธเรฯ
[124]
พลานิ ทฺเว ทฺวิจิตฺเตสุ, เอกสฺมิํ ตีณิ ทีปเย;
เอกาทสสุ จตฺตาริ, ฉ ทฺวาทสสุ นิทฺทิเสฯ
[125]
เอกูนาสีติยา สตฺต, โสฬเสวาพลานิ ตุ;
จิตฺตเมวํ ตุ วิญฺเญยฺยํ, สพลํ อพลมฺปิ จฯ
[126]
ฌานงฺคมคฺคงฺคพลินฺทฺริยานิ,
จิตฺเตสุ ชายนฺติ หิ เยสุ ยานิ;
มยา สมาเสน สมุทฺธริตฺวา,
วุตฺตานิ สพฺพานิปิ ตานิ เตสุฯ
อิติ อภิธมฺมาวตาเร เจตสิกวิภาคนิทฺเทโส นาม
ตติโย ปริจฺเฉโทฯ
4. จตุตฺโถ ปริจฺเฉโท
เอกวิธาทินิทฺเทโส
[127]
อิโต ปรํ ปวกฺขามิ, นยเมกวิธาทิกํ;
อาภิธมฺมิกภิกฺขูนํ, พุทฺธิยา ปน วุทฺธิยาฯ
[128]
สพฺพเมกวิธํ จิตฺตํ, วิชานนสภาวโต;
ทุวิธญฺจ ภเว จิตฺตํ, อเหตุกสเหตุโตฯ
[129]
ปุญฺญาปุญฺญวิปากา หิ, กาเม ทส จ ปญฺจ จ;
กฺริยา ติสฺโสติ สพฺเพปิ, อฏฺฐารส อเหตุกาฯ
[130]
เอกสตฺตติ เสสานิ, จิตฺตุปฺปาทา มเหสินา;
สเหตุกาติ นิทฺทิฏฺฐา, ตาทินา เหตุวาทินาฯ
[131]