เต ปตฺติปตฺตา ปรมปฺปตีตา,
ปกฺขาลิตกฺเลสมลา มเหสี;
อจฺจนฺตโวทาตคุโณทิตตฺตา,
โลกสฺส โหนฺตุตฺตมทกฺขิเณยฺยาฯ
อิติ นามรูปปริจฺเฉเท นิสฺสนฺทผลวิภาโค นาม
เตรสโม ปริจฺเฉโทฯ
นิฏฺฐิโต จ สพฺพถาปิ วิปสฺสนาวิภาโคฯ
นิคมนกถา
[1848]
เอตฺตาวตา ปฏิญฺญาโต, ปวกฺขามีติ อาทิโต;
นามรูปปริจฺเฉโท, ปรินิฏฺฐาปิโต มยาฯ
[1849]
เตรเสว ปริจฺเฉทา, วิภตฺตา สตฺต สาธิกา;
นามรูปปริจฺเฉเท, ภาณวารา ปกาสิตาฯ
[1850]
อภิธมฺมปรมตฺถา, สมโถ จ วิปสฺสนา;
วิสุํ วิสุํ วิภตฺตาติ, วิภาเคตฺถ ติธา มตาฯ
[1851]
โสยํ วิชฺชาวิโมกฺขา จ, หทเยสุ วิภาวินํ;
วลฺลภตฺตมธิฏฺฐาย, สาสเนตฺถ คเวสินํฯ
[1852]
มโนคตตมุทฺธํสี, รวิรํสีว ปณฺฑิโต;
ทสฺเสตุ จิรมาโลกํ, สทฺธมฺมรตนาลเยฯ
[1853]
ปณฺฑิจฺจํ ปรมตฺเถสุ, ปาฏวํ ปฏิปตฺติยํ;
ปตฺถยนฺเตน ภิกฺขูน-มิตฺถํ สุคตสาสเนฯ
[1854]
นามรูปปริจฺเฉท-มสํกิณฺณมนากุลํ;
กุพฺพตา หิตกาเมน, สุกเตน กเตน เมฯ
[1855]
มหาเมรุนิภํ เคหํ, มหาเจติยภูสิตํ;
มหาวิหารมารุฬฺห-มหาโพธิมหุสฺสวํฯ
[1856]
อลงฺกาตุํ ปโหนฺตาลํ, จิรกาลํ ตโปธนา;
ลงฺกาทีปสฺสลงฺการํ, กลงฺกาปคตาลยํฯ
[1857]
นามรูปปริจฺเฉโท,
อนฺตรายํ วินา ยถา;
นิฏฺฐิโตยํ ตถา โลเก,
นิฏฺฐนฺตชฺฌาสยา สุภาฯ
อิติ อนุรุทฺธาจริเยน วิรจิตํ
นามรูปปริจฺเฉทปกรณํ นิฏฺฐิตํฯ
ฯ นโม ตสฺส ภควโต อรหโต สมฺมาสมฺพุทฺธสฺสฯ
ปรมตฺถวินิจฺฉโย