อิตฺถํ วิภตฺตปริปากวิภาวนายํ,
พุทฺธานุพุทฺธปริภาวิตภาวนายํ;
ปจฺจุทฺธเรติ ภวสาครปารคามี,
มคฺโค มเหสิ คุณสาครปารคามีฯ
[1791]
อิจฺเจตํ ทสวิธ ภาวนาวิภาคํ,
ภาเวตฺวา ปรมหิตาวหํ กเมน;
ปปฺโปนฺติ ปทมชรามรํ จิราย,
สํกฺเลสํ สกลมวสฺสชนฺติ ธีราฯ
อิติ นามรูปปริจฺเฉเท ทสาวตฺถาวิภาโค นาม
ทฺวาทสโม ปริจฺเฉโทฯ
13. เตรสโม ปริจฺเฉโท
นิสฺสนฺทผลวิภาโค
[1792]
วิปสฺสนาย นิสฺสนฺทมิติ วุตฺตมิโต ปรํ;
สจฺจานํ ปฏิเวธาทิํ, ปวกฺขามิ ยถากฺกมํฯ
[1793]
ปริญฺญา จ ปหานญฺจ, สจฺฉิกิริยา จ ภาวนา;
อิติ ทุกฺขาทิสจฺเจสุ, กิจฺจมาหุ จตุพฺพิธํฯ
[1794]
ตํ สพฺพํ มคฺคกาลมฺหิ, กริสฺสติ ตโต ปรํ;
ปฏิปสฺสทฺธกิจฺจตฺตา, กตํ โหติ ผเล กถํฯ
[1795]
ฉินฺนตาโล ผลสฺเสว, ฉินฺนานุสยมูลกา;
ขนฺธา นาลมธิฏฺฐานํ, วิปลฺลาสปวตฺติยาฯ
[1796]
อจฺจนฺตปฏิปกฺขตฺตา, จตุมคฺคปวตฺติยา;
ปรํ กฺเลสา น ชายนฺติ, ทฑฺฒพีชงฺกุรํ ยถาฯ
[1797]
นิยฺยานฏฺฐวิเสเสน, อญฺญมญฺญสฺส ปจฺจโย;
มคฺโคว มคฺคํ ภาเวติ, ชายมาโนถ วา ปุนฯ
[1798]
มคฺคปฺปวตฺติสนฺตาเน , ภาวนาติ ปวุจฺจติ;
วตฺตมาเนน ตํ กิจฺจํ, นิปฺผาทิตมเสสโตฯ
[1799]
อิติ ตีณิปิ สจฺจานิ, กิจฺจโต ปฏิวิชฺฌติ;
นิพฺพานํ สจฺฉิกุพฺพนฺโต, มคฺโค เอกกฺขเณ สหฯ
[1800]
กิจฺจปฺปวตฺติโต เจตฺถ, ปฏิเวโธติ วุจฺจติ;
ตญฺจ สาเธติ มคฺโคยํ, นิยฺยนฺโต สนฺติโคจโรฯ
[1801]
ปริจฺจชิตฺวา สงฺขาเร, มคฺคสฺสารพฺภ นิพฺพุติํ,
นิยฺยานเมว สจฺเจสุ, กิจฺจสาธนมีริตํฯ
[1802]
มคฺโค เอว หิ นิยฺยาติ, เสสา ตสฺโสปการกา;
อปฺเปนฺตา ฌานธมฺมา จ, พุชฺฌนฺตา โพธิปกฺขิยาฯ
[1803]
ตสฺมา ตสฺเสว วุฏฺฐานํ, ปกาเสนฺติ วิเสสโต;
ขนฺเธหิ จ กิเลเสหิ, วิโมกฺขตฺตยโต กถํฯ
[1804]
กตฺวานาภินิเวสํ ตุ, ยตฺถ ตตฺถ ยถา ตถา;
ภูมิธมฺมํ ปริคฺคยฺห, วิปสฺสิตฺวา ตโต ปรํฯ
[1805]
ยโต กุโตจิ วุฏฺฐานํ, ยทิ โหติ อนิจฺจโต;
หุตฺวาธิโมกฺขพหุโล, สทฺธินฺทฺริยวิเสสโตฯ
[1806]
อนิมิตฺตวิโมกฺเขน, นิยฺยนฺโต สตฺตปุคฺคโล;
สทฺธานุสารี ปฐเม, มชฺเฌ สทฺธาวิมุตฺตโกฯ
[1807]
อนฺเต ปญฺญาวิมุตฺโตติ, ตมีเรนฺติ ตถาคตา;
สงฺขาเร ทุกฺขโต ทิสฺวา, วุฏฺฐหนฺโต ส ปุคฺคโลฯ
[1808]
ปสฺสทฺธิพหุโล หุตฺวา, สมาธินฺทฺริยลาภโต;
ตเถวาปฺปณิหิเตน, นิยฺยนฺโต ติวิโธ ภเวฯ
[1809]
อนตฺตโต วุฏฺฐหิตฺวา, เวทพาหุลฺยโยคโต;
สุญฺญเตนาถ นิยฺยนฺโต, ปญฺญินฺทฺริยวิเสสโตฯ
[1810]
ธมฺมานุสารี ปฐเม, ทิฏฺฐิปฺปตฺโต ตโต ปรํ;
อนฺเต ปญฺญาวิมุตฺโตติ, ตมฺปิ ทีเปนฺติ ปณฺฑิตาฯ
[1811]
อาเนญฺชปาทกชฺฌาน-นามกายวิเสสโต ;
สจฺฉิกตฺวาน นิพฺพานํ, มชฺเฌ ฉ กายสกฺขิโนฯ
[1812]
อรูปโต จ มคฺเคน, อาเนญฺเชน จ รูปโต;
วิมุตฺโต อุภโตภาค-วิมุตฺโต อรหา ภเวฯ
[1813]
ติวิโมกฺขมุขีภูตา, อิติ วุฏฺฐานสาธิกา;
สตฺตปุคฺคลเภทญฺจ, สมฺปาเทติ วิปสฺสนาฯ
[1814]
อธิมุจฺจติ สทฺธา จ, ยถาวตฺถุสภาวโต;
เญยฺยธมฺเมสุ สพฺพตฺถ, ปญฺญา จ ปฏิวิชฺฌติฯ
[1815]
ตสฺมา สทฺธา จ ปญฺญา จ, วตฺถุนิจฺฉยลกฺขณา;
วตฺถุปฺปติฏฺฐิตา จายํ, ติลกฺขณวิปสฺสนาฯ
[1816]
ตสฺมา สทฺธาธุโร โยคี, ทิสฺโวฬาริกลกฺขณํ;
ตโต ปรมนตฺตาติ, สุขุเม อธิมุจฺจติฯ
[1817]
ตสฺเสวมธิมุตฺตสฺส, สทฺธา วา ปน เกวลา;
สมาธินฺทฺริยาธิกา จ, วุฏฺฐานฆฏิกา ภเวฯ
[1818]
ถูลลกฺขณโมหาย, ปญฺญาธุเร วิปสฺสโต;
ธมฺมสภาวมาหจฺจ, สุขุมํ ปฏิวิชฺฌติฯ
[1819]
ตสฺมา สทฺธาธุรสฺเสว, วุฏฺฐานทฺวยมาทิโต;
อนฺเต สทฺธานุคตสฺส, ปญฺญา สุปริปูรติฯ
[1820]
ปญฺญาธุรสฺส เสสนฺติ, เกจิ อาจริยา ปน;
ธุรสํสนฺทนํ นาม, วุฏฺฐาเนสุ วิภาวยุํฯ
[1821]
สตฺตกฺขตฺตุปรโม จ,
โกลํโกโล ตถาปโร;
เอกพีชีติ ติวิโธ,
โสตาปนฺโน ปวุจฺจติฯ
[1822]
สกิํเทว อิมํ โลกํ, อาคนฺตฺวา ปุน ปุคฺคโล;
สกทาคามินาเมน, ทุติโยปิ ปกาสิโตฯ
[1823]
อนฺตราปรินิพฺพายี , อุปหจฺจาปโร ตถา;
อสงฺขารํ สสงฺขารํ, อุทฺธํโสโตติ ปญฺจธาฯ
[1824]
อนาคามี จ ตติโย, จตุตฺโถ อรหาติ จ;
อิตฺถํ ผลฏฺฐา จตฺตาโร, มคฺคฏฺฐา จ ตโตปเรฯ
[1825]
ภาวนาปริยาเยน , ปฏิเวธานุรูปโต;
จตฺตาโร จ ยุคา โหนฺติ, อฏฺฐ จาริยปุคฺคลาฯ
[1826]
ทิฏฺฐิกงฺขา ปหียนฺติ, อาทิมคฺเคน สพฺพถา;
อปายคมนียมฺปิ, ปาปมญฺญํ ปหียติฯ
[1827]
สกทาคามิมคฺเคน, ขียนฺโตฬาริกา ตถา;
อนาคามิกมคฺเคน, กามโทสาว สพฺพถาฯ
[1828]
อรหตฺเตน สพฺเพปิ, กฺเลสา ขียนฺติ สพฺพถา;
กฺเลสหานิ ยถาโยค-มิติ เญยฺยา วิภาวินาฯ
[1829]
ปฏิสมฺภิทา จตสฺโส, อตฺเถ ธมฺเม นิรุตฺติยํ;
ปฏิภาเน จ ภาสนฺติ, ญาณํ เภทคตํ พุธาฯ
[1830]
เหตุปฺผลญฺจ นิพฺพานํ, ภาสิตตฺโถ ตถาปโร;
ปากากฺริยาติ ปญฺเจเต, อตฺถนาเมน ภาสิตาฯ
[1831]
เหตุ จาริยมคฺโค จ, ภาสิตญฺจ ตถาปรํ;
กุสลากุสลญฺเจติ, ปญฺจ ธมฺโม ปกาสิโตฯ
[1832]
ตตฺเถวํ ทสธา เภเท, อตฺถธมฺเม ยถารหํ;
โย โวหาโร สภาเวน, สา นิรุตฺตีติ สมฺมตาฯ
[1833]
ตํตํโคจรกิจฺจาทิ-เภทภินฺนํ ตหิํ ตหิํ;
ปวตฺตมานํ ยํ ญาณํ, ปฏิภานํ ตมีริตํฯ
[1834]
ปุพฺพโยโค พาหุสฺสจฺจํ,
เทสภาสา ตถาคโม;
ปริปุจฺฉา จาธิคโม,
นิสฺสโย มิตฺตสมฺปทาฯ
[1835]
อิจฺจูปนิสฺสยํ ลทฺธา, ภิชฺชติ ปฏิสมฺภิทา;
อเสกฺขภูมิยํ วาถ, เสกฺขภูมิยเมว วาฯ
[1836]
สรสฺสโต อาคมโต, ตถาลมฺพณโตปิ จ;
นามุปฺปตฺติํ ปกาเสนฺติ, ผลสฺส ติวิธํ พุธาฯ
[1837]
ติธา ตโต สมาปตฺติ, โสตาปตฺติผลาทิกา;
สุญฺญตา จานิมิตฺตา จ, ตถาปฺปณิหิตาติ จฯ
[1838]
ตญฺจ วุตฺตนเยเนว, สมาปชฺชิตุมิจฺฉโต;
วิปสฺสนฺตสฺส สงฺขาเร, ผลมปฺเปติ อตฺตโนฯ
[1839]
นิโรธํ ตุ สมาปตฺติํ, รูปารูปสฺส ลาภโก;
สมาปชฺชตานาคามี, อรหา จ ยถา ตถาฯ
[1840]
รูปารูปสมาปตฺติํ, สมาปชฺช ยถากฺกมํ;
วุฏฺฐหิตฺวา วิปสฺสนฺโต, ตตฺถ ตตฺเถว สงฺขเตฯ
[1841]
ยุคนนฺธํ ปวตฺเตตฺวา, สมถญฺจ วิปสฺสนํ;
ยาวากิญฺจญฺญายตน-มิตฺถํ ปตฺวา ตโต ปรํฯ
[1842]
อธิฏฺเฐยฺยมธิฏฺฐาย, กตฺวาโภคํ ยถารหํ;
มคฺคารูปสมาปตฺติํ, สมาปชฺชติ ปณฺฑิโตฯ
[1843]
ตโต นิโรธํ ผุสติ, จิตฺตุปฺปาททฺวยา ปรํ;
ตสฺเสวํ มนสาภาโว, นิโรโธติ ปวุจฺจติฯ
[1844]
ผลจิตฺตสมุปฺปาทา, วุฏฺฐานํ ตสฺส ทีปิตํ;
ตโต ภวงฺคํ เฉตฺวาน, ปจฺจเวกฺขติ พุทฺธิมาฯ
[1845]
อิจฺจาเนกคุณาธารํ, ปญฺญาภาวนมุตฺตมํ;
ภาเวยฺย มติมา โยคี, ปตฺเถนฺโต หิตมตฺตโนฯ
[1846]
อิตฺถํ สุสมฺปาทิตสีลจิตฺต-
ปญฺญาวิสุทฺธี ปฏิปาทยนฺตา;
ปตฺวาน สมฺโพธิมเปตโสกา,
ปาเลนฺติ โสตฺถิํ ปรมํ จิรายฯ
[1847]
เต ปตฺติปตฺตา ปรมปฺปตีตา,
ปกฺขาลิตกฺเลสมลา มเหสี;
อจฺจนฺตโวทาตคุโณทิตตฺตา,
โลกสฺส โหนฺตุตฺตมทกฺขิเณยฺยาฯ
อิติ นามรูปปริจฺเฉเท นิสฺสนฺทผลวิภาโค นาม
เตรสโม ปริจฺเฉโทฯ
นิฏฺฐิโต จ สพฺพถาปิ วิปสฺสนาวิภาโคฯ
นิคมนกถา
[1848]
เอตฺตาวตา ปฏิญฺญาโต, ปวกฺขามีติ อาทิโต;
นามรูปปริจฺเฉโท, ปรินิฏฺฐาปิโต มยาฯ
[1849]
เตรเสว ปริจฺเฉทา, วิภตฺตา สตฺต สาธิกา;
นามรูปปริจฺเฉเท, ภาณวารา ปกาสิตาฯ
[1850]
อภิธมฺมปรมตฺถา, สมโถ จ วิปสฺสนา;
วิสุํ วิสุํ วิภตฺตาติ, วิภาเคตฺถ ติธา มตาฯ
[1851]
โสยํ วิชฺชาวิโมกฺขา จ, หทเยสุ วิภาวินํ;
วลฺลภตฺตมธิฏฺฐาย, สาสเนตฺถ คเวสินํฯ
[1852]
มโนคตตมุทฺธํสี, รวิรํสีว ปณฺฑิโต;
ทสฺเสตุ จิรมาโลกํ, สทฺธมฺมรตนาลเยฯ
[1853]
ปณฺฑิจฺจํ ปรมตฺเถสุ, ปาฏวํ ปฏิปตฺติยํ;
ปตฺถยนฺเตน ภิกฺขูน-มิตฺถํ สุคตสาสเนฯ
[1854]
นามรูปปริจฺเฉท-มสํกิณฺณมนากุลํ;
กุพฺพตา หิตกาเมน, สุกเตน กเตน เมฯ
[1855]