จตฺตาลีสวิธํ ปนิตฺถมมโลเจโตมลกฺขาลนํ,
กมฺมฏฺฐานนยํ ยมาห สุคโต สมฺมา สมาธานกํ;
สํขิตฺตํ กถิตํ ตเมตฺถ สกลํ สาภิญฺญเมตฺตาวตา,
กตฺตพฺพา มุนิเนตฺถ สาธุมตินา สมฺภาวนา สพฺพถาฯ
[1505]
วรคุณคณภูสิตานุสิฏฺฐํ,
อิติ สมถมิมํ ตุ ภาวยิตฺวา;
ปรมมนุปมํ ภชนฺติ ธีรา,
หิตสุขมุขมุตฺตมานุพุทฺธํฯ
อิติ นามรูปปริจฺเฉเท เสสกมฺมฏฺฐานวิภาโค นาม
ทสโม ปริจฺเฉโทฯ
นิฏฺฐิโต จ นามรูปปริจฺเฉเท สพฺพถาปิ
สมถภาวนาวิภาโคฯ
11. เอกาทสโม ปริจฺเฉโท
วิปสฺสนาวิภาโค
[1506]
ทฺวิธา สมุฏฺฐานธุรา, ติวิธา ภูมิโย มตา;
ติวิธาภินิเวสา จ, สรีรํ ตุ จตุพฺพิธํฯ
[1507]
ติวิธา ภาวนา ตตฺถ, สงฺขาเรสุ ยถารหํ;
ทุวิธาการมารพฺภ, นิชฺฌายติ ติลกฺขณํฯ
[1508]
อฏฺฐารสาการภินฺนา, ทสาวตฺถา วิภาวิตา;
ติธา วิภาคา สาเธติ, วิโมกฺขตฺตยมุตฺตมํฯ
[1509]
จตุสจฺจปฏิเวธา, สตฺตฏฺฐาริยปุคฺคลา;
กฺเลสหานี ยถาโยคํ, จตสฺโส ปฏิสมฺภิทาฯ
[1510]
ติวิธา จ สมาปตฺติ, นิโรธา จ ตถาปรา;
นิสฺสนฺทผลมิจฺจาหุ, ตสฺสา สาสนโกวิทาฯ
[1511]
วิปสฺสนาภาวนาย-มิติ ภาสนฺติ ปณฺฑิตา;
ตมิทานิ ปวกฺขามิ, ยถานุกฺกมโต กถํฯ
[1512]
ภูมิธมฺเม ปริคฺคยฺห, วิจินนฺตสฺส โยคิโน;
สติยา สมถา วาถ, สมุฏฺฐาติ วิปสฺสนาฯ
[1513]
สภาวปฏิเวเธ จ, สทฺธมฺมปฏิปตฺติยํ;
ปญฺญาสทฺธาทฺวยํ ตสฺสา, ธุรมาหุ ธุรนฺธราฯ
[1514]
เตภูมกสภาวานํ, สปฺปจฺจยปริคฺคโห;
ญาตปริญฺญา นามายํ, ภูมีติ ปฐมา มตาฯ
[1515]
กลาปโต สมฺมสนํ, อุทยพฺพยทสฺสนํ;
ปริญฺญาตีรณา นาม, ทุติยา ภูมิ ภาสิตาฯ
[1516]
ปหานปริญฺญา ภูมิ, ตติยาหุ ตโตปรํ;
ภงฺคาทิญาณมิจฺเจวํ, ติวิธา ภูมิโย มตาฯ
[1517]
ขณสนฺตติอทฺธาน-วเสเนตฺถ สมีริตา;
อนิจฺจา ทุกฺขานตฺตาติ, ติวิธาภินิเวสนาฯ
[1518]
ทิฏฺฐิกงฺขาวิตรณา, มคฺคามคฺคปฏิปฺปทา;
วิสุทฺธิโย จตสฺโสปิ, สรีรนฺติ นิทสฺสิตาฯ
[1519]
สลกฺขณววตฺถานํ, ปจฺจยาการนิจฺฉโย;
กุมฺมคฺคปริหาโร จ, ติลกฺขณวิปสฺสนาฯ
[1520]
อิติ ลกฺขณภินฺนตฺตา, ลพฺภนฺเตกกฺขเณปิ จ;
เทสิตา เหตุภูเตน, กเมเนวํ วิสุทฺธิโยฯ
[1521]
สีลพฺพิสุทฺธิอาทีนํ, ตถา สาว ปรมฺปรา;
จิตฺตพฺพิสุทฺธิอาทีนมตฺถายาติ ปกาสิตาฯ
[1522]
ทิสฺสมานสภาวานํ, ปสฺสนฺโต ปจฺจยฏฺฐิติ;
ปริปนฺถวิมุตฺโต หิ, ปฏิปาเทติ ภาวนํฯ
[1523]
ตถาปิ จ วิเสเสน, ปฏิปนฺนสฺส โยคิโน;
ตตฺถ ตตฺถ วิภูตตฺตา, ฐานโต เภทิตา กถํฯ
[1524]
รูปปุพฺพงฺคมํ วาถ, นามปุพฺพงฺคมํ ตถา;
อชฺฌตฺตํ วา พหิทฺธา วา, ยถาปากฏธมฺมโตฯ
[1525]
นามรูปาทิเภเทน, ภูมิธมฺมปริคฺคโห;
วุตฺตา ทิฏฺฐิวิสุทฺธีติ, อตฺตทิฏฺฐิปฺปหานโตฯ
[1526]
อาหจฺจ ปจฺจยุปฺปนฺนา, ตถา ตพฺภาวภาวิโน;
ปวตฺตนฺตีติ สงฺขาเร, ปสฺสโต ปน โยนิโสฯ
[1527]
ปจฺจยคฺคาหินี ปญฺญา, นามรูปปฺปวตฺติยา;
กงฺขา ตรนฺติ ตายาติ, กงฺขาวิตรณา มตาฯ
[1528]
อนิจฺจา ทุกฺขานตฺตาติ, ปจฺจยายตฺตวุตฺติโต;
สงฺขิปิตฺวา กลาเปน, สมฺมสียนฺติ สงฺขตาฯ
[1529]
อุปฺปาทวยภาโวปิ, ลกฺขณตฺตยสาธโก;
ปจฺจยาการมารพฺภ, ลกฺขียติ วิเสสโตฯ
[1530]
ตสฺมา สมฺมสนญาณํ, อุทยพฺพยทสฺสนํ;
กงฺขาวิตรณายํ ตุ, สงฺคยฺหติ วิสุทฺธิยํฯ
[1531]
ตตฺถ สํกฺเลสวิกฺเขปํ, กุมฺมคฺคํ ปริวชฺชโต;
มคฺคามคฺควิสุทฺธีติ, ญาณทสฺสนมีริตํฯ
[1532]
ตโต กเถนฺติ อกฺลิฏฺฐมุทยพฺพยทสฺสนํ;
อาทิํ กตฺวา ปฏิปทาญาณทสฺสนสุทฺธิยํฯ
[1533]
ปจฺจยปจฺจยุปฺปนฺเน, ยถาวตฺถุววตฺถิเต;
ปหาตุมีหมานานํ, นิยฺยานปฏิปตฺติโตฯ
[1534]
อุปกฺเลสวิสุทฺโธ หิ, ปุนเทโวทยพฺพยํ;
อธิฏฺฐหิตฺวา ภงฺคาทิ-ญาเณหิ ปฏิปชฺชติฯ
[1535]
ตถา จาภินวุปฺปนฺเน, ภิชฺชมาเน วิปสฺสโต;
สํเวคกฑฺฒิตํ ญาณํ, ภงฺคาทิมนุติฏฺฐติฯ
[1536]
ตโต ปุพฺเพ ปวตฺตา หิ, สํกฺเลสาปายสมฺภวา;
ปฏิปตฺติวิสุทฺธีติ, น สงฺคยฺหติ ภาวนาฯ
[1537]
สมฺปาเทนฺโต ปนิจฺเจตา, จตสฺโสปิ วิสุทฺธิโย;
อนิจฺจา ทุกฺขานตฺตาติ, ภาเวยฺย ติวิธา กถํฯ
[1538]
ปจฺจยปจฺจยุปฺปนฺนา, ชาตานนฺตรเภทิโน;
อนิจฺจา จ ปภงฺคู จ, ปลุชฺชนฺติ จวนฺติ จฯ
[1539]
อทฺธุวา จ อสารา จ, วิภวา จ วินาสิโน;
สงฺขตา วิปริณาม-ธมฺมา อิตฺตรกาลิกาฯ
[1540]
ขยธมฺมา วยธมฺมา, ลหุกาลปฺปวตฺติโน;
ตาวกาลิกธมฺมา จ, ปริตฺตฏฺฐิติกา ตถาฯ
[1541]
ขณตฺตยปริจฺฉินฺนา, ปุพฺพาปรวิจิตฺตกา;
ปุรกฺขตา นิโรธสฺส, สสฺสตา น กุทาจนํฯ
[1542]
ชายนฺติ ปริหานาย, น ตุ ชายนฺติ วุทฺธิยา;
ชิยฺยมานาว ติฏฺฐนฺติ, ชิณฺณา ภงฺคปรายณาฯ
[1543]
อหุตฺวาเยวุปฺปชฺชนฺติ, น กุโตจิปิ อาคตา;
หุตฺวา อนฺตรธายนฺติ, น ตุ กตฺถจิ สญฺจิตาฯ
[1544]
ตํ ตํ ปจฺจยสามคฺคิ-มตฺตลาภาย นิสฺสิตา;
นิโรธธมฺมา ชายนฺติ, ชาตา พฺยนฺติ ภวนฺติ เตฯ
[1545]
ยถา นที ปพฺพเตยฺยา, ยถา ทีปสิขา ตถา;
สีฆสีฆํ ปวตฺตนฺตา, อุปฺปชฺชนฺติ วยนฺติ จฯ
[1546]
ชาตา ชาตา นิรุชฺฌนฺติ, อญฺเญ อญฺเญ ตุ ชายเร;
อวีจิ อนุสมฺพนฺธา, น ชานนฺติ วิเสสโตฯ
[1547]
อิติ นานปฺปกาเรน, วิปสฺสนฺโต วิจกฺขโณ;
อนิจฺจภาวนํ ธีโร, ปริปาเจติ สาธุกํฯ
[1548]
ทุกฺขา จ ทุกฺขวตฺถู จ, อภิณฺหปริปีฬิตา;
โรคา คณฺฑา จ สลฺลา จ, อฆโต จ อุปทฺทวาฯ
[1549]
ภโยปสคฺคาฆมูลา,
สาสวาทีนวีติตา;
อเลณาสรณาตาณา,
วธกา มารกามิสาฯ
[1550]
ชาติธมฺมา ชราพฺยาธิ-
โสโกปายาสภาคิโน;
ปริเทวสภาวา จ,
สํกฺเลสา ทุกฺขภาคิโนฯ
[1551]
เชคุจฺฉา ปฏิกูลา จ, พีภจฺฉา จ วิรูปิโน;
อชญฺญา จปลา หีนา, ทุคฺคนฺธา พาลเสวิตาฯ
[1552]
โสกนฺตริกตานิจฺจํ, ตณฺหาย กฑฺฒิตา ภุสํ;
กปณา ทุคฺคตา ทีนา, วิปนฺนา จ วิฆาติโนฯ
[1553]
อตฺตลาภํ คเวสนฺติ, ตํตํปจฺจยนิสฺสิตา;
ทุกฺขาธิฏฺฐานมจฺจนฺตํ, ชาตา ปุน วิหญฺญเรฯ
[1554]
อคฺคิกูเป นิมุคฺคาว, กฺเลสสนฺตาปภาคิโน;
โอวิทฺธา วิย สตฺตีหิ, สงฺขารา นิจฺจทุกฺขิตาฯ
[1555]
ชายมานา จ ชิยฺยนฺตา, มิยฺยนฺตา จ ขเณ ขเณ;
ปสุกา วิย นิจฺจมฺมา, หญฺญนฺติ เสริกาตุราฯ
[1556]
ติลานิ ติลยนฺเตว, อุจฺฉุยนฺเตว อุจฺฉุโย;
อุทยพฺพยาวสฺสํ เต, ปีฬยนฺติ อภิณฺหโสฯ
[1557]
มโนรมนวาการา , วิปลฺลาสปริกฺขตา;
อิริยาปถสญฺฉนฺนา, โนปติฏฺฐนฺติ ทุกฺขโตฯ
[1558]
สงฺขาเรสุ ปเนเตสุ, เวทนาสฺสาทโรธิโน;
สาว สนฺทุลสมฺพทฺธา, สมฺโมหปริวาริตาฯ
[1559]
‘‘อทุํ ทุกฺขมิทํ ทุกฺข’’-มิติ สํสารจาริโน;
ทุกฺขเหตุมชานนฺตา, สมฺภมนฺติ อวิทฺทสุฯ
[1560]
สุขาการมปสฺสนฺตา, ทุกฺขภารนิปีฬิตา;
ปตฺเถนฺติ ทุกฺขเมวญฺญํ, พาลา พฺยสนภาคิโนฯ
[1561]
จวนฺตา อุปปชฺชนฺตา, รุกฺขสาขํว มกฺกโฏ;
ทุกฺขเมกํ วิมุจฺจนฺติ, ตโต คณฺหนฺติ จาปรํฯ
[1562]
เต ทีฆรตฺตํ โสจนฺติ, ตณฺหาสลฺลสมปฺปิตา;
ทิฏฺฐิปาสสมุเปตา, มานตฺถมฺภานุสายิโนฯ
[1563]
ตมาการํ ปนิจฺเจวํ, วิปสฺสนฺโต วิสารโท;
ทุกฺขานุปสฺสนํ นาม, ปริปาเจติ ภาวนํฯ
[1564]
ธมฺมฏฺฐิตินิยามา หิ, ขนฺธายตนธาตุโย;
อนตฺตาสสฺสตนฺตา จ, อีหาโภควิวชฺชิตาฯ
[1565]
ปโยชนมธิฏฺฐาย, น ตุ พฺยาปารยนฺติ จ;
ปจฺจยปจฺจยุปฺปนฺนา, ชเนตุํ วาถ ชายิตุํฯ
[1566]
ตถาปิ เหตุสามคฺคิ-สมฺภเว สมฺภวนฺติ เต;
ตพฺภาวภาวิภาเวน, อญฺญมญฺญปวตฺติตาฯ
[1567]
อชายิตุํ น สกฺโกนฺติ, สติ ปจฺจยสมฺภเว;
ปจฺจยานมลาเภ ตุ, น ชายนฺติ กุทาจนํฯ
[1568]
น กิญฺเจตฺถ อเปกฺขิตฺวา, สมคฺคา โหนฺติ ปจฺจยา;
น ชเนตุํ น สกฺโกนฺติ, สมคฺคา จ กุทาจนํฯ
[1569]
ยถาปจฺจยลาเภน , ปวตฺตนฺติ ยถา ตถา;
รกฺขิตา วา วิธาตา วา, นตฺถิ อสฺสามิกา ตถาฯ
[1570]
‘‘อหํ มม’’นฺติ คณฺหนฺตา, ปริณาเมนฺติ อญฺญถา;
วิสฺสสนฺตา หรนฺเตเต, ปราภูตา ปลมฺภิโนฯ
[1571]
ริตฺตา ตุจฺฉา จ สุญฺญา จ, วิวิตฺตา สารวชฺชิตา;
สลกฺขณปริจฺฉินฺนา, ธมฺมา นตฺเถตฺถ ปุคฺคโลฯ
[1572]
ชายมานา จ ชิยฺยนฺตา, มิยฺยมานา จ สงฺขตา;
วิวสา ปริวตฺตนฺติ, วโส เตสํ น กตฺถจิฯ
[1573]
น เตสุ กสฺสจิสฺเสรํ, น เตสญฺจตฺถิ กตฺถจิ;
น จตฺตนีติ สงฺขารา, อาธิปจฺจวิวชฺชิตาฯ
[1574]
กทลีปตฺตวฏฺฏีว, อญฺญมญฺญปติฏฺฐิตา;
สหชาตคฺฆนีภูตา, โนปฏฺฐนฺติ อนตฺตโตฯ
[1575]
อรูปนิสฺสิตํ รูปํ, อรูปํ รูปนิสฺสิตํ;
ชจฺจนฺธปีฐสปฺปีว, อญฺญมญฺญววตฺถิตํฯ
[1576]
ยนฺตสุตฺเตน ยนฺตํว, กายยนฺตํ ปวตฺตติ;
นามาวกฑฺฒิตํ ตตฺถ, นตฺถิ อตฺตา สยํวสีฯ
[1577]
เจโตวิปฺผารนิปฺผนฺนา, วาโยธาตุสมุฏฺฐิตา;
อิริยาปถวิญฺญตฺติวิการา ปาลกา มตาฯ
[1578]
โอวิทฺธเวทนาสลฺลวิการปริณามโต;
พาลานํ จิตฺตนิปฺผนฺนา, อตฺตาติ ปริกปฺปนาฯ
[1579]
สุทฺธสงฺขารปุญฺโชยํ, เนตฺถ สตฺโตปลพฺภติ;
ตํ ตํ ปจฺจยมาคมฺม, ทุกฺขกฺขนฺโธว ชายติฯ
[1580]
เอวมาทิปฺปกาเรหิ, วิปสฺสนฺโต อนตฺตโต;
อนตฺตภาวนํ นาม, ภาเวตีติ ปวุจฺจติฯ
[1581]
ภาเวนฺโต ติวิธมฺเปตํ, นิชฺฌายติ ติลกฺขณํ;
นิมิตฺตญฺจ ปวตฺตญฺจ, สมารพฺภ ยถากฺกมํฯ
[1582]
อตฺตลาภนิมิตฺตญฺจ , ตํตํปจฺจยนิสฺสิตา;
ตพฺภาวภาวิภาเวน, ลกฺขียนฺติ นิมิตฺตโตฯ
[1583]
ชายมานา จ ชิยฺยนฺตา, มิยฺยมานา จ สงฺขตา;
ตํ ตํ ภาวมติกฺกมฺม, ปวตฺตนฺติ ขเณ ขเณฯ
[1584]
เหตุนิสฺสยนากาโร, นิมิตฺตนฺติ ตโต มโต;
ปวตฺตํ วตฺตนากาโร, ขณสนฺตติอทฺธโตฯ
[1585]
อปุพฺพาภินวุปฺปตฺติ, อุปฺปาโทติ ปกาสิโต;
ปุพฺพาปริยสนฺธานํ, ปฏิสนฺธีติ ภาสิตาฯ
[1586]
อายูหนฺตีติ วุจฺจนฺติ, ตทตฺถํ ปน วาวฏา;
อิจฺจาทิปริยาเยหิ, พหฺวาการาปิ สงฺขตาฯ
[1587]
นิมิตฺเต จ ปวตฺเต จ, วตฺถุโต ยนฺติ สงฺคหํ;
ตํ ทฺวยาการมารพฺภ, ปติฏฺฐาติ ติลกฺขณํฯ
[1588]
ปจฺจยาธีนธมฺมานํ, อุปฺปาทวยลกฺขิตา;
อนิจฺจตานิมิตฺตฏฺฐา, ปวตฺเตสุ น ปากฏาฯ
[1589]
ปุพฺพาปรวิจิตฺตานมสมตฺถานมตฺตนิ;
สนฺนิสฺสเยน นิปฺผนฺโน, ภาวทุพฺพลฺยสาธโกฯ
[1590]
เหตุสงฺขาตภาโว หิ, สงฺขารานมนิจฺจตา;
ปวตฺตมานา ทสฺเสติ, ตํ สภาวํ ปนตฺตโนฯ
[1591]
นิจฺจา ธุวา เจ สงฺขารา, กสฺมา เปกฺขนฺติ ปจฺจเย;
อหุตฺวา ยทิ นิสฺสาย, ชาตา กา ตตฺถ นิจฺจตา;
[1592]
อตฺตลาภํ ลภิตฺวาน, เหตุสามคฺคิลาภโต;
ยาเปสฺสนฺติ ตมญฺญตฺร, กถํ นามตฺตทุพฺพลาฯ
[1593]
ปจฺจเย อนเปกฺขิตฺวา, ยทิ นตฺถิ สมตฺถตา;
อตฺตลาภูปลาภาย, กิํ สมตฺถานุปาลเน;
[1594]
ชนกา ปจฺจยานญฺหิ, ตทายูหนโต ปรํ;
ปริหาริตุมารทฺธา, ชิยา ขิตฺตสโร ยถาฯ
[1595]
อจฺจีว วฏฺฏินิกฺขนฺตา, เมฆมุตฺตาว วิชฺชุตา;
ปจฺจยุทฺธฏวิสฺสฏฺฐา, ธมฺมา ภงฺคปรายณาฯ
[1596]
ตสฺมา นิมิตฺตมาการํ, ปสฺสนฺโต ส วิปสฺสโก;
‘‘วินสฺสนฺติ อวสฺส’’นฺติ, สทฺทหนฺโต วิมุจฺจติฯ
[1597]
อนิจฺจโต ตถา เหวํ, วิปสฺสนฺตสฺส โยคิโน;
สทฺธาวิโมกฺข พาหุลฺยํ, ภวตีติ ปกาสิตํฯ
[1598]
อิติ สงฺขารธมฺเมสุ, นิมิตฺตาการนิจฺฉิตํ;
อนิจฺจลกฺขณํ ธีโร, นิชฺฌายติ นิยามโตฯ
[1599]
พาธกตฺตภยาการา, ปวตฺเต ทุกฺขิตา วิย;
ปวตฺตมานา ปีเฬนฺติ, สงฺขารา จ ภยาวหาฯ
[1600]
อุปฺปาทาภินวาการํ, อติกฺกมฺม ตโต ปรํ;
ชราชจฺจริตา หุตฺวา, ภญฺชมานา กถํ สุขาฯ
[1601]
ตสฺมา ปวตฺตมาการํ, นิชฺฌายนฺโต นิรนฺตรํ;
สงฺขาเร ทุกฺขโต ทิสฺวา, หิตฺวาน ปณิธิํ ตหิํฯ
[1602]
ตทายูหนนิสฺสงฺโค, ปสฺสทฺธทรโถ สุขี;
สมาธิพหุโล โยคี, วูปสนฺโตติ วุจฺจติฯ
[1603]
พฺยาปารวสิตาการํ, สงฺขารานํ วิปสฺสโต;
นิมิตฺเต จ ปวตฺเต จ, อุปฏฺฐาติ อนตฺตโตฯ
[1604]
อนตฺตาธีนนิปฺผนฺนา, วสาตีตปฺปวตฺติโน;
ภาวทุพฺพลฺยนิสฺสารา, กถมตฺตา ภวิสฺสเรฯ
[1605]
ตเมวํ ปฏิวิชฺฌนฺโต, มญฺญตานตฺตลกฺขณํ;
วิปสฺสนารสสฺสาที, สํเวคพหุโล ภเวฯ
[1606]
อิจฺจาหจฺจ ปวตฺตานํ, ลกฺขณานํ สภาวโต;
ววตฺถิโต ตตฺถ ตตฺถ, ตํตํลกฺขณนิจฺฉโยฯ
[1607]
ตถาปิปากฏฏฺฐาเน , เหตุภูเต จ โยนิโส;
ววตฺถเปติ สงฺขาย, ลกฺขณานิ วิจกฺขโณฯ
[1608]
อุปฺปาทวยภาเวน, ทิสฺสมานา หิ สงฺขตา;
ปุพฺพาปรวิเวเกน, ทสฺเสนฺติ ตทนิจฺจตํฯ
[1609]
ตถา จ วิปริณามํ, วิปสฺสนฺโต วิสารโท;
นิมิตฺตผลนิปฺผนฺนํ, ตมตฺถมธิมุจฺจติฯ
[1610]
ทุกฺขปฺปวตฺติเหตุตฺตา, นิมิตฺตมปิ ปณฺฑิโต;
ภยาวหนิยาเมน, พาธกนฺเตว ปสฺสติฯ
[1611]
ตถา หิ ปจฺจยารพฺภ, สงฺขารา นิสฺสยนฺติ เจ;
ตโตวสฺสํ ภวิสฺสนฺติ, มหพฺภยสโมหิตาฯ
[1612]
นิโรธธมฺมา ชายนฺติ, สลฺลวิทฺธาว ทุกฺขิตา;
ชราตุรา วิปชฺชนฺตา, ภิชฺชนฺตาว วิฆาติโนฯ
[1613]
เตเนวานิจฺจโต ทิฏฺฐา, ทุกฺขภาเวน ขายเร;
สงฺขตตฺตา สภาโว หิ, ทุกฺขาย ปริวตฺตติฯ
[1614]
อนิจฺจา ปุน สงฺขารา, ทุกฺขาติ จ ววตฺถิตา;
อนตฺตตฺตนิยาเมน, นิทสฺเสนฺติ สลกฺขณํฯ
[1615]
กถํ อตฺตปราธีนา, ปจฺจยุปฺปนฺนภงฺคุรา;
วิปตฺตินิยตา วาถ, พาธมานา ภยาวหาฯ
[1616]
อาหจฺจาการเภเทน, ติวิธา หิ วิปสฺสนา;
อนิจฺจา ทุกฺขานตฺตาติ, อยเมตฺถ วินิจฺฉโยฯ
[1617]
ติธาภูตา ปนิจฺเจตา, ปหานาการเภทิตา;
มหาวิปสฺสนา นาม, อฏฺฐารสวิธา กถํฯ
[1618]
เหตุสามคฺคินิปฺผนฺนมนิจฺจนฺติ ติลกฺขณํ;
อนิจฺจตํ วิปสฺสนฺโต, นิจฺจสญฺญํ วิมุญฺจติฯ
[1619]
อนิจฺจตายาธิฏฺฐานนิมิตฺตํ ปน ปสฺสโต;
อนิมิตฺเต วิมุจฺจนฺตี, อนิมิตฺตานุปสฺสนาฯ
[1620]
นิรุชฺฌมานธมฺมานํ, พฺยนฺติภาวํ วิปสฺสโต;
สมุทยํ ปชหนฺตี, นิโรธาอนุปสฺสนาฯ
[1621]
สิถิลา ชาตุ นิสฺสารา, ทุพฺพลา ลหุฆาติโน;
ขยธมฺมาติ สงฺขาย, ฆนสญฺญํ วิมุญฺจติฯ
[1622]
อตฺตลาภมติกฺกมฺม, วยนฺตีติ วิจินฺตยํ;
ชหตายูหนํ ตตฺถ, ปุตฺเต สูติปชา วิยฯ
[1623]
อนวตฺติตภาวานํ, อญฺญถตฺตํ วิปสฺสโต;
วิการปริณาเมสุ, ธุวสญฺญา วิรชฺชติฯ
[1624]
อาลมฺพญฺจ ตทาลมฺพ-ญาณภงฺคญฺจ ภาวยํ;
สาราทานาภินิเวสํ, อธิปญฺญาย มุจฺจติฯ
[1625]
อิจฺจานิจฺจานิมิตฺตา จ, นิโรธา จ ขยา วยา;
วิปรีณามาธิสญฺญา, ธมฺมานุปสฺสนาติ จฯ
[1626]
สตฺตานุปสฺสนาเภทมนิจฺจาการทสฺสนํ;
นิจฺจสญฺญาทิภงฺคาย, ปริทีเปนฺติ ปณฺฑิตาฯ
[1627]
ตํ ตมาการมารพฺภ, ตถา พาหุลฺยวุตฺติโต;
ตํลกฺขณานุคตา จ, เภทา ตสฺเสว สตฺตธาฯ
[1628]
สุขสญฺญํ นิสฺสชฺชนฺตี, วุตฺตา ทุกฺขานุปสฺสนา;
นิพฺพินฺนา นิพฺพิทาญาณํ, วิราคา ราควชฺชิตาฯ
[1629]
ชาตาปฺปณิหิตา นาม, มุญฺจนฺตี ปณิธิํ ตถา;
นิราลยาภินิเวสา, อาทีนวานุปสฺสนาฯ
[1630]
ปญฺจานุปสฺสนาเภทํ , ตทิทํ ทุกฺขทสฺสนํ;
สุขสญฺญาทิภงฺคาย, ปวตฺตนฺติ ปกาสิตํฯ
[1631]
อนตฺตโต วิปสฺสนฺโต, อตฺตสญฺญา วิมุจฺจติ;
ชหตตฺตาภินิเวสํ, ฌายนฺโต ปุน สุญฺญโตฯ
[1632]
ทฺวยานุปสฺสนาเภทมนตฺตาการทสฺสนํ;
อตฺตสญฺญาภินิเวสํ, วิโมกฺขาย วิภาวิตุํฯ
[1633]
ปฏินิสฺสคฺคโต ทิสฺวา, สงฺขาเรสุ ติลกฺขณํ;
ชหนฺโต สงฺขตาทานํ, ปกฺขนฺทติ อสงฺขเตฯ
[1634]
ยถาภูเตน ญาเณน, วิปสฺสนฺโต วิมุจฺจติ;
สมฺโมหาภินิเวสมฺหา, อวิปลฺลตฺถทสฺสโนฯ
[1635]
โมหตาโภควิมุตฺตา, ปฏิสงฺขานุปสฺสนา;
ชหนฺตปฺปฏิสงฺขํ ตุ, ปฏิสงฺขาย ลกฺขณํฯ
[1636]
ทิฏฺฐิสงฺขาตโทสตฺตา, วิภาเวนฺโต วิวฏฺฏโต;
สํโยคาภินิเวสมฺหา, ปฏิลีโน วิมุจฺจติฯ
[1637]
มุจฺจีตุกมฺยตาญาณํ, ปฏินิสฺสคฺคสมฺมตํ;
ยถา ภูตํ ตถา ญาณํ, ปจฺจยาการนิสฺสิตํฯ
[1638]
สงฺขารุเปกฺขาญาณํ ตุ, ปฏิสงฺขานุปสฺสนา;
วุฏฺฐานคามินี นาม, วิวฏฺฏนฺติ ปวุจฺจติฯ
[1639]
จตสฺโสปิ ปนิจฺเจตา, อาทานาทิปฺปภญฺชิตา;
ลกฺขณตฺตยมาหจฺจ, ปวตฺตนฺติ ยถา ตถาฯ
[1640]
นิมิตฺตมารพฺภ ตถา ปวตฺตํ,
ติลกฺขณํ ฌายติ ยาย โยคี;
ตมิตฺถมฏฺฐารสเภทภินฺนํ,
วิปสฺสนาภาวนมาหุ ธีราฯ
[1641]
วิปสฺสนานยมิมมุตฺตมํ สุภํ,
นิทสฺสิตํ ชินวจนานุสารโต;
วิภาวยํ มนสิ หิตาวหํ ปรํ,
นิรามยํ ปทมนุปาปุณิสฺสติฯ
อิติ นามรูปปริจฺเฉเท วิปสฺสนาวิภาโค นาม
เอกาทสโม ปริจฺเฉโทฯ
12. ทฺวาทสโม ปริจฺเฉโท
ทสาวตฺถาวิภาโค
[1642]
อิจฺจฏฺฐารสธา ภินฺนา, ปฏิปกฺขปฺปหานโต;
ลกฺขณาการเภเทน, ติวิธาปิ จ ภาวนาฯ
[1643]
กลาปโต สมฺมสนํ, อุทยพฺพยทสฺสนํ;
ภงฺเค ญาณํ ภเย ญาณํ, ญาณมาทีนเวปิ จฯ
[1644]
ตเถว นิพฺพิทาญาณํ, ญาณํ มุจฺจิตุกมฺยตา;
ปฏิสงฺขา จ สงฺขารุ-เปกฺขาญาณานุโลมกํฯ
[1645]
อิจฺจาวตฺถาปเภเทน, ทสธาปิ วิภาวิตา;
สภาคตฺถวิเสเสน, ติธา สงฺคหิตา ปุนฯ
[1646]
ยถาภูตํ นาม ญาณตฺตยํ สมฺมสนาทิกํ;
ภยาทิญาณํ ติวิธํ, นิพฺพิทาติ ปวุจฺจติฯ
[1647]
ตถา มุจฺจิตุกามาทิ, วิราโคว จตุพฺพิธํ;
ลกฺขณตฺตยนิชฺฌานวเสน ปุน วุฏฺฐิตาฯ
[1648]
สุญฺญตญฺจานิมิตฺตญฺจ , ตถาปฺปณิหิตนฺติ จ;
สาเธติ มคฺคสงฺขาตํ, วิโมกฺขตฺตยมุตฺตมํฯ
[1649]
อิติ ภาเวตุกามสฺส, วิภาเวติ ยถากฺกมํ;
ทสาวตฺถาวิภาเคน, สมาทาย ยถา กถํฯ
[1650]