รูปาทิตฺตยมิจฺเจวํ , สมุฏฺฐาเปติ มานสํ;
อุปฺปชฺชมานเมเวติ, เญยฺโย ชนกสงฺคโหฯ
[325]
อิติ กิจฺจาทิเภเทสุ, ปจฺเจกสฺมิํ ปกาสิตํ;
นยํ วุตฺตานุสาเรน, สมาเสตฺวา วิโยชเยฯ
[326]
ปนุณฺณสมฺโมหมลสฺส สาสเน,
วิกิณฺณวตฺถูหิ สุคนฺถิตํ นยํ;
ปกิณฺณโมคยฺห ปรตฺถนินฺนเย,
วิติณฺณกงฺขาว ภวนฺติ ปณฺฑิตาฯ
[327]
พหุนยวินิพนฺธํ กุลฺลเมตํ คเหตฺวา,
ชินวจนสมุทฺทํ กามโมคยฺห ธีรา;
หิตสกลสมตฺถํ วตฺถุสารํ หริตฺวา,
หทย รตนคพฺภํ สาธุ สมฺปูรยนฺติฯ
อิติ นามรูปปริจฺเฉเท ปกิณฺณกวิภาโค นาม
จตุตฺโถ ปริจฺเฉโทฯ
5. ปญฺจโม ปริจฺเฉโท
กมฺมวิภาโค
[328]
วิภาคํ ปน กมฺมานํ,
ปวกฺขามิ อิโต ปรํ;
กมฺมปากกฺริยาเภเท,
อโมหาย สมาสโตฯ
[329]
กมฺมปจฺจยกมฺมนฺติ, เจตนาว สมีริตา;
ตตฺถาปิ นานกฺขณิกา, ปุญฺญาปุญฺญาว เจตนาฯ
[330]
เทติ ปากมธิฏฺฐาย, สมฺปยุตฺเต ยถารหํ;
กมฺมสฺสายูหนฏฺเฐน, ปวตฺตตฺตา หิ เจตนาฯ
[331]
กฺเลสานุสยสนฺตาเน , ปากธมฺมา หิ ชายเร;
ปหีนานุสยานํ ตุ, กฺริยามตฺตํ ปวตฺตติฯ
[332]
มูลภาวา จ สพฺเพสํ, ตเถวาวชฺชนทฺวยํ;
ชนิตานิ จ กมฺเมหิ, วิปากานิ ปวตฺตเรฯ
[333]
จิตฺตุปฺปาทวเสเนว, กมฺมํ เตตฺติํสธา ฐิตํ;
กมฺมจตุกฺกเภเทหิ, วิภาเวยฺย วิจกฺขโณฯ
[334]
ปจฺจุปฺปนฺนาทิกณฺหาทิ-ชนกาทิคราทิโต;
ทิฏฺฐธมฺมาทิกามาทิ-เภทา ฉธา ยถากฺกมํฯ
[335]
ยํ ปาปํ สุขโวกิณฺณํ, อกิจฺเฉน กรียติ;
ปจฺจุปฺปนฺนสุขํ กมฺมํ, อายติํ ทุกฺขปากชํฯ
[336]
กิจฺเฉน ทุกฺขโวกิณฺณํ, ยทิ ปาปํ กรียติ;
ปจฺจุปฺปนฺเน จ ตํ ทุกฺขํ, อายติํ ทุกฺขปากชํฯ
[337]
กิจฺเฉน ทุกฺขโวกิณฺณํ, ยทิ ปุญฺญํ กรียติ;
ปจฺจุปฺปนฺนมฺหิ ตํ ทุกฺขํ, อายติํ สุขปากชํฯ
[338]
ยํ ปุญฺญํ สุขโวกิณฺณํ, อกิจฺเฉน กรียติ;
ปจฺจุปฺปนฺนสุขญฺเจว, อายติํ สุขปากชํฯ
[339]
วิสสํสฏฺฐมธุรํ, สวิสํ ติตฺตกํ ตถา;
โคมุตฺตมธุเภสชฺช-มิจฺโจปมฺมํ ยถากฺกมํฯ
[340]
สมาทาเน วิปาเก จ, สุขทุกฺขปฺปเภทิตํ;
กมฺมเมวํ จตุทฺธาติ, ปกาเสนฺติ ตถาคตาฯ
[341]
อานนฺตริยกมฺมาทิ, เอกนฺตกฏุกาวหํ;
กณฺหํ กณฺหวิปากนฺติ, กมฺมํ ทุคฺคติคามิกํฯ
[342]
ปฐมชฺฌานกมฺมาทิ, เอกนฺเตน สุขาวหํ;
สุกฺกํ สุกฺกวิปากนฺติ, กมฺมํ สคฺคูปปตฺติกํฯ
[343]
โวกิณฺณกมฺม โวกิณฺณ-สุขทุกฺขูปปตฺติกํ;
กณฺหสุกฺกํ กณฺหสุกฺก-วิปากนฺติ สมีริตํฯ
[344]
อกณฺหสุกฺกมีเรนฺติ, อกณฺหสุกฺกปากทํ;
กมฺมํ โลกุตฺตรํ โลเก, คติกมฺมกฺขยาวหํฯ
[345]
อิติ วฏฺฏปฺปวตฺตมฺหิ, กฺเลสโวทานเภทิตํ;
กมฺมกฺขเยน สงฺคยฺห, จตุธา กมฺมมีริตํฯ
[346]
ชนกญฺเจวุปตฺถมฺภ-มุปปีโฬปฆาตกํ;
จตุธา กิจฺจเภเทน, กมฺมเมวํ ปวุจฺจติฯ
[347]
ชเนติ ชนกํ ปากํ, ตํ ฉินฺทตุปปีฬกํ;
ตํ ปวตฺเตตุปตฺถมฺภํ, ตํ ฆาเตโตปฆาตกํฯ
[348]
กโรติ อตฺตโน ปาก-สฺสาวกาสนฺติ ภาสิตํ;
ปากทายกกมฺมํ ตุ, ยํ กิญฺจิ ชนกํ ภเวฯ
[349]
พาธมานกกมฺมํ ตุ, ตํ ปากมุปปีฬกํ;
อุปฆาตกมีเรนฺติ, ตทุปจฺเฉทกํปเรฯ
[350]
ครุกาสนฺนมาจิณฺณํ, กฏตฺตากมฺมุนา สห;
กมฺมํ จตุพฺพิธํ ปาก-ปริยายปฺปเภทโตฯ
[351]
มหคฺคตานนฺตริยํ, ครุกมฺมนฺติ วุจฺจติ;
กตํ จินฺติตมาสนฺน-มาสนฺนมรเณน ตุฯ
[352]
พาหุลฺเลน สมาจิณฺณมาจิณฺณนฺติ ปวุจฺจติ;
เสสํ ปุญฺญมปุญฺญญฺจ, กฏตฺตากมฺมมีริตํฯ
[353]
ทิฏฺฐธมฺเม เวทนียมุปปชฺชาปเร ตถา;
ปริยายเวทนียมิติ จาโหสิกมฺมุนาฯ
[354]
ปากกาลวเสนาถ, กาลาตีตวเสน จ;
จตุเธวมฺปิ อกฺขาตํ, กมฺมมาทิจฺจพนฺธุนาฯ
[355]
ทิฏฺฐธมฺเม เวทนียํ, ปฐมํ ชวนํ ภเว;
อลทฺธาเสวนตฺตาว, อสมตฺถํ ภวนฺตเรฯ
[356]
เวทนียํ ตุปปชฺชปริโยสานมีริตํ;
ปรินิฏฺฐิตกมฺมตฺตา, วิปจฺจติ อนนฺตเรฯ
[357]
เสสานิ เวทนียานิ, ปริยายาปเร ปน;
ลทฺธาเสวนโต ปากํ, ชเนนฺติ สติ ปจฺจเยฯ
[358]
วุจฺจนฺตาโหสิกมฺมานิ, กาลาตีตานิ สพฺพถา;
อุจฺฉินฺนตณฺหามูลานิ, ปจฺจยาลาภโต ตถาฯ
[359]
จตุธา ปุน กามาทิภูมิเภเทน ภาสิตํ;
ปุญฺญาปุญฺญวสา ทฺเวธา, กามาวจริกํ ภเวฯ
[360]
อปุญฺญํ ตตฺถ สาวชฺช-มนิฏฺฐผลทายกํ;
ตํ กมฺมผสฺสทฺวาเรหิ, ทุวิธํ สมฺปวตฺตติฯ+
[361]
กายทฺวารํ วจีทฺวารํ, มโนทฺวารนฺติ ตาทินา;
กมฺมทฺวารตฺตยํ วุตฺตํ, ผสฺสทฺวารา ฉ ทีปิตาฯ
[362]
กมฺมทฺวาเร มโนทฺวาเร, ปญฺจทฺวารา สโมหิตา;
ผสฺสทฺวารมโนทฺวารํ, กมฺมทฺวารตฺตยํ กตํฯ
[363]
ตถา หิ กายวิญฺญตฺติํ, ชเนตฺวา ชาตเจตนา;
กายกมฺมํ วจีกมฺมํ, วจีเภทปวตฺติกาฯ
[364]
วิญฺญตฺติทฺวยสมฺปตฺตา, มโนกมฺมนฺติ วุจฺจติ;
เภโทยํ ปริยาเยน, กมฺมานมิติ ทีปิโตฯ
[365]
ปาณฆาตาทิกํ กมฺมํ, กาเย พาหุลฺลวุตฺติโต;
กายกมฺมํ วจีกมฺมํ, มุสาวาทาทิกํ ตถาฯ
[366]
อภิชฺฌาทิ มโนกมฺมํ, ตีสุ ทฺวาเรสุ ชายติ;
ทฺวีสุ ทฺวาเรสุ เสสานิ, เภโทยํ ปรมตฺถโตฯ
[367]
ผสฺสทฺวารมโนทฺวาเร, วิญฺญตฺติทฺวยมีริตํ;
ปญฺจทฺวาเร ทฺวยํ นตฺถิ, อยเมตฺถ วินิจฺฉโยฯ
[368]
อกฺขนฺติญาณ โกสชฺชํ, ทุสฺสิลฺยํ มุฏฺฐสจฺจตา;
อิจฺจาสํวรเภเทน, อฏฺฐทฺวาเรสุ ชายติฯ
[369]
กมฺมทฺวารตฺตยญฺเจว , ปญฺจทฺวารา ตถาปเร;
อสํวรานํ ปญฺจนฺนํ, อฏฺฐ ทฺวารา ปกาสิตาฯ
[370]
ตตฺถ กมฺมปถปฺปตฺตํ, ปฏิสนฺธิผลาวหํ;
ปาณฆาตาทิเภเทน, ทสธา สมฺปวตฺตติฯ
[371]
ปาณาติปาโต ผรุสํ, พฺยาปาโท จ ตถาปโร;
อิจฺเจวํ ติวิธํ กมฺมํ, โทสมูเลหิ ชายติฯ
[372]
มิจฺฉาจาโร อภิชฺฌา จ, มิจฺฉาทิฏฺฐิ ตถาปรา;
อิจฺเจวํ ติวิธํ กมฺมํ, โลภมูเลหิ ชายติฯ
[373]
เถยฺยาทานํ มุสาวาโท, ปิสุณํ สมฺผลาปนํ;
กมฺมํ จตุพฺพิธมฺเมตํ, ทฺวิมูเลหิ ปวตฺตติฯ
[374]
ฉนฺทาโทสา ภยา โมหา, ปาปํ กุพฺพนฺติ ปาณิโน;
ตสฺมา ฉนฺทาทิเภเทน, จตฺตาลีสวิธํ ภเวฯ
[375]
อิจฺจาปุญฺญํ ปกาเสนฺติ, จตุราปายสาธกํ;
อญฺญตฺถาปิ ปวตฺตมฺหิ, วิปตฺติผลสาธนํฯ
[376]
ติวิธํ ปน ปุญฺญํ ตุ, อนวชฺชิฏฺฐปากทํ;
ทานํ สีลํ ภาวนา จ, ตีสุ ทฺวาเรสุ ชายติฯ
[377]
มหตฺตคารวา สฺเนหา, ทยา สทฺธุปการโต;
โภคชีวาภยธมฺมํ, ททโต ทานมีริตํฯ
[378]
ปุญฺญมาจารวาริตฺต-วตฺตมารพฺภ กุพฺพโต;
ปาปา จ วิรมนฺตสฺส, โหติ สีลมยํ ตทาฯ
[379]
ทานสีลวินิมุตฺตํ, ภาวนาติ ปวุจฺจติ;
ปุญฺญํ ภาเวนฺติ สนฺตาเน, ยสฺมา เตน หิตาวหํฯ
[380]
ชเนตฺวา กายวิญฺญตฺติํ, ยทา ปุญฺญํ กรียติ;
กายกมฺมํ ตทา โหติ, ทานํ สีลญฺจ ภาวนาฯ
[381]
วจีวิญฺญตฺติยา สทฺธิํ, ยทา ปุญฺญํ กรียติ;
วจีกมฺมํ มโนกมฺมํ, วินา วิญฺญตฺติยา กตํฯ
[382]
ตํตํทฺวาริกเมวาหุ, ตํตํทฺวาริกปาปโต;
วิรมนฺตสฺส วิญฺญตฺติํ, วินา วา สห วา ปุนฯ
[383]
ทานํ สีลํ ภาวนา จ, เวยฺยาวจฺจาปจายนา;
ปตฺตานุโมทนา ปตฺติ-ทานํ ธมฺมสฺส เทสนา;
สวนํ ทิฏฺฐิชุกมฺม-มิจฺเจวํ ทสธา ฐิตํฯ
[384]
กามปุญฺญํ ปกาเสนฺติ, กาเม สุคติสาธกํ;
อญฺญตฺถาปิ ปวตฺตมฺหิ, สมฺปตฺติผลสาธกํฯ
[385]
จิตฺตุปฺปาทปฺปเภเทน, กมฺมํ วีสติธา ฐิตํ;
กามาวจรมิจฺเจวํ, วิภาเวนฺติ วิภาวิโนฯ
[386]
รูปาวจริกํ กมฺม-มปฺปนาภาวนามยํ;
กสิณาทิกมารพฺภ, มโนทฺวาเร ปวตฺตติฯ
[387]
ปถวาโป จ เตโช จ,
วาโย นีลญฺจ ปีตกํ;
โลหิโตทาตมากาสํ,
อาโลโกติ วิสารทาฯ
[388]
กสิณานิ ทสีเรนฺติ, อาทิกมฺมิกโยคิโน;
อุทฺธุมาตํ วินีลญฺจ, วิปุพฺพกํ วิขาทิตํฯ
[389]
วิจฺฉิทฺทกญฺจ วิกฺขิตฺตํ, หตวิกฺขิตฺตโลหิตํ;
ปุฬวํ อฏฺฐิกญฺเจติ, อสุภํ ทสธา ฐิตํฯ
[390]
พุทฺเธ ธมฺเม จ สงฺเฆ จ, สีเล จาเค จ อตฺตโน;
เทวโตปสมายญฺจ, วุตฺตานุสฺสติภาวนาฯ
[391]
มรเณ สติ นาเมกา, ตถา กายคตาสติ;
อานาปานสติจฺเจวํ, ทสธานุสฺสตีริตาฯ
[392]
เมตฺตา กรุณา มุทิตา, อุเปกฺขา ภาวนาติ จ;
จตุพฺรหฺมวิหารา จ, อปฺปมญฺญาติ ภาสิตาฯ
[393]
อาหาเร ตุ ปฏิกฺกูล-สญฺเญกาติ ปกาสิตา;
จตุธาตุววตฺถานํ, จตุธาตุปริคฺคโหฯ
[394]
จตฺตาโรรุปฺปกา เจติ, จตฺตาลีส สมาสโต;
กมฺมฏฺฐานานิ วุตฺตานิ, สมเถ ภาวนานเยฯ
[395]
อานาปานญฺจ กสิณํ, ปญฺจกชฺฌานิกํ ตหิํ;
ปฐมชฺฌานิกา วุตฺตา, โกฏฺฐาสาสุภภาวนาฯ
[396]
เมตฺตาทโย จตุชฺฌานา, อุเปกฺขา ปญฺจมี มตา;
อารุปฺปารุปฺปกา เสสา, อุปจารสมาธิกาฯ
[397]
กสิณาสุภโกฏฺฐาเส,
อานาปาเน จ ชายติ;
ปฏิภาโค ตมารพฺภ,
ตตฺถ วตฺตติ อปฺปนาฯ
[398]
กมฺมฏฺฐาเนสุ เสเสสุ, ปฏิภาโค น วิชฺชติ;
ตถา หิ สตฺตโวหาเร, อปฺปมญฺญา ปวตฺตเรฯ
[399]
กสิณุคฺฆาฏิมากาสํ, ปฐมารุปฺปมานสํ;
ปฐมารุปฺปกาภาว-มากิญฺจญฺญญฺจ โคจรํฯ
[400]
อารุปฺปา สมฺปวตฺตนฺติ, อาลมฺพิตฺวา ยถากฺกมํ;
อญฺญตฺถ ปน สพฺพตฺถ, นปฺปวตฺตติ อปฺปนาฯ
[401]
ปริกมฺมํ ปริกมฺม-สมาธิ จ ตโต ปรํ;
อุปจารปฺปนา เจติ, ภาวนายํ จตุพฺพิธํฯ
[402]
ปริกมฺมนิมิตฺตญฺจ, อุคฺคโห จ ตโต ปรํ;
ปฏิภาโคติ ตีเณว, นิมิตฺตานิ ปกาสยุํฯ
[403]
นิมิตฺตํ คณฺหโต ปุพฺพ-มาทิกมฺมิกโยคิโน;
ปริกมฺมนิมิตฺตนฺติ, กสิณาทิกมีริตํฯ
[404]
ตสฺมิํ ปน นิมิตฺตมฺหิ, อารภนฺตสฺส ภาวนํ;
ปฐมํ ปริกมฺมนฺติ, ภาวนาปิ ปวุจฺจติฯ
[405]
จิตฺเตนุคฺคหิเต ตสฺมิํ, มโนทฺวาเร วิภาวิเต;
ตทุคฺคหนิมิตฺตํ ตุ, สมุปฺปนฺนนฺติ วุจฺจติฯ
[406]
ปญฺจทฺวารวินิมุตฺตา , ตมารพฺภ สมาหิตา;
ปริกมฺมสมาธีติ, ภาวนา สา ปกาสิตาฯ
[407]
อุคฺคหาการสมฺภูตํ, วตฺถุธมฺมวิมุจฺจิตํ;
ปฏิภาคนิมิตฺตนฺติ, ภาวนามยมีริตํฯ
[408]
รูปาทิวิสยํ หิตฺวา, ตมารพฺภ ตโต ปรํ;
ภวงฺคนฺตริตํ หุตฺวา, มโนทฺวารํ ปวตฺตติฯ
[409]
สิขาปตฺตสมาธาน-มุปกฺเลสวิมุจฺจิตํ;
อุปจารสมาธีติ, กามาวจรมีริตํฯ
[410]
ปฏิภาคนิมิตฺตมฺหิ, อุปจารสมาธิโต;
ภาวนาพลนิปฺผนฺนา, สมุปฺปชฺชติ อปฺปนาฯ
[411]
ปุริมํ ปุริมํ กตฺวา, วสีภูตํ ตโต ปรํ;
โอฬาริกงฺคโมหาย, สุขุมงฺคปฺปวตฺติยาฯ
[412]
อปฺปนา ปทหนฺตสฺส, ปวตฺตติ ยถากฺกมํ;
วิตกฺกาทิวินิมุตฺตา, วิจาราทิสมายุตาฯ
[413]
อาวชฺชนา จ วสิตา, ตํสมาปชฺชนา ตถา;
วุฏฺฐานาธิฏฺฐานา ปจฺจ-เวกฺขณาติ จ ปญฺจธาฯ
[414]
วิตกฺกญฺจ วิจารญฺจ, สหาติกฺกมโต ปน;
จตุกฺกชฺฌานมปฺเปติ, ปญฺจกญฺจ วิสุํ วิสุํฯ
[415]
อปฺปนาย จ ปจฺเจกฌานสฺสาปิ วิสุํ วิสุํ;
อิจฺฉิตพฺพา หิ สพฺพตฺถ, ปริกมฺมาทิภาวนาฯ
[416]
ตํ ปริตฺตํ มชฺฌิมญฺจ, ปณีตนฺติ วิภชฺชติ;
วิโมกฺโข จ วสีภูตมภิภายตนนฺติ จฯ
[417]
ปริตฺตาทิ ปริตฺตาทิโคจรนฺติ จตุพฺพิธํ;
ทุกฺขาปฏิปทํ ทนฺธาภิญฺญมิจฺจาทิโต ตถาฯ
[418]
ตํ ฉนฺทจิตฺตวีริยวีมํสาธิปฺปเตยฺยโต;
วิเสสฏฺฐิตินิพฺเพธหานภาคิยโตปิ จฯ
[419]
ปญฺจธา ฌานเภเทน, จตุธาลมฺพเภทโต;
สมาธิภาวนาปุญฺญมปฺปนาปตฺตมีริตํฯ
[420]
อิติ วิกฺขมฺภิตกฺเลสํ, รูปโลกูปปตฺติกํ;
รูปาวจรกมฺมนฺติ, วิภาเวนฺติ วิสารทาฯ
[421]
อรูปาวจรกมฺมํ, จตุธารุปฺปสาธนํ;
รูปธมฺมวิภาเคน, ภาวิตนฺติ ปวุจฺจติฯ
[422]
จตุปาริสุทฺธิสีลํ, ธุตงฺคปริวาริตํ;
สีลวิสุทฺธิสงฺขาตํ, ปูรยิตฺวา ตโต ปรํฯ
[423]
ปตฺวา จิตฺตวิสุทฺธิญฺจ, โสปจารสมาธิกํ;
ตถา ทิฏฺฐิวิสุทฺธิญฺจ, นามรูปปริคฺคหํฯ
[424]
กงฺขาวิตรณํ นาม, ปจฺจยฏฺฐิติทสฺสนํ;
วิโสเธตฺวา มคฺคามคฺค-ญาณทสฺสนเมว จฯ
[425]
ตโต ปรํ วิปสฺสนฺโต, วิสุทฺธีสุ สมาหิโต;
สมฺปาเทตฺวา ปฏิปทา-ญาณทสฺสนมุตฺตมํฯ
[426]
ตโต ปปฺโปติ เมธาวี, วิสุทฺธิํ ญาณทสฺสนํ;
จตุมคฺคสมญฺญาตํ, สามญฺญผลทายกํฯ
[427]
ฉพฺพิสุทฺธิกเมเนวํ, ภาเวตพฺพํ ยถากฺกมํ;
กมฺมํ โลกุตฺตรํ นาม, สพฺพทุกฺขกฺขยาวหํฯ
[428]
อิติ ฉนฺนํ จตุกฺกานํ, วสา กมฺมํ วิภาวเย;
เยน กมฺมวิเสเสน, สนฺตานมภิสงฺขตํฯ
[429]
ภูมีภวโยนิคติฐิติวาเสสุ สมฺภวา;
ปฏิสนฺธาทิภาเวน, ปากาย ปริวตฺตติฯ
[430]
สายํ กมฺมสมญฺญาตา, กมฺมชานิ ยถารหํ;
ชเนติ รูปารูปานิ, มโนสญฺเจตนา กถํฯ
[431]
ภูมิ โลกุตฺตรา เจว, โลกิยาติ ทฺวิธา ฐิตา;
ปริตฺตา จ มหคฺคตา, อปฺปมาณาติ เภทิตาฯ
[432]
เอกาทส กามภวา, ภวา โสฬส รูปิโน;
จตฺตาโรรุปฺปกา เจติ, ติวิโธ ภว สงฺคโหฯ
[433]
อสญฺเญโก ภโว เนว-
สญฺญินาสญฺญิโก ภโว;
สพฺโพ สญฺญิภโว เสโส,
เอวมฺปิ ติวิโธ ภโวฯ
[434]
อารุปฺปา จตุโวการา, เอกโวการสญฺญิโน;
ปญฺจโวการโก นาม, ภโว เสโส ปวุจฺจติฯ
[435]
นิรเย โหติ เทเว จ, โยเนกา โอปปาติกา;
อณฺฑชา ชลาพุชา จ, สํเสทโชปปาติกาฯ
[436]
เปตโลเก ติรจฺฉาเน, ภุมฺมเทเว จ มานุเส;
อสุเร จ ภวนฺเตวํ, จตุธา โยนิ สงฺคหาฯ
[437]
คติโย นิรยํ เปตา, ติรจฺฉานา จ มานวา;
สพฺเพ เทวาติ ปญฺจาห, ปญฺจนิมฺมลโลจโนฯ
[438]
ตาวติํเสสุ เทเวสุ, เวปจิตฺตาสุรา คตา;
กาลกญฺจาสุรา นาม, คตา เปเตสุ สพฺพถาฯ
[439]
สนฺธิสญฺญาย นานตฺตา, กายสฺสาปิ จ นานโต;
นานตฺตกายสญฺญีติ, กามสุคฺคติโย มตาฯ
[440]
ปฐมชฺฌานภูมี จ, จตุราปายภูมิโย;
นานตฺตกายเอกตฺต-สญฺญีติ สมุทีริตาฯ
[441]
เอกตฺตกายนานตฺต-สญฺญี ทุติยภูมิกา;
เอกตฺตกายเอกตฺต-สญฺญี อุปริรูปิโนฯ
[442]
วิญฺญาณฏฺฐิติโย สตฺต, ตีหารุปฺเปหิ เหฏฺฐโต;
อสญฺเญตฺถ น คณฺหนฺติ, วิญฺญาณาภาวโต สทาฯ
[443]
จตุตฺถารุปฺปภูมิญฺจ, ปฏุวิญฺญาณหานิโต;
ตํ ทฺวยมฺปิ คเหตฺวาน, สตฺตาวาสา นเวริตาฯ
[444]
เทวา มนุสฺสาปายาติ, ติวิธา กามธาตุโย;
ปฐมชฺฌานภูมาทิ-เภทา ภูมิ จตุพฺพิธาฯ
[445]
ปฐมารุปฺปาทิเภทา, จตุธารุปฺปธาตุโย;
โสตาปนฺนาทิเภเทน, จตุธานุตฺตรา มตาฯ
[446]
นิรยาทิปฺปเภเทน, ภินฺนา ปจฺเจกโต ปุน;
เอกติํสวิธา โหนฺติ, สตฺตานํ ชาติภูมิโยฯ
[447]
เอวํ ภูมาทิเภเทสุ, สตฺตา ชายนฺติ สาสวา;
กมฺมานิ จ วิปจฺจนฺติ, ยถาสมฺภวโต กถํ;
[448]
อปายมฺหา จุตา สตฺตา, กามธาตุมฺหิ ชายเร;
สพฺพฏฺฐาเนสุ ชายนฺติ, เสสกามภวา จุตาฯ
[449]
สุทฺธาวาสา จุตา สุทฺธา-วาเสสุปริ ชายเร;
อสญฺญิมฺหา จุตา กาม-สุคติมฺโหปปชฺชเรฯ
[450]
เสสรูปา จุตา สตฺตา, ชายนฺตาปายวชฺชิเต;
อารุปฺปโตปริ กาม-สุคติมฺหิ ตหิมฺปิ จฯ
[451]
ปุถุชฺชนาว ชายนฺติ, อสญฺญาปายภูมิสุ;
สุทฺธาวาเสสุ ชายนฺติ, อนาคามิกปุคฺคลาฯ
[452]
เวหปฺผเล อกนิฏฺเฐ, ภวคฺเค จ ปติฏฺฐิตา;
น ปุนญฺญตฺถ ชายนฺติ, สพฺเพ อริยปุคฺคลาฯ
[453]
พฺรหฺมโลกคตา เหฏฺฐา, อริยา โนปปชฺชเร;
ทุกฺขมูลสมุจฺเฉทา, ปรินิพฺพนฺตินาสวาฯ
[454]
ชายนฺตานญฺจ ชาตาน-มิติ วุตฺตนิยามโต;
ปวตฺตาตีตกํ กมฺมํ, ปฏิสนฺธิปวตฺติยํฯ
[455]
อรูปํ จตุโวกาเร, รูปเมว อสญฺญิสุ;
ชเนติ รูปารูปานิ, ปญฺจโวการภูมิยํฯ
[456]
อารุปฺปานุตฺตรํ กมฺมํ, ปากเมว วิปจฺจติ;
กฏตฺตารูปปากานิ, กามรูปนิยามิตํฯ
[457]
กาโลปธิปฺปโยคานํ, คติยา จ ยถารหํ;
สมฺปตฺติญฺจ วิปตฺติญฺจ, กมฺมมาคมฺม ปจฺจติฯ
[458]
อปาเย สนฺธิมุทฺธจฺจ-หีนา ทตฺวา ปวตฺติยํ;
สพฺพาปิ ปญฺจโวกาเร, ทฺวาทสาปุญฺญเจตนาฯ
[459]
สตฺตากุสลปากานิ, วิปจฺจนฺติ ยถารหํ;
กามาวจรปุญฺญานิ, กาเมสุคติยํ ปนฯ
[460]
สเหตุกานิ ปากานิ, ปฏิสนฺธิปวตฺติยํ;
ชเนนฺติ ปญฺจโวกาเร, อเหตุปิ ยถารหํฯ
[461]
ติเหตุปุญฺญมุกฺกฏฺฐํ, ปฏิสนฺธิํ ติเหตุกํ;
ทตฺวา โสฬส ปากานิ, ปวตฺเต ตุ วิปจฺจติฯ
[462]
ติเหตุโกมกุกฺกฏฺฐํ, ทฺวิเหตุ จ ทฺวิเหตุกํ;
สนฺธิํ เทติ ปวตฺเต ตุ, ติเหตุกวิวชฺชิตํฯ
[463]
ทฺวิเหตุโกมกํ ปุญฺญํ, ปฏิสนฺธิมเหตุกํ;
ทตฺวาเหตุกปากานิ, ปวตฺเต ตุ วิปจฺจติฯ
[464]
อสงฺขารํ สสงฺขาร-วิปากานิ น ปจฺจติ;
สสงฺขารมสงฺขาร-วิปากานีติ เกจนฯ
[465]
ปริตฺตํ ปฐมชฺฌานํ, มชฺฌิมญฺจ ปณีตกํ;
ภาเวตฺวา ชายเร พฺรหฺม-ปาริสชฺชาทิ ตีสุปิฯ
[466]
ตเถว ทุติยชฺฌานํ, ตติยญฺจ ยถากฺกมํ;
ภาเวตฺวา ชายเร ฌานํ, ปริตฺตาภาทิ ตีสุปิฯ
[467]
ตถา จตุตฺถํ ติวิธํ, ภาเวตฺวาน สมาหิตา;
ปริตฺตสุภาทิเกสุ, ตีสุ ชายนฺติ โยคิโนฯ
[468]
ปญฺจมํ ปน ภาเวตฺวา, โหนฺติ เวหปฺผลูปคา;
สญฺญาวิราคํ ภาเวตฺวา, อสญฺญีสูปปชฺชเรฯ
[469]
สุทฺธาวาเสสุ ชายนฺติ, อนาคามิกปุคฺคลา;
อารุปฺปานิ ตุ ภาเวตฺวา, อารุปฺเปสุ ยถากฺกมํฯ
[470]
เอวํ มหคฺคตํ ปุญฺญํ, ยถาภูมิววตฺถิตํ;
ชเนติ สทิสํ ปากํ, ปฏิสนฺธิปวตฺติยํฯ
[471]
โลกุตฺตรานิ ปุญฺญานิ, อุปฺปนฺนานนฺตรํ ปน;
สมาปตฺติกฺขเณ เจว, ชเนนฺติ สทิสํ ผลํฯ
[472]
มหคฺคตานนฺตริยํ, ปริปกฺกสภาวโต;
อนนฺตรภวาตีตํ, กาลาตีตํ น ปจฺจติฯ
[473]
สุขุมาลสภาวา จ, สุขุมตฺตา มหคฺคตา;
สนฺตาเน น วิปจฺจนฺติ, ปฏิปกฺเขหิ ทูสิเตฯ
[474]
สมานาเสวเน ลทฺเธ, วิชฺชมาเน มหพฺพเล;
อลทฺธา ตาทิสํ เหตุํ, อภิญฺญา น วิปจฺจติฯ
[475]
สกํ ภูมิมตีตานํ, น วิปจฺจตานุตฺตรํ;
กมฺมนฺตรสฺสธิฏฺฐานา, สนฺตานสฺเสติ ทีปิตํฯ
[476]
อิติ เตตฺติํส กมฺมานิ, ปากา ฉตฺติํส ภาสิตา;
จิตฺตุปฺปาทา กฺริยา เสสา, กฺริยามตฺตปฺปวตฺติโตฯ
[477]
จิตฺตุปฺปาทวเสเนวเมกูนนวุตีวิธา ;
เตปญฺญาส สภาเวน, จิตฺตเจตสิกา มตาฯ
[478]
อิติ จิตฺตํ เจตสิกํ, นิพฺพานนฺติ นรุตฺตโร;
นามํ ติธา ปกาเสสิ, จกฺขุมา วทตํ วโรฯ
[479]
อิติ กมฺมวิปากปณฺฑิตา, มิตกมฺมวิปากสาสเน;
หิตกมฺมวิปากปารคู, จตุกมฺมวิปากมพฺรวุํฯ
[480]
ยตฺถายํ ปรมตฺถวตฺถุนิยเม ตุลฺเยน พาหุลฺยโต,
อตฺถานตฺถวิจารณํ ปติ ชโน สมฺโมหมาปาทิโต;
พุทฺโธ โพธิตเล ยมาห สุคโต คนฺตฺวาน เทวาลยํ,
สฺวายํ กมฺมวิปากนิจฺฉยนโย สงฺเขปโต ทีปิโตฯ
อิติ นามรูปปริจฺเฉเท กมฺมวิภาโค นาม
ปญฺจโม ปริจฺเฉโทฯ
6. ฉฏฺโฐ ปริจฺเฉโท
รูปวิภาโค
[481]
อิติ ปญฺจปริจฺเฉท-ปริจฺฉินฺนตฺถสงฺคหํ;
นามธมฺมมเสเสน, วิภาเวตฺวา สภาวโตฯ
[482]
สปฺปเภทํ ปวกฺขามิ, รูปธมฺมมิโต ปรํ;
ภูโตปาทายเภเทน, ทุวิธมฺปิ ปกาสิตํฯ
[483]
อุทฺเทสลกฺขณาทีหิ, วิภาคชนกา ตถา;
กลาปุปฺปตฺติโต จาปิ, ยถานุกฺกมโต กถํ?
[484]
รุปฺปตีติ ภเว รูปวิการปฺปจฺจเยสติ;
รูปรูปํ ตถา รูปปริยาปนฺนโตปรํฯ
[485]
ภูตรูปํ ตุ ปถวี, อาโป เตโช ตถาปโร;
วาโย จ ภวตูปาทารูปเมตฺถาติ ภาสิตํฯ
[486]