มิจฺจาภิธมฺมมวคาหิตสพฺพธมฺมํ ;
โอคยฺห นามคตราสิมเสสยิตฺวา,
สงฺคยฺห สพฺพมิธ โยชิตมาทเรนฯ
อิติ นามรูปปริจฺเฉเท นามตฺตยวิภาโค นาม
ปฐโม ปริจฺเฉโทฯ
2. ทุติโย ปริจฺเฉโท
ลกฺขณรสุปฏฺฐานวิภาโค
[67]
สภาโว ลกฺขณํ นาม, กิจฺจสมฺปชฺชนา รโส;
คยฺหากาโร อุปฏฺฐานํ, ปทฏฺฐานํ ตุ ปจฺจโยฯ
[68]
อตฺตุปลทฺธิสงฺขาตา, สมฺปตฺตา จ ปนตฺถโต;
ลกฺขณรสุปฏฺฐานา, โวหาราโภคเภทิตาฯ
[69]
เตปญฺญาสสภาเวสุ, ตสฺมา เภทํ ยถารหํ;
ลกฺขณาทิปฺปกาเรหิ, ปวกฺขามิ อิโต ปรํฯ
[70]
จินฺเตตีติ ภเว จิตฺตํ, จินฺตนมตฺตเมว วา;
สมฺปยุตฺตาถ วา เตน, จินฺเตนฺตีติ จ โคจรํฯ
[71]
ผุสตีติ ภเว ผสฺโส, ผุสนํ วาถ เกวลํ;
สมฺปยุตฺตาถ วา เตน, ผุสนฺตีติ จ โคจรํฯ
[72]
เอวํ กตฺตริ ภาเว จ, กรเณ จ ยถารหํ;
เตปญฺญาสสภาเวสุ, สทฺทนิพฺพจนํ นเยฯ
[73]
อาลมฺพณมนํ จิตฺตํ, ตํวิชานนลกฺขณํ;
สหชาธิฏฺฐานรสํ, จินฺตากปฺโปติ คยฺหติฯ
[74]