ตํ ตมาวชฺชมานสฺส, ภาวนา ปริหายติ;
อสตฺเต สตฺตสญฺญี จ, โหติ อปฺปสฺสุโต นโรฯ
[1294]
สพฺโพภาสาทโย ธมฺเม, น มคฺโคติ วิจารยํ;
มคฺโค วิปสฺสนาญาณํ, อิจฺเจวํ ปน ปณฺฑิโตฯ
[1295]
ววตฺถเปติ มคฺคญฺจ, อมคฺคญฺเจว เจตสา;
ตสฺส เจวํ อยํ มคฺโค, นายํ มคฺโคติ โยคิโนฯ
[1296]
มคฺคามคฺคญฺจ วิญฺญาย, ฐิตญาณมิทํ ปน;
มคฺคามคฺเคสุญาณนฺติ, ภูริญาเณน เทสิตํฯ
[1297]
มคฺคามคฺคญาณทสฺสเนสุ โกวิทา,
สาราสารเวทิโน สมาหิตาหิตา;
มคฺคามคฺคญาณทสฺสนนฺติ ตํ อิทํ,
พุทฺธา พุทฺธสาวกา วทนฺติ วาทิโนฯ
อิติ อภิธมฺมาวตาเร มคฺคามคฺคญาณทสฺสนวิสุทฺธินิทฺเทโส
นาม วีสติโม ปริจฺเฉโทฯ
21. เอกวีสติโม ปริจฺเฉโท
ปฏิปทาญาณทสฺสนวิสุทฺธินิทฺเทโส
[1298]
อฏฺฐญาณวเสเนว , สิขาปกฺกา วิปสฺสนา;
นวมํ ปฏิปทาญาณ-ทสฺสนนฺติ ปวุจฺจติฯ
[1299]
อฏฺฐ ญาณานิ นาเมตฺถ, เวทิตพฺพานิ วิญฺญุนา;
อุปกฺเลสวินิมุตฺตํ, ญาณํ สุวิสทํ ปนฯ
[1300]
อุทยพฺพเย จ ภงฺเค จ, ภเย อาทีนเว ตถา;
นิพฺพิทาปสฺสนาญาณํ, ญาณํ มุจฺจิตุกมฺยตาฯ
[1301]
ปฏิสงฺขา จ สงฺขาเร, อุเปกฺขาญาณมฏฺฐมํ;
อิมานิ อฏฺฐ ญาณานิ, นวมํ สจฺจานุโลมกํฯ
[1302]
สจฺจานุโลมญาณนฺติ , อนุโลมํ ปวุจฺจติ;
ตํ สมฺปาเทตุกาเมน, โยคาวจรภิกฺขุนาฯ
[1303]
อุทยพฺพยญาณํ ตํ, อาทิํ กตฺวา ปนฏฺฐสุ;
เอเตสุ ปน ญาเณสุ, โยโค กรณิโย ปนฯ
[1304]
ยถานุกฺกมโต ตสฺส, เตสุ ญาเณสุ อฏฺฐสุ;
อนิจฺจาทิวเสเนว, โยคํ กตฺวา ฐิตสฺส หิฯ
[1305]
อนิจฺจํ ทุกฺขมนตฺตาติ, สงฺขาเร อนุปสฺสโต;
อฏฺฐนฺนํ ปน ญาณานํ, วเสน ปน โยคิโนฯ
[1306]
วิปสฺสนา สิขาปตฺตา, โหติ วุฏฺฐานคามินี;
สจฺจานุโลมญาณนฺติ, อยเมว ปวุจฺจติฯ
[1307]
สงฺขารุเปกฺขาญาณํ ตํ, อาเสวนฺตสฺส โยคิโน;
อิทานิ ตสฺส มคฺโค จ, สมุปฺปชฺชิสฺสตีติ หิฯ
[1308]
สงฺขารุเปกฺขา สงฺขาเร, อนิจฺจา ทุกฺขาติ วา ตถา;
สมฺมสิตฺวา ภวงฺคํ ตุ, ปุน โวตรเตว สาฯ
[1309]
ภวงฺคานนฺตรํ สงฺขารุ-เปกฺขาคตนเยน ตุ;
อนิจฺจาทิวเสเนว, สงฺขาเร ปน โคจรํฯ
[1310]
กุรุมานํ มโนทฺวาเร, ชายตาวชฺชนํ ตโต;
ภวงฺคาวฏฺฏนํ กตฺวา, ชาตสฺสานนฺตรํ ปนฯ
[1311]
สงฺขาเร โคจรํ กตฺวา, ปฐมํ ชวนมานสํ;
อุปฺปชฺชตีติ ตํ จิตฺตํ, ปริกมฺมนฺติ วุจฺจติฯ
[1312]
ตทนนฺตรเมวญฺญํ, สงฺขารารมฺมณํ ปุน;
ทุติยํ ชวนํ โหติ, อุปจารนฺติ ตํ มตํฯ
[1313]
ตทนนฺตรํ ตํ โหติ, ตถา สงฺขารโคจรํ;
ตติยํ ชวนจิตฺตํ, อนุโลมนฺติ สญฺญิตํฯ
[1314]
ปุริมานํ ปนฏฺฐนฺนํ, ญาณานํ อนุโลมโต;
โพธิปกฺขิยธมฺมานํ, อุทฺธญฺจ อนุโลมโตฯ
[1315]
เตเนว ตํ หิ สจฺจานุโลมญาณํ ปวุจฺจติ;
อิทํ หิ ปน สจฺจานุ-โลมญาณํ มเหสินาฯ
[1316]
‘‘วุฏฺฐานคามินียา หิ, ปริโยสาน’’นฺติ ภาสิตํ;
เญยฺยํ สพฺพปกาเรน, ปริโยสานนฺติ โคตฺรภุฯ
[1317]
อิติเนเกหิ นาเมหิ, กิตฺติตายา มเหสินา;
วุฏฺฐานคามินี สนฺตา, ปริสุทฺธา วิปสฺสนาฯ
[1318]
วุฏฺฐาตุกาโม สํสารทุกฺขปงฺกา มหพฺภยา;
กเรยฺย สตตํ ตตฺถ, โยคํ ปณฺฑิตชาติโกฯ
อิติ อภิธมฺมาวตาเร ปฏิปทาญาณทสฺสนวิสุทฺธินิทฺเทโส นาม
เอกวีสติโม ปริจฺเฉโทฯ
22. พาวีสติโม ปริจฺเฉโท
ญาณทสฺสนวิสุทฺธินิทฺเทโส
[1319]
อิโต ปรํ ตุ ภิกฺขุสฺส, โหติ โคตฺรภุมานสํ;
อาวชฺชนิยฐานตฺตา, มคฺคจิตฺตสฺส ตํ ปนฯ
[1320]
น จปฺปฏิปทาญาณ-ทสฺสนํ วา ตเถว จ;
ญาณทสฺสนสุทฺธิํ วา, ภชเต น กุทาจนํฯ
[1321]
อุภินฺนมนฺตรา เอตํ, อพฺโพหาริกเมว ตํ;
วิปสฺสนาย โสตสฺมิํ, ปติตตฺตา วิปสฺสนาฯ
[1322]
โปถุชฺชนิกโคตฺตํ วา, อภิภุยฺย ปวตฺติโต;
โคตฺตํ วุจฺจติ นิพฺพานํ, ตโต ภวติ โคตฺรภุฯ
[1323]
ญาณํ จตูสุ มคฺเคสุ, ญาณทสฺสนสุทฺธิกํ;
ตตฺถ ตํ ปฐมํ มคฺคํ, สมฺปาเทตุํ ปนิจฺฉตาฯ
[1324]