เมนู

1. ปจฺจยตากถาวณฺณนา

[711-717] ววตฺถิโตติ อสํกิณฺโณฯ โย หิ ธมฺโม เยน ปจฺจยภาเวน ปจฺจโย โหติ, ตสฺส ตโต อญฺเญนปิ ปจฺจยภาเว สติ ปจฺจยตา สํกิณฺณา นาม ภเวยฺยฯ วิรุทฺธาสมฺภวีนํ วิย ตพฺพิธุรานํ ปจฺจยภาวานํ สหภาวํ ปฏิกฺขิปติฯ

ปจฺจยตากถาวณฺณนา นิฏฺฐิตาฯ

2. อญฺญมญฺญปจฺจยกถาวณฺณนา

[718-719] สหชาตาติ วุตฺตตฺตา น สงฺขารปจฺจยา จ อวิชฺชาติ วุตฺตตฺตาติ อธิปฺปาโยฯ อนนฺตราทินาปิ หิ สงฺขารา อวิชฺชาย ปจฺจยา โหนฺติเยวฯ อญฺญมญฺญานนฺตรํ อวตฺวา อวิคตานนฺตรํ สมฺปยุตฺตสฺส วจนํ กมเภโท, อตฺถิคฺคหเณเนว คหิโต อตฺถิปจฺจยภูโตเยว ธมฺโม นิสฺสยปจฺจโย โหตีติฯ อสาธารณตายาติ ปทนฺตราสาธารณตายฯ เตนาห ‘‘วกฺขติ หี’’ติอาทิฯ

อญฺญมญฺญปจฺจยกถาวณฺณนา นิฏฺฐิตาฯ

9. ตติยสญฺญาเวทยิตกถาวณฺณนา

[732] ยทิปิ เสสํ นาม คหิตโต อญฺญํ, ตถาปิ ปกรณปริจฺฉินฺนเมเวตฺถ ตํ คยฺหตีติ ทสฺเสนฺโต ‘‘เยสํ…เป.… อธิปฺปาโย’’ติ วตฺวา ปุน อนวเสสเมว สงฺคณฺหนฺโต ‘‘อสญฺญสตฺตานมฺปิ จา’’ติอาทิมาหฯ ตตฺถ สพฺพสตฺเต สนฺธายาติ อธิปฺปาโยติ โยชนาฯ ปาณิสมฺผสฺสาปิ กมนฺตีติอาทิกํ สรีรปกตีติ สมฺพนฺโธฯ

[733-734] ปญฺจหิ วิญฺญาเณหิ น จวติ, น อุปปชฺชตีติ วาทํ ปรวาที นานุชานาตีติ อาห ‘‘สุตฺต…เป.… วตฺตพฺพ’’นฺติฯ

ตติยสญฺญาเวทยิตกถาวณฺณนา นิฏฺฐิตาฯ

10. อสญฺญสตฺตุปิกากถาวณฺณนา

[735] ยถา วิตกฺกวิจารปีติสุขวิราควเสน ปวตฺตา สมาปตฺติ วิตกฺกาทิรหิตา โหติ, เอวํ สญฺญาวิราควเสน ปวตฺตาปิ สญฺญารหิตาว สิยาติ ตสฺส ลทฺธีติ ทสฺเสนฺโต อาห ‘‘สาปิ อสญฺญิตา…เป.… ทสฺเสตี’’ติฯ

[736] ยทิ จตุตฺถชฺฌานสมาปตฺติ กถํ อสญฺญสมาปตฺตีติ โจทนํ สนฺธายาห ‘‘สญฺญาวิราควเสน สมาปนฺนตฺตา อสญฺญิตา, น สญฺญาย อภาวโต’’ติฯ

อสญฺญสตฺตุปิกากถาวณฺณนา นิฏฺฐิตาฯ

11. กมฺมูปจยกถาวณฺณนา

[738-739] ‘‘กมฺมูปจโย กมฺเมน สหชาโต’’ติ ปุฏฺโฐ สมฺปยุตฺตสหชาตตํ สนฺธาย ปฏิกฺขิปติ, วิปฺปยุตฺตสหชาตตํ สนฺธาย ปฏิชานาตีติฯ วิปฺปยุตฺตสฺสปิ หิ อตฺถิ สหชาตตา จิตฺตสมุฏฺฐานรูปสฺส วิยาติ อธิปฺปาโยฯ

[741] ติณฺณนฺติ กมฺมกมฺมูปจยกมฺมวิปากานํฯ

กมฺมูปจยกถาวณฺณนา นิฏฺฐิตาฯ

ปนฺนรสมวคฺควณฺณนา นิฏฺฐิตาฯ

ตติโย ปณฺณาสโก สมตฺโตฯ

16. โสฬสมวคฺโค

3. สุขานุปฺปทานกถาวณฺณนา

[747-748] น ตสฺสาติ ยสฺส ตํ อนุปฺปทิสฺสติ, น ตสฺสฯ โย หิ อนุปฺปเทติ, ยสฺส จ อนุปฺปเทติ, ตทุภยวินิมุตฺตา อิธ ปเรติ อธิปฺเปตาฯ

สุขานุปฺปทานกถาวณฺณนา นิฏฺฐิตาฯ