เมนู

3. อนนฺตรปจฺจยกถาวณฺณนา

[693-697] อนนฺตรุปฺปตฺติํ สลฺลกฺเขนฺโตติ จกฺขุวิญฺญาณานนฺตรํ โสตวิญฺญาณุปฺปตฺติํ มญฺญมาโนฯ โสตวิญฺญาณนฺติ วจเนเนว ตสฺส จกฺขุสนฺนิสฺสยตา รูปารมฺมณตา จ ปฏิกฺขิตฺตา, ปฏิญฺญาตา จ โสตสนฺนิสฺสยตา สทฺทารมฺมณตา จาติ อาห ‘‘น โส จกฺขุมฺหิ สทฺทารมฺมณ’’นฺติฯ ตตฺถ สทฺทารมฺมณนฺติ ‘‘โสตวิญฺญาณํ อิจฺฉตี’’ติ อาเนตฺวา สมฺพนฺธิตพฺพํฯ ตยิทํ จกฺขุวิญฺญาณสฺส อนนฺตรํ โสตวิญฺญาณํ อุปฺปชฺชตีติ ลทฺธิยา เอวํ ญายตีติ อาห ‘‘อนนฺตรูปลทฺธิวเสน อาปนฺนตฺตา’’ติฯ

อนนฺตรปจฺจยกถาวณฺณนา นิฏฺฐิตาฯ

4. อริยรูปกถาวณฺณนา

[698-699] สมฺมาวาจาทีติ สมฺมาวาจากมฺมนฺตาฯ ตตฺถ สมฺมาวาจา สทฺทสภาวา, อิตโร จ กายวิญฺญตฺติสภาโว, อุภยมฺปิ วา วิญฺญตฺตีติ อธิปฺปาเยน รูปนฺติสฺส ลทฺธิฯ

อริยรูปกถาวณฺณนา นิฏฺฐิตาฯ

5. อญฺโญอนุสโยติกถาวณฺณนา

[700-701] ตสฺมิํ สมเยติ กุสลาพฺยากตจิตฺตกฺขเณฯ โส หีติ ปจฺฉิมปาโฐฯ

อญฺโญอนุสโยติกถาวณฺณนา นิฏฺฐิตาฯ

6. ปริยุฏฺฐานํจิตฺตวิปฺปยุตฺตนฺติกถาวณฺณนา

[702] เตติ ราคาทโยฯ ตสฺมาติ ยสฺมา วิปสฺสนฺตสฺสปิ ราคาทโย อุปฺปชฺชนฺติ, ตสฺมาฯ

ปริยุฏฺฐานํจิตฺตวิปฺปยุตฺตนฺติกถาวณฺณนา นิฏฺฐิตาฯ

7. ปริยาปนฺนกถาวณฺณนา

[703-705] กิเลสวตฺถุโอกาสวเสนาติ กิเลสกามวตฺถุกามภูมิวเสนฯ รูปธาตุสหคตวเสน อนุเสตีติ กามราโค ยถา กามวิตกฺกสงฺขาตาย กามธาตุยา สห ปจฺจยสมวาเย อุปฺปชฺชนารโห, ตเมว รูปธาตุยาปีติ อตฺโถฯ ราคาทิการณลาเภ อุปฺปตฺติอรหตา หิ อนุสยนํฯ

ปริยาปนฺนกถาวณฺณนา นิฏฺฐิตาฯ

8. อพฺยากตกถาวณฺณนา

[706-608] สพฺพถาปีติ อวิปากภาเวนปิ สสฺสตาทิภาเวนปิฯ

อพฺยากตกถาวณฺณนา นิฏฺฐิตาฯ

9. อปริยาปนฺนกถาวณฺณนา

[709-710] ตสฺมา ทิฏฺฐิ โลกิยปริยาปนฺนา น โหตีติ อตฺถํ วทนฺติ, เอวํ สติ อติปฺปสงฺโค โหติ วีตโทสาทิโวหารภาวโตติฯ ตโต อญฺญถา อตฺถํ วทนฺโต ‘‘รูปทิฏฺฐิยา’’ติอาทิมาหฯ ตตฺถ อาทิ-สทฺเทน อรูปทิฏฺฐิอาทิํ สงฺคณฺหาติฯ ปรวาทิอธิปฺปายวเสน อยมตฺถวิภาวนาติ อาห ‘‘ยทิ จ ปริยาปนฺนา สิยา’’ติฯ ตถา จ สตีติ ทิฏฺฐิยา กามธาตุปริยาปนฺนตฺเต สตีติ อตฺโถฯ ตสฺมาติ ‘‘วีตทิฏฺฐิโก’’ติ เอวํ โวหาราภาวโตฯ น หิ สา ตสฺส อวิคตา ทิฏฺฐิ, ยโต โส วีตทิฏฺฐิโกติ น วุจฺจติฯ เยนาติ กามทิฏฺฐิภาเวนฯ

อปริยาปนฺนกถาวณฺณนา นิฏฺฐิตาฯ

จุทฺทสมวคฺควณฺณนา นิฏฺฐิตาฯ

15. ปนฺนรสมวคฺโค