1. สงฺคหิตกถาวณฺณนา

[471-472] สงฺคหิตาติ สงฺคหณาทิวเสน สทฺธิํ คหิตาฯ เต ปน ยสฺมา เอกวิธตาทิสามญฺเญน พนฺธา วิย โหนฺติ, ตสฺมา อาห ‘‘สมฺพนฺธา’’ติฯ

สงฺคหิตกถาวณฺณนา นิฏฺฐิตาฯ

2. สมฺปยุตฺตกถาวณฺณนา

[473-474] อนุปฺปวิสิตพฺพานุปฺปวิสนภาโว เตสํ เภเท สติ ยุชฺเชยฺย, นาญฺญถาติ อุปมาภินฺทเนน อุปเมยฺยสฺส ภินฺนตํ ทสฺเสนฺโต ‘‘นานตฺตววตฺถา…เป.… ทสฺเสตี’’ติ อาหฯ

สมฺปยุตฺตกถาวณฺณนา นิฏฺฐิตาฯ

3. เจตสิกกถาวณฺณนา

[475-477] ผสฺสิกาทโยติ เอตฺถ อาทิ-สทฺโท ววตฺถาวาจีฯ เตน จิตฺตุปฺปาทเทสนายํ ทสฺสิตปฺปเภทา เวทนาทโย คยฺหนฺติ, น ตํสมุฏฺฐานา รูปธมฺมาติ อาห ‘‘เอกุปฺปาทตาทิวิรหิตา สหชาตตา นตฺถี’’ติฯ

เจตสิกกถาวณฺณนา นิฏฺฐิตาฯ

4. ทานกถาวณฺณนา

[479] ผลทานภาวทีปนตฺถนฺติ ผลทานสพฺภาวทีปนตฺถํฯ ผลทานํ วุตฺตํ วิย โหตีติ จิตฺเตน ผลทานํ ปธานภาเว วุตฺตํ วิย โหตีติ อตฺโถฯ อญฺญถา ทานภาโวติ น สกฺกา วตฺตุํฯ ทานภาโวปิ หิ ‘‘ทานํ อนิฏฺฐผล’’นฺติอาทินา วุตฺโตเยวาติฯ ตนฺนิวารณตฺถนฺติ ผลทานนิวารณตฺถํฯ เอตนฺติ ‘‘ทานํ อนิฏฺฐผล’’นฺติอาทิวจนํฯ เภสชฺชาทิวเสน อาพาธานิฏฺฐตา เทยฺยธมฺมสฺส อนิฏฺฐผลตาปริยาโย ทฏฺฐพฺโพฯ

กถํ ตเถว สุตฺตํ สกวาทิปรวาทิวาเทสุ ยุชฺชตีติ โจทนาย ‘‘น ปน เอเกนตฺเถนา’’ติ วุตฺตํ วิภาเวตุํ ‘‘เทยฺยธมฺโมว ทาน’’นฺติอาทิ วุตฺตํฯ ตตฺถ นิวตฺตนปกฺเขเยว เอว-กาโร ยุตฺโต, น สาธนปกฺเข ทฺวินฺนมฺปิ ทานภาวสฺส อิจฺฉิตตฺตาฯ เตนาห ‘‘เจตสิโกวาติ อตฺโถ ทฏฺฐพฺโพ, เทยฺยธมฺโมวา’’ติ จฯ เตเนวาห ‘‘ทฺวินฺนญฺหิ ทานานนฺติอาทิฯ สงฺกรภาวโมจนตฺถนฺติ สติปิ ทานภาเว สภาวสงฺกรโมจนตฺถํฯ เตนาห ‘‘เจตสิกสฺสา’’ติอาทิฯ

ทานกถาวณฺณนา นิฏฺฐิตาฯ

5. ปริโภคมยปุญฺญกถาวณฺณนา

[485] ตสฺสา ลทฺธิยาติ ปญฺจนฺนํ วิญฺญาณานํ สโมธานํ โหตีติ ลทฺธิยาฯ เอเตสนฺติ วตฺตมานจิตฺตปริโภคมยปุญฺญานํฯ

[486] อยํ วาโท หียติ ปริโภคสฺเสว อภาวโตฯ จาคเจตนาย เอว ปุญฺญภาโว, น จิตฺตวิปฺปยุตฺตสฺสฯ เอวนฺติ อิมินา ปกาเรน, อปริภุตฺเต เทยฺยธมฺเม ปุญฺญภาเวนาติ อตฺโถฯ อปริภุตฺเต เทยฺยธมฺเม ปุญฺญภาวโต เอว หิ ปุถุชฺชนกาเล ทินฺนํ อรหา หุตฺวา ปริภุญฺชนฺเต ตมฺปิ ปุถุชฺชเน ทานเมวาติ นิจฺฉิตํฯ ปรวาทีปฏิกฺเขปมุเขน สกวาทํ ปติฏฺฐาเปติ ปฐโม อตฺถวิกปฺโป, ทุติโย ปน อุชุกเมว สกวาทํ ปติฏฺฐาเปตีติ อยเมเตสํ วิเสโสฯ

ปริโภคมยปุญฺญกถาวณฺณนา นิฏฺฐิตาฯ