เมนู

5. ปฏิสมฺภิทากถาวณฺณนา

[432-433] สพฺพํ ญาณนฺติ อิทํ ‘‘อริยาน’’นฺติ อิมินา น วิเสสิตนฺติ อธิปฺปาเยนาห ‘‘อนริยานมฺปิ หิ ญาณํ ญาณเมวา’’ติฯ อถ วา ปาฬิยํ อวิเสเสน สพฺพํ ญาณนฺติ วุตฺตํ คเหตฺวา เอวมาหฯ อริยสฺส เจ ญาณนฺติ, โส ปน ปฏิกฺเขเปยฺยาติ อาห ‘‘อนริยสฺส เอตํ ญาณํ สนฺธายา’’ติฯ

ปฏิสมฺภิทากถาวณฺณนา นิฏฺฐิตาฯ

7. จิตฺตารมฺมณกถาวณฺณนา

[436-438] วตฺตพฺพปฏิญฺญาติ ผสฺสารมฺมเณ ญาณํ วตฺตพฺพํ เจโตปริยญาณนฺติ เอวํ ปวตฺตา ปฏิญฺญาฯ

จิตฺตารมฺมณกถาวณฺณนา นิฏฺฐิตาฯ

8. อนาคตญาณกถาวณฺณนา

[439-440] อนนฺตรานาคเตปิ จิตฺเต ญาณํ อิจฺฉนฺติ, ตตฺถ ปน ขณปจฺจุปฺปนฺเน วิย ตาทิเสน ปริกมฺเมน กทาจิ ญาณํ อุปฺปชฺเชยฺยฯ เตนาห ‘‘อนนฺตเร เอกนฺเตเนว ญาณํ นตฺถี’’ติฯ

อนาคตญาณกถาวณฺณนา นิฏฺฐิตาฯ

9. ปฏุปฺปนฺนญาณกถาวณฺณนา

[441-442] ‘‘สพฺพสงฺขาเรสุ อนิจฺจโต ทิฏฺเฐสู’’ติ วุตฺเต ยํ ทสฺสนภูตํ ญาณํ, ตมฺปิ สงฺขารสภาวตฺตา ตถาทิฏฺฐํ สิยาติ อตฺถโต อาปชฺชติ, เอวํภูตํ วจนํ สนฺธายาห ‘‘อตฺถโต อาปนฺนํ วจน’’นฺติฯ ตํ ปน ยสฺมา ‘‘ตมฺปิ ญาณํ อนิจฺจโต ทิฏฺฐํ โหตี’’ติ ปฏิชานนวเสน ปวตฺตํ, ตสฺมา ‘‘อนุชานนวจน’’นฺติ วุตฺตํฯ ภงฺคานุปสฺสนานํ ปพนฺธวเสน ปวตฺตมานานํฯ

ปฏุปฺปนฺนญาณกถาวณฺณนา นิฏฺฐิตาฯ

10. ผลญาณกถาวณฺณนา

[443-444] ผลปโรปริยตฺตํ ผลสฺส อุจฺจาวจตาฯ พเลนาติ ญาณพเลนฯ

ผลญาณกถาวณฺณนา นิฏฺฐิตาฯ

ปญฺจมวคฺควณฺณนา นิฏฺฐิตาฯ

มหาปณฺณาสโก สมตฺโตฯ

6. ฉฏฺฐวคฺโค

1. นิยามกถาวณฺณนา

[445-447] เอตสฺส อริยสฺส ปุคฺคลสฺสฯ

นิยามกถาวณฺณนา นิฏฺฐิตาฯ

2. ปฏิจฺจสมุปฺปาทกถาวณฺณนา

[451] การณฏฺเฐน ฐิตตาติ การณภาเวน พฺยภิจรณาภาวมาหฯ โย หิ ธมฺโม ยสฺส ธมฺมสฺส ยทา การณํ โหติ, น ตสฺส ตทา อญฺญถาภาโว อตฺถิ, สา จ อตฺถโต การณภาโวเยวาติ ‘‘การณภาโวเยวา’’ติ อาหฯ

ปฏิจฺจสมุปฺปาทกถาวณฺณนา นิฏฺฐิตาฯ

5. นิโรธสมาปตฺติกถาวณฺณนา

[457-459] สภาวธมฺมตํ ปฏิเสเธติ ตทุภยลกฺขณรหิตสฺส สภาวธมฺมสฺส อภาวาฯ ‘‘โวทานมฺปิ วุฏฺฐาน’’นฺติ วจนโต ‘‘โวทานญฺจ วุฏฺฐานปริยาโยวา’’ติ อาหฯ สภาวธมฺมตฺเต สิทฺเธ สงฺขตวิทูรตาย อสงฺขตํ สิยาติ อาห ‘‘สภาวธมฺมตฺตาสาธกตฺตา’’ติฯ

นิโรธสมาปตฺติกถาวณฺณนา นิฏฺฐิตาฯ

ฉฏฺฐวคฺควณฺณนา นิฏฺฐิตาฯ

7. สตฺตมวคฺโค