เมนู

11. อวิญฺญตฺติทุสฺสีลฺยนฺติกถาวณฺณนา

[603-604] อาณตฺติยา จ ปาณาติปาตาทีสุ องฺคปาริปูรินฺติ เอกสฺมิํ ทิวเส อาณตฺตสฺส อปรสฺมิํ ทิวเส ปาณาติปาตํ กโรนฺตสฺส ตทา สา อาณตฺติ วิญฺญตฺติํ วินาเยว องฺคํ โหตีติ อวิญฺญตฺติ ทุสฺสีลฺยนฺติ อธิปฺปาโยฯ

อวิญฺญตฺติทุสฺสีลฺยนฺติกถาวณฺณนา นิฏฺฐิตาฯ

ทสมวคฺควณฺณนา นิฏฺฐิตาฯ

ทุติโย ปณฺณาสโก สมตฺโตฯ

11. เอกาทสมวคฺโค

4. ญาณกถาวณฺณนา

[614-615] ญาณกถายํ เสยฺยถาปิ มหาสงฺฆิกานนฺติ ปุพฺเพ ญาณํอนารมฺมณนฺติกถายํ (กถา. 557 อาทโย) วุตฺเตหิ อนฺธเกหิ อญฺเญ อิธ มหาสงฺฆิกา ภเวยฺยุํฯ ยทิ อญฺญาเณ วิคเตติอาทินา ราควิคโม วิย วีตราคปญฺญตฺติยา อญฺญาณวิคโม ญาณีปญฺญตฺติยา การณนฺติ ทสฺเสติฯ น หิ ญาณํ อสฺส อตฺถีติ ญาณี, อถ โข อญฺญาณีปฏิปกฺขโต ญาณีติ ยสฺมา ญาณปฏิลาเภนาติ เอตฺถ จ ญาณปฏิลาเภน อญฺญาณสฺส วิคตตฺตา โส ญาณีติ วตฺตพฺพตํ อาปชฺชตีติ อตฺโถ ทฏฺฐพฺโพฯ

ญาณกถาวณฺณนา นิฏฺฐิตาฯ

6. อิทํทุกฺขนฺติกถาวณฺณนา

[618-620] อิตโร ปน สกสมเยติ ปรวาที อตฺตโน สมเยติ อตฺโถฯ

อิทํทุกฺขนฺติกถาวณฺณนา นิฏฺฐิตาฯ

7. อิทฺธิพลกถาวณฺณนา

[621-624] กมฺมสฺส วิปากวเสน วาติ นิรยํว สนฺธาย วุตฺตํฯ ตตฺถ หิ อพฺพุทาทิปริจฺเฉโท ตาทิสสฺส กมฺมวิปากสฺส วเสน วุตฺโตฯ วสฺสคณนาย วาติ มนุสฺเส จาตุมหาราชิกาทิเทเว จ สนฺธายฯ เตสญฺหิ อสงฺเขฺยยมฺปิ กาลํ วิปากทานสมตฺถํ กมฺมํ วสฺสคณนาย ปริจฺฉิชฺชตีติฯ

อิทฺธิพลกถาวณฺณนา นิฏฺฐิตาฯ

8. สมาธิกถาวณฺณนา

[625-626] สมาธานฏฺเฐนาติ สมํ ฐปนฏฺเฐน สมาธิ นาม เจตสิกนฺตรํ อตฺถีติ อคฺคเหตฺวาติ อตฺโถฯ ฉเลนาติ เอกจิตฺตกฺขณิกตฺเต จกฺขุวิญฺญาณสฺส จ ฌานจิตฺตสฺส จ น โกจิ วิเสโสติ เอเตน สามญฺญมตฺเตนาติ อธิปฺปาโยฯ

สมาธิกถาวณฺณนา นิฏฺฐิตาฯ

9. ธมฺมฏฺฐิตตากถาวณฺณนา

[627] อนนฺตรปจฺจยตญฺเจวาติ อวิชฺชา สงฺขารานํ อนนฺตรปจฺจโย อวิชฺชาย ยา ฐิตตา ตโต โหติ, ตาย ฐิตตาย อนนฺตรปจฺจยภาวสงฺขาตา ฐิตตา โหตีติ อธิปฺปาโยฯ อนนฺตรปจฺจยคฺคหณญฺเจตฺถ อญฺญมญฺญปจฺจยภาวรหิตสฺส เอกสฺส ปจฺจยสฺส ทสฺสนตฺถนฺติ ทฏฺฐพฺพํฯ เตน หิ สพฺโพ ตาทิโส ปจฺจโย ทสฺสิโต โหตีติฯ อญฺญมญฺญปจฺจยตญฺจาติ อวิชฺชา สงฺขารานํ ปจฺจโย, สงฺขารา จ อวิชฺชายฯ ตตฺถ อวิชฺชาย สงฺขารานํ ปจฺจยภาวสงฺขาตาย ฐิตตาย สงฺขารานํ อวิชฺชาย ปจฺจยภาวสงฺขาตา ฐิตตา โหติ, ตสฺสา จ อิตราติ อธิปฺปาโยฯ

ธมฺมฏฺฐิตตากถาวณฺณนา นิฏฺฐิตาฯ