5. ปญฺจวิญฺญาณาสาโภคาติกถาวณฺณนา
[584-586] กุสลากุสลวเสน นมีติ กุสลากุสลภาเวน นมิตฺวา ปวตฺตีติ วุตฺตํ โหติฯ สา ปน อารมฺมณปฺปการคฺคหณํ เยน อโลภาทีหิ โลภาทีหิ จ สมฺปโยโค โหตีติ ทฏฺฐพฺโพ ‘‘สุขมิติ เจตโส อภาโค’’ติอาทีสุ วิยฯ
ปญฺจวิญฺญาณาสาโภคาติกถาวณฺณนา นิฏฺฐิตาฯ
6. ทฺวีหิสีเลหีติกถาวณฺณนา
[587-589] ขณภงฺคนิโรธํ, น อปฺปวตฺตินิโรธํ, สีลวีติกฺกมนิโรธํ วาฯ วีติกฺกมํ วิยาติ ยถา วีติกฺกเม กเต ทุสฺสีโล, เอวํ นิรุทฺเธปีติ เอวํ วีติกฺกเมน นินฺนานํ สลฺลกฺเขนฺโตติ อตฺโถฯ
ทฺวีหิสีเลหีติกถาวณฺณนา นิฏฺฐิตาฯ
7. สีลํอเจตสิกนฺติกถาวณฺณนา
[590-594] เยน โส สีลวาเยว นาม โหตีติ เยน จิตฺตวิปฺปยุตฺเตน ฐิเตน อุปจเยน อกุสลาพฺยากตจิตฺตสมงฺคี สีลวาเยว นาม โหตีติ อธิปฺปาโยฯ เสสเมตฺถ ‘‘ทานํ อเจตสิก’’นฺติ กถายํ วุตฺตนเยเนว เวทิตพฺพนฺติ วุตฺตํ, สา ปน กถา มคฺคิตพฺพาฯ
สีลํอเจตสิกนฺติกถาวณฺณนา นิฏฺฐิตาฯ
9. สมาทานเหตุกถาวณฺณนา
[598-600] สมาทานเหตุกถายํ \100 ปุริมกถาสทิสเมวาติ ปริโภคกเถกเทสสทิสตา ทฏฺฐพฺพาฯ
สมาทานเหตุกถาวณฺณนา นิฏฺฐิตาฯ
11. อวิญฺญตฺติทุสฺสีลฺยนฺติกถาวณฺณนา
[603-604] อาณตฺติยา จ ปาณาติปาตาทีสุ องฺคปาริปูรินฺติ เอกสฺมิํ ทิวเส อาณตฺตสฺส อปรสฺมิํ ทิวเส ปาณาติปาตํ กโรนฺตสฺส ตทา สา อาณตฺติ วิญฺญตฺติํ วินาเยว องฺคํ โหตีติ อวิญฺญตฺติ ทุสฺสีลฺยนฺติ อธิปฺปาโยฯ
อวิญฺญตฺติทุสฺสีลฺยนฺติกถาวณฺณนา นิฏฺฐิตาฯ
ทสมวคฺควณฺณนา นิฏฺฐิตาฯ
ทุติโย ปณฺณาสโก สมตฺโตฯ
11. เอกาทสมวคฺโค
4. ญาณกถาวณฺณนา
[614-615] ญาณกถายํ เสยฺยถาปิ มหาสงฺฆิกานนฺติ ปุพฺเพ ญาณํอนารมฺมณนฺติกถายํ (กถา. 557 อาทโย) วุตฺเตหิ อนฺธเกหิ อญฺเญ อิธ มหาสงฺฆิกา ภเวยฺยุํฯ ยทิ อญฺญาเณ วิคเตติอาทินา ราควิคโม วิย วีตราคปญฺญตฺติยา อญฺญาณวิคโม ญาณีปญฺญตฺติยา การณนฺติ ทสฺเสติฯ น หิ ญาณํ อสฺส อตฺถีติ ญาณี, อถ โข อญฺญาณีปฏิปกฺขโต ญาณีติ ฯ ยสฺมา ญาณปฏิลาเภนาติ เอตฺถ จ ญาณปฏิลาเภน อญฺญาณสฺส วิคตตฺตา โส ญาณีติ วตฺตพฺพตํ อาปชฺชตีติ อตฺโถ ทฏฺฐพฺโพฯ
ญาณกถาวณฺณนา นิฏฺฐิตาฯ
6. อิทํทุกฺขนฺติกถาวณฺณนา
[618-620] อิตโร ปน สกสมเยติ ปรวาที อตฺตโน สมเยติ อตฺโถฯ
อิทํทุกฺขนฺติกถาวณฺณนา นิฏฺฐิตาฯ