4. อนุสยาอนารมฺมณาติกถาวณฺณนา
[554-556] อปฺปหีนตฺตาว อตฺถีติ วุจฺจติ, น ปน วิชฺชมานตฺตาติ อธิปฺปาโยฯ
อนุสยาอนารมฺมณาติกถาวณฺณนา นิฏฺฐิตาฯ
5. ญาณํอนารมฺมณนฺติกถาวณฺณนา
[557-8] ตสฺส ญาณสฺสาติ มคฺคญาณสฺสาติ วทนฺติฯ
ญาณํอนารมฺมณนฺติกถาวณฺณนา นิฏฺฐิตาฯ
7. วิตกฺกานุปติตกถาวณฺณนา
[562] อวิเสเสเนวาติ อารมฺมณสมฺปโยเคหิ ทฺวีหิปีติ อตฺโถฯ
วิตกฺกานุปติตกถาวณฺณนา นิฏฺฐิตาฯ
8. วิตกฺกวิปฺผารสทฺทกถาวณฺณนา
[563] สพฺพโสติ สวิตกฺกจิตฺเตสุ สพฺพตฺถ สพฺพทา วาติ อิมมตฺถํ ทสฺเสนฺโต อาห ‘‘อนฺตมโส มโนธาตุปวตฺติกาเลปี’’ติฯ วิตกฺกวิปฺผารมตฺตนฺติ วิตกฺกสฺส ปวตฺติมตฺตนฺติ อธิปฺปาโยฯ
วิตกฺกวิปฺผารสทฺทกถาวณฺณนา นิฏฺฐิตาฯ
9. นยถาจิตฺตสฺสวาจาติกถาวณฺณนา
[565] อนาปตฺตีติ วิสํวาทนาธิปฺปายสฺส อภาวา มุสาวาโท น โหตีติ วุตฺตํฯ
นยถาจิตฺตสฺสวาจาติกถาวณฺณนา นิฏฺฐิตาฯ
11. อตีตานาคตสมนฺนาคตกถาวณฺณนา
[568-570] ตาสูติ ตาสุ ปญฺญตฺตีสุฯ สมนฺนาคมปญฺญตฺติยา สมนฺนาคโตติ วุจฺจติ, ปฏิลาภปญฺญตฺติยา ลาภีติ วุจฺจติฯ สมนฺนาคโตติ วุจฺจติ อยํ สมนฺนาคมปญฺญตฺติ นามฯ ลาภีติ วุจฺจติ อยํ ปฏิลาภปญฺญตฺติ นามาติ วา อธิปฺปาโย โยเชตพฺโพฯ
อตีตานาคตสมนฺนาคตกถาวณฺณนา นิฏฺฐิตาฯ
นวมวคฺควณฺณนา นิฏฺฐิตาฯ
10. ทสมวคฺโค
1. นิโรธกถาวณฺณนา
[571-2] ภวงฺคจิตฺตสฺส ภงฺคกฺขเณน สเหวาติอาทิํ วทนฺเตน กิริยขนฺธานํ ภงฺคกฺขเณน สห อุปปตฺเตสิยา ขนฺธา อุปฺปชฺชนฺตีติ จ วตฺตพฺพํ, ตถา อุปปตฺเตสิยานํ ภงฺคกฺขเณน สห อุปปตฺเตสิยา, กิริยานํ ภงฺคกฺขเณน สห กิริยาติฯ จกฺขุวิญฺญาณาทีนํ กิริยาจตุกฺขนฺธคฺคหเณน คหณํฯ ญาณนฺติ มคฺคญาณํ ยุตฺตํฯ
นิโรธกถาวณฺณนา นิฏฺฐิตาฯ
3. ปญฺจวิญฺญาณสมงฺคิสฺสมคฺคกถาวณฺณนา
[576] ตํ ลกฺขณนฺติ ‘‘ฉ วิญฺญาณา’’ติ อวตฺวา ‘‘ปญฺจวิญฺญาณา อุปฺปนฺนวตฺถุกา’’ติอาทินา วุตฺตํ ลกฺขณํฯ ‘‘ฉ วิญฺญาณา’’ติ อวจนํ ปเนตฺถ ‘‘โน จ วต เร วตฺตพฺเพ’’ติอาทิวจนสฺส การณนฺติ อธิปฺเปตํฯ
[577] โลกิโยติ วิปสฺสนามคฺคมาหฯ ยํ ตตฺถ อนิมิตฺตนฺติ จกฺขุวิญฺญาณสมงฺคิกฺขเณ ยํ อนิมิตฺตํ คณฺหนฺโต น นิมิตฺตคฺคาหีติ วุตฺโต, ตเทว สุญฺญตนฺติ อธิปฺปาโยฯ
ปญฺจวิญฺญาณสมงฺคิสฺสมคฺคกถาวณฺณนา นิฏฺฐิตาฯ