5. ปฏิสมฺภิทากถาวณฺณนา
[432-433] ยํกิญฺจิ อริยานํ ญาณํ, สพฺพํ โลกุตฺตรเมวาติ คณฺหนฺเตนปิ สพฺพํ ญาณํ ปฏิสมฺภิทาติ น สกฺกา วตฺตุํฯ อนริยานมฺปิ หิ ญาณํ ญาณเมวาติ ฯ ตสฺส วา ญาณตํ น อิจฺฉตีติ วตฺตพฺพํฯ ปถวีกสิณสมฺมุติยํ สมาปตฺติญาณํ สนฺธายาติ อนริยสฺส เอตํ ญาณํ สนฺธายาติ อธิปฺปาโย สิยาฯ
ปฏิสมฺภิทากถาวณฺณนา นิฏฺฐิตาฯ
6. สมฺมุติญาณกถาวณฺณนา
[434-435] สจฺจนฺติ วจนสามญฺเญน อุภยสฺสปิ สจฺจสามญฺญตฺตํ คเหตฺวา วทตีติ ทสฺเสนฺโต ‘‘ตตฺถา’’ติอาทิมาหฯ
สมฺมุติญาณกถาวณฺณนา นิฏฺฐิตาฯ
7. จิตฺตารมฺมณกถาวณฺณนา
[436-438] ผสฺสสฺส ผุสนลกฺขณํ มนสิกโรโตติ เอเตน ปุริมา วตฺตพฺพปฏิญฺญา อนุปทธมฺมมนสิการโต อญฺญํ สมุทายมนสิการํ สนฺธาย กตาติ ทสฺเสติฯ
จิตฺตารมฺมณกถาวณฺณนา นิฏฺฐิตาฯ
8. อนาคตญาณกถาวณฺณนา
[439-440] สพฺพสฺมิมฺปีติ ‘‘ปาฏลิปุตฺตสฺส โข’’ติอาทินา อนาคเต ญาณนฺติ วุตฺตนฺติ อนาคตภาวสามญฺเญน อนนฺตรานาคเตปิ ญาณํ อิจฺฉนฺตีติ วุตฺตํ โหติฯ
อนาคตญาณกถาวณฺณนา นิฏฺฐิตาฯ
9. ปฏุปฺปนฺนญาณกถาวณฺณนา
[441-442] วจนํ นิสฺสายาติ อตฺถโต อาปนฺนํ วจนํ, อนุชานนวจนํ วา นิสฺสายฯ สนฺตติํ สนฺธายาติ ภงฺคานุปสฺสนานํ ภงฺคโต อนุปสฺสนาสนฺตติํ สนฺธายาติ อธิปฺปาโยฯ
ปฏุปฺปนฺนญาณกถาวณฺณนา นิฏฺฐิตาฯ
10. ผลญาณกถาวณฺณนา
[443-444] พุทฺธานํ วิยาติ ยถา พุทฺธา สพฺพปฺปการผลปโรปริยตฺตชานนวเสน อตฺตโน เอว จ พเลน ผลํ ชานนฺติ, เอวนฺติ วุตฺตํ โหติฯ
ผลญาณกถาวณฺณนา นิฏฺฐิตาฯ
ปญฺจมวคฺควณฺณนา นิฏฺฐิตาฯ
มหาปณฺณาสโก สมตฺโตฯ
6. ฉฏฺฐวคฺโค
1. นิยามกถาวณฺณนา
[445-447] อนิยโต นาม น โหตีติ ยถา มิจฺฉตฺตนิยตสฺส ภวนฺตเร อนิยตํ นาม โหติ, เอวํ เอตสฺส กทาจิปิ อนิยตตา น โหตีติ โย นิยาโม, โส อสงฺขโตติ อธิปฺปาโยฯ
นิยามกถาวณฺณนา นิฏฺฐิตาฯ
2. ปฏิจฺจสมุปฺปาทกถาวณฺณนา
[451] การณฏฺเฐน ฐิตตาติ การณภาโวเยวฯ เอเตน จ ธมฺมานํ การณภาโว ธมฺมฏฺฐิตตาติ เอตมตฺถํ ทสฺเสติฯ ตถา ‘‘ธมฺมนิยามตา’’ติ เอตฺถาปิฯ
ปฏิจฺจสมุปฺปาทกถาวณฺณนา นิฏฺฐิตาฯ