5. ปฏิสมฺภิทากถาวณฺณนา
[432-433] ยํกิญฺจิ อริยานํ ญาณํ, สพฺพํ โลกุตฺตรเมวาติ คณฺหนฺเตนปิ สพฺพํ ญาณํ ปฏิสมฺภิทาติ น สกฺกา วตฺตุํฯ อนริยานมฺปิ หิ ญาณํ ญาณเมวาติ ฯ ตสฺส วา ญาณตํ น อิจฺฉตีติ วตฺตพฺพํฯ ปถวีกสิณสมฺมุติยํ สมาปตฺติญาณํ สนฺธายาติ อนริยสฺส เอตํ ญาณํ สนฺธายาติ อธิปฺปาโย สิยาฯ
ปฏิสมฺภิทากถาวณฺณนา นิฏฺฐิตาฯ
6. สมฺมุติญาณกถาวณฺณนา
[434-435] สจฺจนฺติ วจนสามญฺเญน อุภยสฺสปิ สจฺจสามญฺญตฺตํ คเหตฺวา วทตีติ ทสฺเสนฺโต ‘‘ตตฺถา’’ติอาทิมาหฯ
สมฺมุติญาณกถาวณฺณนา นิฏฺฐิตาฯ
7. จิตฺตารมฺมณกถาวณฺณนา
[436-438] ผสฺสสฺส ผุสนลกฺขณํ มนสิกโรโตติ เอเตน ปุริมา วตฺตพฺพปฏิญฺญา อนุปทธมฺมมนสิการโต อญฺญํ สมุทายมนสิการํ สนฺธาย กตาติ ทสฺเสติฯ
จิตฺตารมฺมณกถาวณฺณนา นิฏฺฐิตาฯ
8. อนาคตญาณกถาวณฺณนา
[439-440] สพฺพสฺมิมฺปีติ ‘‘ปาฏลิปุตฺตสฺส โข’’ติอาทินา อนาคเต ญาณนฺติ วุตฺตนฺติ อนาคตภาวสามญฺเญน อนนฺตรานาคเตปิ ญาณํ อิจฺฉนฺตีติ วุตฺตํ โหติฯ
อนาคตญาณกถาวณฺณนา นิฏฺฐิตาฯ