1. วิมุตฺติกถาวณฺณนา

[418] ผลญาณํ น โหตีติ ‘‘วิมุตฺตานี’’ติ วา ตทงฺควิมุตฺติยาทิภาวโต มคฺเคน ปหีนานํ ปุน อนุปฺปตฺติโต จ ‘‘อวิมุตฺตานี’’ติ วา น วตฺตพฺพานีติ อธิปฺปาโยฯ โคตฺรภุญาณญฺเจตฺถ วิปสฺสนาคฺคหเณน คหิตนฺติ ทฏฺฐพฺพํฯ

วิมุตฺติกถาวณฺณนา นิฏฺฐิตาฯ

2. อเสขญาณกถาวณฺณนา

[421] น ปเนตํ อเสขนฺติ เอเตน อเสขวิสยตฺตา อเสขเมว ญาณนฺติ ปรสฺส ลทฺธิ, น ปน อเสขสฺสาติ อิมมตฺถํ ทสฺเสติฯ

อเสขญาณกถาวณฺณนา นิฏฺฐิตาฯ

3. วิปรีตกถาวณฺณนา

[424] น ปถวีเยวาติ ลกฺขณปถวีเยว, สสมฺภารปถวีเยว วา น โหตีติ อตฺโถฯ อนิจฺเจ นิจฺจนฺติอาทิวิปริเยโส ปน วิปรีตญาณํ นามาติ อญฺญาเณปิ ญาณโวหารํ อาโรเปตฺวา วทตีติ ทฏฺฐพฺพํฯ

วิปรีตกถาวณฺณนา นิฏฺฐิตาฯ

4. นิยามกถาวณฺณนา

[428-431] ญาณํ อตฺถิ, ยํ สจฺจานุโลมํ มคฺคญาณานุคติกํ ปสฺสนฺโต ภควา ‘‘ภพฺโพ’’ติ ชานาตีติ ลทฺธิฯ ปฐมปญฺหเมว จตุตฺถํ กตฺวาติ เอตฺถ ‘‘นิยตสฺส อนิยามคมนายา’’ติ วิปรีตานุโยคโต ปภุติ คเณตฺวา ‘‘จตุตฺถ’’นฺติ อาหฯ

นิยามกถาวณฺณนา นิฏฺฐิตาฯ

5. ปฏิสมฺภิทากถาวณฺณนา

[432-433] ยํกิญฺจิ อริยานํ ญาณํ, สพฺพํ โลกุตฺตรเมวาติ คณฺหนฺเตนปิ สพฺพํ ญาณํ ปฏิสมฺภิทาติ น สกฺกา วตฺตุํฯ อนริยานมฺปิ หิ ญาณํ ญาณเมวาติ ฯ ตสฺส วา ญาณตํ น อิจฺฉตีติ วตฺตพฺพํฯ ปถวีกสิณสมฺมุติยํ สมาปตฺติญาณํ สนฺธายาติ อนริยสฺส เอตํ ญาณํ สนฺธายาติ อธิปฺปาโย สิยาฯ

ปฏิสมฺภิทากถาวณฺณนา นิฏฺฐิตาฯ

6. สมฺมุติญาณกถาวณฺณนา

[434-435] สจฺจนฺติ วจนสามญฺเญน อุภยสฺสปิ สจฺจสามญฺญตฺตํ คเหตฺวา วทตีติ ทสฺเสนฺโต ‘‘ตตฺถา’’ติอาทิมาหฯ

สมฺมุติญาณกถาวณฺณนา นิฏฺฐิตาฯ

7. จิตฺตารมฺมณกถาวณฺณนา

[436-438] ผสฺสสฺส ผุสนลกฺขณํ มนสิกโรโตติ เอเตน ปุริมา วตฺตพฺพปฏิญฺญา อนุปทธมฺมมนสิการโต อญฺญํ สมุทายมนสิการํ สนฺธาย กตาติ ทสฺเสติฯ

จิตฺตารมฺมณกถาวณฺณนา นิฏฺฐิตาฯ

8. อนาคตญาณกถาวณฺณนา

[439-440] สพฺพสฺมิมฺปีติ ‘‘ปาฏลิปุตฺตสฺส โข’’ติอาทินา อนาคเต ญาณนฺติ วุตฺตนฺติ อนาคตภาวสามญฺเญน อนนฺตรานาคเตปิ ญาณํ อิจฺฉนฺตีติ วุตฺตํ โหติฯ

อนาคตญาณกถาวณฺณนา นิฏฺฐิตาฯ