9. ตติยสญฺญาเวทยิตกถาวณฺณนา

[732] ตติยสญฺญาเวทยิตกถายํ เสสสตฺเต สนฺธายาติ นิโรธสมาปนฺนโต อญฺเญ เยสํ นิโรธสมาปตฺติยา ภวิตพฺพํ, เต ปญฺจโวการสตฺเต สนฺธายาติ อธิปฺปาโย, อสญฺญสตฺตานมฺปิ จ สญฺญุปฺปาทา จุติํ อิจฺฉนฺตีติ เสสสพฺพสตฺเต สนฺธายาติ วาฯ สรีรปกตินฺติ ตถารูโป อยํ กาโย, ยถารูเป กาเย ปาณิสมฺผสฺสาปิ กมนฺตีติอาทิกํฯ

[733-734] สุตฺตวิโรโธ สิยาติ อิทํ ปรวาทิํ สมฺปฏิจฺฉาเปตฺวา วตฺตพฺพํฯ

ตติยสญฺญาเวทยิตกถาวณฺณนา นิฏฺฐิตาฯ

10. อสญฺญสตฺตุปิกากถาวณฺณนา

[735] สญฺญาวิราควเสน ปวตฺตภาวนา อสญฺญสมาปตฺติปีติ ลทฺธิกิตฺตเน สญฺญาวิราควเสน ปวตฺตภาวนํ จตุตฺถชฺฌานสมาปตฺติํ ‘‘อสญฺญสมาปตฺตี’’ติ อคฺคเหตฺวา สาปิ อสญฺญิตา สญฺญาเวทยิตนิโรธสมาปตฺติเยว นามาติ ปรสฺส ลทฺธีติ ทสฺเสติฯ ยสฺมา อสญฺญสมาปตฺติํ สมาปนฺนสฺส อโลภาทโย อตฺถีติ เอตฺถ สกสมยสิทฺธา จตุตฺถชฺฌานสมาปตฺติ ‘‘อสญฺญสมาปตฺตี’’ติ วุตฺตาฯ

[736] สญฺญาวิราควเสน สมาปนฺนตฺตา อสญฺญิตา, น สญฺญาย อภาวโตติ จตุตฺถชฺฌานสมาปตฺติเมว สนฺธาย วทติฯ

อสญฺญสตฺตุปิกากถาวณฺณนา นิฏฺฐิตาฯ

11. กมฺมูปจยกถาวณฺณนา

[738-739] กมฺเมน สหชาโตติ ปญฺเหสุ ‘‘กมฺมูปจยํ สนฺธาย ปฏิกฺขิปติ, จิตฺตวิปฺปยุตฺตํ สนฺธาย ปฏิชานาตี’’ติ กตฺถจิ ปาโฐ, ‘‘จิตฺตสมฺปยุตฺตํ สนฺธาย ปฏิกฺขิปติ, จิตฺตวิปฺปยุตฺตํ สนฺธาย ปฏิชานาตี’’ติ อญฺญตฺถฯ อุภยมฺปิ วิจาเรตพฺพํฯ

[741] ตสฺมาติ ติณฺณมฺปิ เอกกฺขเณ สพฺภาวโต ติณฺณํ ผสฺสานญฺจ สโมธานา จ เอกตฺตํ ปุจฺฉตีติ อธิปฺปาโย ทฏฺฐพฺโพฯ

กมฺมูปจยกถาวณฺณนา นิฏฺฐิตาฯ

ปนฺนรสมวคฺควณฺณนา นิฏฺฐิตาฯ

ตติโย ปณฺณาสโก สมตฺโตฯ

16. โสฬสมวคฺโค

3. สุขานุปฺปทานกถาวณฺณนา

[747-748] สุขานุปฺปทานกถายํ ยํ เอวรูปนฺติ ยํ เนวตฺตโน, น ปเรสํ, น ตสฺส, เอวรูปํ นาม อนุปฺปทินฺนํ ภวิตุํ น อรหติ อญฺญสฺส อสกฺกุเณยฺยตฺตาติ ลทฺธิมตฺเตน ปฏิชานาติ, น ยุตฺติยาติ อธิปฺปาโยฯ

สุขานุปฺปทานกถาวณฺณนา นิฏฺฐิตาฯ

4. อธิคยฺหมนสิการกถาวณฺณนา

[749-753] ตํจิตฺตตายาติ ตเทว อารมฺมณภูตํ จิตฺตํ เอตสฺสาติ ตํจิตฺโต, ตสฺส ภาโว ตํจิตฺตตา, ตาย ตํจิตฺตตายฯ ตํ วา อาลมฺพกํ อาลมฺพิตพฺพญฺจ จิตฺตํ ตํจิตฺตํ, ตสฺส ภาโว ตสฺเสว อาลมฺพกอาลมฺพิตพฺพตา ตํจิตฺตตา, ตาย โจเทตุนฺติ อตฺโถฯ

อธิคยฺหมนสิการกถาวณฺณนา นิฏฺฐิตาฯ