เมนู

[940] อาคมนสฺส ปฏิสนฺธิคฺคหณวเสนาติ อธิปฺปาโยฯ

[941] อุปจยนโตติ วฑฺฒนโตฯ อญฺญถาติ ลาภโต ตกฺกนโต จ อญฺญปฺปกาโร คหิโตติ ตํ ทสฺเสนฺโต ‘‘สทฺธารุจิอาทีหี’’ติ อาหฯ อนุสฺสวโต หิ สทฺทหนํ, รุจฺจนํ ปน ชาติสฺสรญาณโตปิ โหติฯ อาทิ-สทฺเทน ขนฺติอาทีนํ สงฺคโหฯ

[942] อกฺขนฺติ มูลํ เอเตสนฺติ อกฺขนฺติมูลกาทุกฺกฏทุพฺภาสิตตาทิโทสา ตาทิสานิ กายวจีมโนทุจฺจริตานิฯ

[943] อุทคฺคตาสงฺขาโต อวูปสโม น อุทฺธจฺจสงฺขาโตติ ปีติยา เอว สวิปฺผาริกตาสงฺขาตํ อสนฺตสภาวํ อาหฯ อวูปสมเหตุภูโตติ วิกฺเขปเหตุภูโตฯ ปีติยา อากาโรติ ปีติยา ปวตฺติอากาโรฯ

ปญฺจกนิทฺเทสวณฺณนา นิฏฺฐิตาฯ

6. ฉกฺกนิทฺเทสวณฺณนา

[944] เตนาติ โกธาทีนํเยว วิวาทมูลตฺตาฯ

[945] กุสลานุโยเค สาตจฺจํ กุสลานุโยคสาตจฺจํ

คเณน สตฺตสมูเหน สงฺคณิ สนฺนิปตนํ เยน สทฺธิํ, เตน สงฺคติ คณสงฺคณิกากสฺสจิ ฆาสจฺฉาทนาทิกสฺสฯ

[946] อุปวิตกฺเกตีติ อารมฺมณํ อุเปจฺจ ตกฺเกติฯ

[948] อธิจฺจสมุปฺปนฺนิโกติ ‘‘อธิจฺจสมุปฺปนฺโน อตฺตา จ โลโก จา’’ติ เอวํวาทีฯ

ฉกฺกนิทฺเทสวณฺณนา นิฏฺฐิตาฯ

8. อฏฺฐกนิทฺเทสวณฺณนา

[952] โอสีทนากาเรนาติ กตฺตพฺพกมฺเม อนุสฺสหนากาเรนฯ

[958] เต อภินิเวสา อสญฺญีวาทา วทนฺติ เอเตหีติฯ

อฏฺฐกนิทฺเทสวณฺณนา นิฏฺฐิตาฯ

9. นวกนิทฺเทสวณฺณนา

[960-963] ทสมสฺสาติ อฏฺฐานฆาตสฺสฯ

อชฺฌตฺตนฺติ โคจรชฺฌตฺตํ อธิปฺเปตํฯ เอตสฺส คาถาวจนสฺสฯ นิฏฺฐเปตฺวาติ อภินิวิสฺสฯ

[964] อญฺเญสํ ผสฺสาทีนํ สงฺขตภาเว ยถาสกํปจฺจเยหิฯ เยนากาเรน มานสฺส สาติสยา ปวตฺติ, ตํ ทสฺเสตุํ ‘‘อหนฺติ, อสฺมีติ จา’’ติ วุตฺตํฯ อตฺตโนติ ทิฏฺฐิคตปริกปฺปิตสฺส อตฺตโนฯ ยถา มานสฺส สมฺปคฺคหวเสน, เอวํ ตณฺหาย มมตฺตวเสน, ทิฏฺฐิยา นิจฺจาทิวเสน ปวตฺติ วิเสสวตี สมาเนปิ อนาคตกาลามสเนติ อาห ‘‘ภวิสฺสนฺตี…เป.… วุตฺโต’’ติฯ ‘‘อหมสฺมี’’ติ ปน ปวตฺตมานสฺเสว ภวตีติ สพฺพปทสาธารณสฺส มานสฺเสว วเสน อิญฺชิตาทิตา อฏฺฐกถายํ วุตฺตาฯ

นวกนิทฺเทสวณฺณนา นิฏฺฐิตาฯ

10. ทสกนิทฺเทสวณฺณนา

[970] สงฺกปฺปนนฺติ ‘‘กุสลตา’’ติ วุตฺตปทสฺส อตฺถวจนํฯ ตสฺสา อุปายจินฺตายฯ มิจฺฉาภาโว สาวชฺชภาโวฯ ตทากาโร โมโหติ ยถาวุตฺตากาเรน ปวตฺเต จิตฺตุปฺปาเท โมโหฯ ตสฺสาปิ ยถาวุตฺตปจฺจเวกฺขณายปิ ยถากตปาเปปิฯ อธิมานสมฺปยุตฺตํ สญฺชานนํ ปกติปุริสนฺตรทสฺสนาทิวเสน ปวตฺตํ ทิฏฺฐิสมฺปยุตฺตจิตฺตํ ผลํ วิย วิมุตฺตนฺติ คหิตํ ทฏฺฐพฺพํฯ

ทสกนิทฺเทสวณฺณนา นิฏฺฐิตาฯ