‘‘สมฺมาทิฏฺฐิปุเรกฺขาโร’’ติ สุตฺตปฺปเทสสฺส อตฺถภูตา กมฺมสฺสกตาสมฺมาทิฏฺฐิ จ สปฺปจฺจยนามรูปทสฺสนสมฺมาทิฏฺฐิ จ วิปสฺสนาย ปทฏฺฐานํ นาม อนิจฺจานุปสฺสนาทีนํ วิเสสการณตฺตาฯ ‘‘ญตฺวาน อุทยพฺพย’’นฺติ สุตฺตปฺปเทสสฺส อตฺถภูตา อุทยพฺพยานุปสฺสนาปญฺญา ทสฺสนภูมิยา ปทฏฺฐานํ นาม ปฐมมคฺคาธิคมสฺส อาสนฺนการณตฺตาฯ ‘‘ถินมิทฺธาภิภู ภิกฺขู’’ติ สุตฺตปฺปเทสสฺส อตฺถภูตํ ถินมิทฺธาภิภวนํ วีริยสฺส ปทฏฺฐานํ นาม อาสนฺนการณตฺตาฯ ‘‘สพฺพา ทุคฺคติโย ชเห’’ติ สุตฺตปฺปเทสสฺส อตฺถภูตา ปหาตพฺพชหนภาวนาย อริยมคฺคภาวนาย ปทฏฺฐานํ นาม ปหาตพฺพปฺปหาเนน อริยมคฺคภาวนาปาริปูริสมฺภวโตฯ

‘‘เอตฺตโกว ปทฏฺฐานหารสมฺปาโต ปริปุณฺโณ’’ติ วตฺตพฺพตฺตา ‘‘นิยุตฺโต ปทฏฺฐาโน หารสมฺปาโต’’ติ วุตฺตํฯ เยน เยน สํวณฺณนาวิเสสภูเตน ปทฏฺฐานหารสมฺปาตภูเตน สุตฺตปฺปเทสตฺถานิ ปทฏฺฐานานิ นีหริตานิ, โส โส สํวณฺณนาวิเสสภูโต ปทฏฺฐานหารสมฺปาโต นิยุตฺโต ยถารหํ นิทฺธาเรตฺวา ยุชฺชิตพฺโพติ อตฺโถ คเหตพฺโพติฯ

อิติ ปทฏฺฐานหารสมฺปาเต สตฺติพลานุรูปา รจิตา

วิภาวนา นิฏฺฐิตาฯ

ปณฺฑิเตหิ ปน…เป.… คเหตพฺโพติฯ

5. ลกฺขณหารสมฺปาตวิภาวนา

[67] เยน เยน ปทฏฺฐานหารสมฺปาเตน สุตฺตปฺปเทสตฺถานิ ปทฏฺฐานานิ อาจริเยน นิทฺธาริตานิ, อมฺเหหิ จ ญาตานิ, โส ปทฏฺฐานหารสมฺปาโต ปริปุณฺโณ, ‘‘กตโม ลกฺขณหารสมฺปาโต’’ติ ปุจฺฉิตพฺพตฺตา ‘‘ตตฺถ กตโม ลกฺขโณ หารสมฺปาโต’’ติอาทิ วุตฺตํฯ ตตฺถ เตสุ เทสนาหารสมฺปาตาทีสุ โสฬสสุ หารสมฺปาเตสุ กตโม สํวณฺณนาวิเสโส ลกฺขณหารสมฺปาโต นามาติ ปุจฺฉติฯ

‘‘กตเมหิ สุตฺตตฺเถหิ สมานลกฺขณา กตเม ธมฺมา คหิตา’’ติ ปุจฺฉิตพฺพตฺตา ‘‘ตสฺมา’’ติอาทิ วุตฺตํฯ