9. นนฺทสุตฺตวณฺณนา

[9] นวเม ทุวิธา กุลปุตฺตา ชาติกุลปุตฺตา อาจารกุลปุตฺตา จฯ ตตฺถ ‘‘เตน โข ปน สมเยน รฏฺฐปาโล กุลปุตฺโต ตสฺมิํเยว ถุลฺลโกฏฺฐิเก อคฺคกุลิกสฺส ปุตฺโต’’ติ (ม. นิ. 2.294) เอวํ อาคตา อุจฺจากุลปุตฺตา ชาติกุลปุตฺตาฯ ‘‘สทฺธาเยเต กุลปุตฺตา อคารสฺมา อนคาริยํ ปพฺพชิตา’’ติ (ม. นิ. 3.78) เอวํ อาคตา ปน ยตฺถ กตฺถจิ กุเล ปสุตาปิ อาจารกุลปุตฺตา นามฯ อิธ ปน อุจฺจากุลปฺปสุตตํ สนฺธาย ‘‘กุลปุตฺโตติ, ภิกฺขเว, นนฺทํ สมฺมา วทมาโน วเทยฺยา’’ติ ภควตา วุตฺตนฺติ อาห ‘‘ชาติกุลปุตฺโต’’ติฯ อุโภหิปิ ปน การเณหิ ตสฺส กุลปุตฺตภาโวเยวฯ เสสเมตฺถ อุตฺตานเมวฯ

นนฺทสุตฺตวณฺณนา นิฏฺฐิตาฯ