สพฺพโสติ อนวเสสโตฯ น หิ จตุนฺนํ อรูปกฺขนฺธานํ เอกเทโสปิ ตตฺถ อวสิสฺสติฯ วิสฺสฏฺฐตฺตาติ ยถาปริจฺฉินฺนกาเล นิโรธิตตฺตาฯ อุตฺตโม วิโมกฺโข นาม อริเยเหว สมาปชฺชิตพฺพโต อริยผลปริโยสานตฺตา ทิฏฺเฐว ธมฺเม นิพฺพานปฺปตฺติภาวโต จฯ
วิโมกฺขสุตฺตวณฺณนา นิฏฺฐิตาฯ
7. อนริยโวหารสุตฺตวณฺณนา
[67] สตฺตเม อนริยานํ ลามกานํ โวหาโร อนริยโวหาโรฯ ทิฏฺฐวาทิตาติ ทิฏฺฐํ มยาติ เอวํ วาทิตาฯ เอวํ เสเสสุปิฯ เอตฺถ จ ตํตํสมุฏฺฐาปกเจตนาวเสน อตฺโถ เวทิตพฺโพฯ เตนาห ‘‘ยาหิ เจตนาหี’’ติอาทิฯ
อนริยโวหารสุตฺตวณฺณนา นิฏฺฐิตาฯ