2-4. ปญฺญาสุตฺตาทิวณฺณนา

[2-4] ทุติเย อาทิพฺรหฺมจริยิกายาติ อาทิพฺรหฺมจริยเมว อาทิพฺรหฺมจริยิกาฯ เตนาห ‘‘มคฺคพฺรหฺมจริยสฺส อาทิภูตายา’’ติฯ อริโยติ นิทฺโทโส ปริสุทฺโธฯ ตุณฺหีภาโว น ติตฺถิยานํ มูคพฺพตคหณํ วิย อปริสุทฺโธติ อริโย ตุณฺหีภาโวฯ จตุตฺถชฺฌานนฺติ อุกฺกฏฺฐนิทฺเทเสเนตํ วุตฺตํ, ปฐมชฺฌานาทีนิปิ อริโย ตุณฺหีภาโวตฺเวว สงฺขํ คจฺฉนฺติฯ ชานนฺติ อิทํ กมฺมสาธนนฺติ อาห ‘‘ชานิตพฺพกํ ชานาตี’’ติฯ ยถา วา เอกจฺโจ วิปรีตํ คณฺหนฺโต ชานนฺโตปิ น ชานาติ, ปสฺสนฺโตปิ น ปสฺสติ, น เอวมยํฯ อยํ ปน ชานนฺโต ชานาติ, ปสฺสนฺโต ปสฺสตีติ เอวเมตฺถ ทฏฺฐพฺโพฯ ตติยาทีนิ สุวิญฺเญยฺยานิฯ

ปญฺญาสุตฺตาทิวณฺณนา นิฏฺฐิตาฯ

5. ปฐมโลกธมฺมสุตฺตวณฺณนา

[5] ปญฺจเม โลกสฺส ธมฺมาติ สตฺตโลกสฺส อวสฺสํภาวิธมฺมาฯ เตนาห ‘‘เอเตหิ มุตฺตา นาม นตฺถิ’’ติอาทิฯ ฆาสจฺฉาทนาทีนํ ลทฺธิ ลาโภ, ตานิ เอว วา ลทฺธพฺพโต ลาโภ, ตทภาโว อลาโภ, ลาภคฺคหเณน เจตฺถ ตพฺพิสโย อนุโรโธ คหิโต, อลาภคฺคหเณน วิโรโธฯ ยสฺมา โลหิเต สติ ตทุปฆาตวเสน ปุพฺโพ วิย อนุโรโธ ลทฺธาวสโร เอว โหติ, ตสฺมา วุตฺตํ ‘‘ลาเภ อาคเต อลาโภ อาคโตเยวา’’ติฯ เอส นโย ยสาทีสุปิฯ เสสํ สุวิญฺเญยฺยเมวฯ

ปฐมโลกธมฺมสุตฺตวณฺณนา นิฏฺฐิตาฯ

6-8. ทุติยโลกธมฺมสุตฺตาทิวณฺณนา

[6-8] ฉฏฺเฐ อธิกํ ปยสติ ปยุชฺชติ เอเตนาติ อธิปฺปยาโส, สวิเสสํ อิติกตฺตพฺพกิริยาฯ เตนาห ‘‘อธิกปฺปโยโค’’ติฯ สตฺตมฏฺฐเมสุ นตฺถิ วตฺตพฺพํฯ

ทุติยโลกธมฺมสุตฺตาทิวณฺณนา นิฏฺฐิตาฯ