ยาว อนฺโต ปวิฏฺฐวาโต พหิ นิกฺขมติ, พหิ นิกฺขนฺตวาโต วา อนฺโต ปวิสตีติ เอกสฺเสว ปเวสนิกฺขโม วิย วุตฺตํ, ตํ นาสิกาวาตภาวสามญฺเญนาติ ทฏฺฐพฺพํฯ

ปฐมมรณสฺสติสุตฺตวณฺณนา นิฏฺฐิตาฯ

10. ทุติยมรณสฺสติสุตฺตวณฺณนา

[20] ทสเม นิกฺขนฺเตติ วีติวตฺเตฯ ปติคตายาติ ปจฺจาคตาย, สมฺปตฺตายาติ อตฺโถฯ เตนาห ‘‘ปฏิปนฺนายา’’ติฯ โส มมสฺส อนฺตราโยติ ยถาวุตฺตา น เกวลํ กาลกิริยาว, มม อติทุลฺลภํ ขณํ ลภิตฺวา ตสฺส สตฺถุสาสนมนสิการสฺส เจว ชีวิตสฺส จ สคฺคโมกฺขานญฺจ อนฺตราโย อสฺส, ภเวยฺยาติ อตฺโถฯ เตนาห ‘‘ติวิโธ อนฺตราโย’’ติอาทิฯ วิปชฺเชยฺยาติ วิปตฺติํ คจฺเฉยฺยฯ สตฺถเกน วิย องฺคปจฺจงฺคานํ กนฺตนการกา กาเย สนฺธิพนฺธนจฺเฉทกวาตา สตฺถกวาตาฯ กตฺตุกมฺยตาฉนฺโทติ นิยฺยานาวโห กตฺตุกมฺยตากุสลจฺฉนฺโทฯ ปโยควีริยนฺติ ภาวนานุโยควีริยํฯ น ปฏิวาติ น ปฏินิวตฺตตีติ อปฺปฏิวานี, อนฺตรา โวสานานาปชฺชนวีริยํฯ เตนาห ‘‘อนุกฺกณฺฐนา อปฺปฏิสงฺฆรณา’’ติฯ

ทุติยมรณสฺสติสุตฺตวณฺณนา นิฏฺฐิตาฯ

สารณียวคฺควณฺณนา นิฏฺฐิตาฯ