เมนู

1. พาลวคฺโค

1. ภยสุตฺตวณฺณนา

[1] ติกนิปาตสฺส ปฐเม ภยนฺติ ภีติ เจตโส พฺยโธติ อาห ‘‘จิตฺตุตฺราโส’’ติฯ อุปทฺทโวติ อนฺตราโยฯ ตสฺส ปน วิกฺเขปการณตฺตา วุตฺตํ ‘‘อเนกคฺคตากาโร’’ติฯ อุปสคฺโคติ อุปสชฺชนํ, เทวโตปปีฬาทินา อปฺปฏิการวิฆาตาปตฺติฯ สา ปน ยสฺมา ปฏิการาภาเวน วิหญฺญมานสฺส กิญฺจิ กาตุํ อสมตฺถสฺส โอสีทนการณํ, ตสฺมา วุตฺตํ ‘‘ตตฺถ ตตฺถ ลคฺคนากาโร’’ติฯ ยถาวุตฺเต ทิวเส อนาคจฺฉนฺเตสูติ วญฺเจตฺวา อาคนฺตุํ นิยมิตทิวเส อนาคจฺฉนฺเตสุฯ ทฺวาเร อคฺคิํ ทตฺวาติ พหิ อนิกฺขมนตฺถาย ทฺวาเร อคฺคิํ ทตฺวาฯ

นเฬหิ ฉนฺนปฏิจฺฉนฺนาติ นเฬหิ ติณจฺฉทนสงฺเขเปน อุปริ ฉาเทตฺวา เตหิเยว ทารุกุฏิกนิยาเมน ปริโตปิ ฉาทิตาฯ เอเสว นโยติ อิมินา ติเณหิ ฉนฺนตํ เสสสมฺภารานํ รุกฺขมยตญฺจ อติทิสติฯ

วิธวปุตฺเตติ อนฺตภาโวปลกฺขณํฯ เต หิ นิปฺปิติกา อวินีตา อสํยตา ยํ กิญฺจิ การิโนฯ เสสเมตฺถ อุตฺตานเมวฯ

ภยสุตฺตวณฺณนา นิฏฺฐิตาฯ

2. ลกฺขณสุตฺตวณฺณนา

[2] ทุติเย ลกฺขียติ พาโล อยนฺติ ญายติ เอเตนาติ ลกฺขณํ, กมฺมํ ลกฺขณเมตสฺสาติ กมฺมลกฺขโณติ อาห ‘‘กายทฺวาราทิปวตฺตํ กมฺม’’นฺติอาทิฯ อปทียนฺติ โทสา เอเตน รกฺขียนฺติ, ลูยนฺติ ฉิชฺชนฺติ วาติ อปทานํ, สตฺตานํ สมฺมา, มิจฺฉา วา ปวตฺตปฺปโยโคฯ เตน โสภตีติ อปทานโสภนี ฯ เตนาห ‘‘ปญฺญา นามา’’ติอาทิฯ อตฺตโน จริเตเนวาติ อตฺตโน จริยาย เอวฯ เสสเมตฺถ อุตฺตานเมวฯ

ลกฺขณสุตฺตวณฺณนา นิฏฺฐิตาฯ

3-4. จินฺตีสุตฺตาทิวณฺณนา

[3-4] ตติเย เอเตหีติ ทุจฺจินฺติตจินฺติตาทีหิฯ เอเตน ลกฺขณสทฺทสฺส สรณตฺถตมาหฯ ตาเนวาติ ลกฺขณานิ เอวฯ อสฺสาติ พาลสฺสฯ พาโล อยนฺติ นิมียติ สญฺชานียติ เอเตหีติ พาลนิมิตฺตานิฯ อปทานํ วุจฺจติ, วิขฺยาตํ กมฺมํ, ทุจฺจินฺติตจินฺติตาทีนิ จ พาเล วิขฺยาตานิ อสาธารณภาเวนฯ ตสฺมา ‘‘พาลสฺส อปทานานี’’ติฯ อภิชฺฌาทีหิ ทุฏฺฐํ ทูสิตํ จินฺติตํ ทุจฺจินฺติตํ, ตํ จินฺเตตีติ ทุจฺจินฺติตจินฺตีฯ โลภาทีหิ ทุฏฺฐํ ภาสิตํ มุสาวาทาทิํ ภาสตีติ ทุพฺภาสิตภาสีฯ เตสํเยว วเสน กตฺตพฺพโต ทุกฺกฏกมฺมํ ปาณาติปาตาทิํ กโรตีติ ทุกฺกฏกมฺมการีฯ เตนาห ‘‘จินฺตยนฺโต’’ติอาทิฯ วุตฺตานุสาเรนาติ ‘‘พาโล อย’’นฺติอาทินา วุตฺตสฺส อตฺถวจนสฺส ‘‘ปณฺฑิโต อยนฺติ เอเตหิ ลกฺขียตี’’ติอาทินา อนุสฺสรเณนฯ มโนสุจริตาทีนํ วเสนาติ ‘‘จินฺตยนฺโต อนภิชฺฌาพฺยาปาทสมฺมาทสฺสนวเสน สุจินฺติตเมว จินฺเตตี’’ติอาทินา มโนสุจริตาทีนํ ติณฺณํ สุจริตานํ วเสน โยเชตพฺพานิฯ จตุตฺถํ วุตฺตนยตฺตา อุตฺตานตฺถเมวฯ

จินฺตีสุตฺตาทิวณฺณนา นิฏฺฐิตาฯ

5-10. อโยนิโสสุตฺตาทิวณฺณนา

[5-10] ปญฺจเม กติ นุ โข อนุสฺสติฏฺฐานานีติอาทิ ฉกฺเก อาวิ ภวิสฺสตีติฯ เอวํ จินฺติตนฺติ อโยนิโส จินฺติตํฯ อปญฺหเมว ปญฺหนฺติ กเถสีติ อปญฺหเมว ปญฺโห อยนฺติ มญฺญมาโน วิสฺสชฺเชสิฯ ทสวิธํ พฺยญฺชนพุทฺธิํ อปริหาเปตฺวาติ –