11-12. อาคนฺตุกสุตฺตาทิวณฺณนา
[159-160] สหวิปสฺสนสฺส อริยมคฺคสฺส ภาวนาย อิชฺฌเนน เอตํ อภิญฺญาปริญฺเญยฺยาทิธมฺมานํ อภิญฺญาปริชานนาทีนํ อิชฺฌนํ วุตฺตํ ขตฺติยาทีนํ วิสยอาทิกํ กโรนฺตสฺส กถาย สชฺชิตตฺตาฯ
พลกรณียวคฺควณฺณนา นิฏฺฐิตาฯ
10. เอสนาวคฺโค
1. เอสนาสุตฺตวณฺณนา
[161] กามานนฺติ วตฺถุกามกิเลสกามานํฯ กิเลสกาโมปิ หิ กามิตนฺติ ปริกปฺปิเตน วิธินา จ อธิกราเคหิ เอสนีโยฯ ภวานนฺติ ติณฺณํ คตีนํฯ ทิฏฺฐิคติกปริกปฺปิตสฺส พฺรหฺมจริยสฺส นิมิตฺตภาวโต มิจฺฉาทิฏฺฐิ ‘‘พฺรหฺมจริย’’นฺติ อธิปฺเปตาฯ
2-11. วิธาสุตฺตาทิวณฺณนา
[162-171] เสยฺโยหมสฺมีติอาทินา ตํตํวิภาเคน ธียนฺติ วิธียนฺตีติ วิธา, มานโกฏฺฐาสา, มานฏฺฐปนา วาฯ นีหนนฺตีติ วิพาเธนฺติฯ
เอสนาวคฺควณฺณนา นิฏฺฐิตาฯ
11. โอฆวคฺโค
1-2. โอฆสุตฺตาทิวณฺณนา
[172-173] วฏฺเฏ โอหนนฺติ โอสีทาเปนฺตีติ โอฆาฯ รูปารูปภเวติ รูปภเว จ อรูปภเว จ รูปารูปตณฺโหปนิสฺสยา รูปารูปาวจรกมฺมนิพฺพตฺตา ขนฺธาฯ โยชนฏฺเฐน โยโคฯ