1. สุวีรสุตฺตวณฺณนา

[247] อภิยํสูติ ยุทฺธสชฺชาภิมุขา หุตฺวา คจฺฉิํสุฯ ตตฺราติ ตสฺมิํ อสุรานํ อภิยาเน อยํ ทานิ วุจฺจมานา อนุปุพฺพโต กถาฯ เตตฺติํส ปุริเส คเหตฺวาติ เตตฺติํส ปุริเส ปุญฺญกิริยาย สหายภูเต คเหตฺวาฯ ‘‘ยาวชีวํ มาตาปิตุภโร อสฺส’’นฺติอาทินา สมาทินฺนานิ สตฺต วตปทานิ ปูเรตฺวาฯ อธิคณฺหนฺตํ อภิภวนฺตํฯ ปุตฺตหตายาติ หตปุตฺตายฯ สา สุรา น โหติ, น สุรํ ปิวิมฺหาติ อธิปฺปาโยฯ ตโต ปฏฺฐายาติ ‘‘น สุรา’’ติ วุตฺตกาลโต ปฏฺฐายฯ ‘‘น สุรนฺติ น ทิพฺพนฺตีติ อสุรา’’ติ เกจิฯ เหฏฺฐิมตเล อนฺโตภูมิยํ อายามโต ทสโยชนสหสฺสํฯ

อุรคาทิสหจริตานิ ฐานานิ อุรคาทีนีติ อาห ‘‘อุรคาทีสุ ปญฺจสุ ฐาเนสู’’ติฯ ปฐมาลินฺเทติ ปฐเม ปริภณฺเฑฯ ปญฺจโยชนสหสฺสวิตฺถารปุถุพหลาหิ สิเนรุสฺส จตูสุปิ ปสฺเสสุ จตฺตาโร ปริภณฺฑาฯ สิเนรุสฺส หิ ตสฺมิํ ตสฺมิํ ปสฺเส ยุคนฺธราทีสุ ปญฺจสตปริตฺตทีปปริวาเร มหาทีเป จ ลภิตพฺพสฺส มหโต อตฺถสฺส วเสน มหตฺถาฯ กุปิตาวิลจิตฺตาติ กุปิเตน โกเปน อากุลจิตฺตาฯ ยุทฺเธสีติ ยุทฺเธสิโนฯ เสเสสูติ เสเสสุ ปริภณฺเฑสุฯ เสสาติ สุปณฺณาทโยฯ

วมฺมิกมกฺขิกาติ สปกฺขิกอุปจิกาฯ โอสกฺกิตฺวาติ ปิฏฺฐิภาเคน นิวตฺติตฺวาฯ

ปมาทํ อาปาเทสีติ สกฺกสฺส อาณาย ปมาทํ อาปชฺชิฯ สฏฺฐิโยชนํ วิตฺถาเรนฯ สุวณฺณมหาวีถินฺติ สุวณฺณมยภูมิชคติวีถิํฯ

อนุฏฺฐหนฺโตติ อุฏฺฐานํ กายิกวีริยํ อกโรนฺโตฯ อวายมนฺโตติ วายามํ เจตสิกวีริยํ อกโรนฺโตฯ กิญฺจิ กิจฺจนฺติ กสิวาณิชฺชาทิเภทํ อญฺญตรํ กิจฺจํ กตฺตพฺพกมฺมํฯ วรนฺติ ปวรํฯ เตนาห ‘‘อุตฺตม’’นฺติฯ

ตญฺจ โข กสิตพฺพฏฺฐานํ อธิปฺเปตนฺติ อาห ‘‘โอกาส’’นฺติฯ กมฺมํ อกตฺวาติ กิญฺจิปิ ชีวิตเหตุภูตํ กมฺมํ อกตฺวาฯ ชีวิตฏฺฐานํ นามาติ ตสฺส ชีวิตสฺส เหตุ นามฯ นิพฺพานสฺส มคฺโคติ นิพฺพานสฺส อธิคมุปายภูโต มคฺโคฯ

สุวีรสุตฺตวณฺณนา นิฏฺฐิตาฯ

2. สุสีมสุตฺตวณฺณนา

[248] อนฺตเรติ อพฺภนฺตเรฯ เอวํนามกนฺติ ‘‘สุสีโม’’ติ เอวํนามกํฯ เอกํ ปุตฺตเมว อญฺญตรํ อตฺตโน ปุตฺตเมวฯ

สุสีมสุตฺตวณฺณนา นิฏฺฐิตาฯ

3. ธชคฺคสุตฺตวณฺณนา

[249] สมุปพฺยูฬฺโหติ อุภินฺนํ สห เอว สมาคโม, ภุสํ วา พฺยูฬฺโหติ อตฺโถฯ ภุสา ปนสฺส พฺยูฬฺหตา ทฺวินฺนํ เสนานํ สมาคนฺตฺวา สมฺปิณฺฑิตภาเวนาติ อาห ‘‘สมฺปิณฺฑิโต ราสิภูโต’’ติฯ ปจฺฉิมนฺโตติ รถปญฺชรสฺส ปรนฺโต ปจฺฉิมนฺโต ปจฺฉิมโกฏฺฐาโสฯ รถสนฺธิโตติ รถปญฺชรสฺส กุพฺพเรน สทฺธิํ สมฺพนฺธนฏฺฐานโตฯ ตเทว ปมาณนฺติ ตเทว ‘‘ทิยฑฺฒโยชนสตายาโม’’ติ วุตฺตปฺปมาณเมวฯ ทิคุณํ กตฺวาติ ‘‘ปจฺฉิมนฺโต สตโยชโน’’ติอาทินา ทิคุณํ กตฺวาฯ จนฺทมณฺฑลสูริยมณฺฑลกิงฺกิณิกชาลาทิเภทสฺส เสสาลงฺการสฺสฯ ปสฺสนฺตานํ เทวานํฯ ราชา โนติ อมฺหากํ ราชา เทวเสฏฺโฐฯ ทุติยํ อาสนํ ลภตีติ สกฺเก นิสินฺเน ตสฺส อนนฺตรํ ทุติยํ อาสนํ ลภติฯ ตสฺมา เทวเสฏฺฐตาย สกฺโก วิย คารวฏฺฐานิโย, ยโต สกฺโก ‘‘ตสฺส ธชคฺคํ อุลฺโลเกยฺยาถา’’ติ อาหฯ เอส นโย เสเสสุปิฯ อสุเรหิ ปราชิโตติ อสุเรหิ ปราชยํ อาปาทิโตฯ รชธชํ ทิสฺวาติ ปรเสนาย อุปคจฺฉนฺติยา อุฏฺฐิตรชมตฺตมฺปิ ทิสฺวา ฐิโตปิ ตํ รชธชํ ทิสฺวา ภีรุภาเวน ปลายนธมฺโมฯ