อาจิกฺขามีติ กเถมิ, กเถนฺโต จ ยถา ตมตฺถํ สมฺมเทว ราชา ชานาติ, เอวํ ชานาเปมีติ ฯ นิปฺผตฺติ ยุทฺเธน กาตพฺพอตฺถสิทฺธิฯ วิสิโนติ พนฺธติ ยถาธิปฺเปตํ จิตฺตํ เอเตนาติ วิสโย, สมตฺถภาโวฯ มนฺตสมฺปนฺนาติ สมฺปนฺนราชมนฺตาฯ มหาอมจฺจาติ มโหสธาทิสทิสา นีติสตฺถเฉกา อมจฺจปุริสาฯ อุปลาเปตุนฺติ ปเรสํ อนฺตเร วิโรธตฺถํ สงฺคณฺหิตุํฯ

ทฺเวเยว ปพฺพตาติ ปพฺพตสทิสา ทฺเวเยว คหิตาฯ ราโชวาเทติ ราโชวาทสุตฺเตฯ อาคตาว ตตฺตนฺติยา อนุรูปตฺถํฯ วิลุมฺปมานาติ อิติ-สทฺโท อาทิอตฺโถฯ วิปตฺตีติ โภคปริหานาทิวินาโสฯ หตฺถิยุทฺธาทีหิ ชรามรณํ ชินิตุํ น สกฺกา สตฺตสฺส อวิสยภาวโตฯ เยน ปน ชินิตุํ สกฺกา, ตํ ทสฺเสนฺโต ภควา ‘‘พุทฺเธ…เป.… นิเวสเย’’ติ อาหฯ รตนตฺตเย หิ สทฺธา นิวิฏฺฐา มูลชาตา ปติฏฺฐิตา เอกนฺตโต ชรามรณวิชยาย โหติฯ เตนาห ‘‘ตสฺมา สทฺธ’’นฺติฯ

ปพฺพตูปมสุตฺตวณฺณนา นิฏฺฐิตาฯ

ตติยวคฺควณฺณนา นิฏฺฐิตาฯ

สารตฺถปฺปกาสินิยา สํยุตฺตนิกาย-อฏฺฐกถาย

โกสลสํยุตฺตวณฺณนาย ลีนตฺถปฺปกาสนา สมตฺตาฯ

4. มารสํยุตฺตํ

1. ปฐมวคฺโค