เมนู

3. มฆสุตฺตวณฺณนา

[84] มโฆติ สกฺกสฺเสตํ นามํ ปุริมชาติอนุคตํฯ สฺเววาติ สกฺโก เอวฯ วเตนาติ มาตาปิตุอุปฏฺฐานาทิจาริตฺตธมฺเมน อญฺเญติ อุปธิเวปกฺกปาปธมฺเม อภิภวิตฺวาฯ อสุรนฺติ อินฺทสตฺตุภูตํ อสุรํฯ

มฆสุตฺตวณฺณนา นิฏฺฐิตาฯ

4. มาคธสุตฺตวณฺณนา

[85] จตุตฺถสุตฺตํ วุตฺตตฺถเมวาติ เทวตาสํยุตฺเต สํวณฺณิตตฺถเมว, ตสฺมา อิธ น วตฺตพฺโพ อตฺโถติ อธิปฺปาโยฯ

มาคธสุตฺตวณฺณนา นิฏฺฐิตา

5. ทามลิสุตฺตวณฺณนา

[86] เตน การเณนาติ เตน ปธาเนน การณภูเตน, ปธานกรณนิมิตฺตนฺติ อตฺโถฯ ยํ กิญฺจิ ขุทฺทกมฺปิ มหนฺตมฺปิ หีนมฺปิ ปณีตมฺปิ ภวํฯ อายตปคฺคโหติ ทีฆรตฺตสฺส วีริยารมฺโภฯ กิจฺจโวสานนฺติ กิจฺจนิฏฺฐานํฯ ตเถวาติ ยถา อรหตฺตุปฺปตฺติโต ปุพฺเพ, ตโต ปจฺฉาปิ ตเถว ‘‘พุทฺธิปคฺคโห’’ติ วีริยํ ทฬฺหํ กโรตูติ กุปฺปธมฺมํ วิย มญฺญมาโน วทติฯ ทิฏฺฐธมฺมสุขวิหาราทิอตฺถํ ปน วีริยกรณํ อิจฺฉิตพฺพเมวฯ

อสํกิณฺณาติ อโวมิสฺสา เอวํ อญฺญตฺถ อนาคตตฺตาฯ เตนาห ‘‘ภควตา หี’’ติอาทิฯ ยทิ เอวํ อิเธว กสฺมา เอตํ วุตฺตนฺติ อาห ‘‘อิธ ปนา’’ติอาทิฯ ปติฏฺฐนฺติ นที นาม อนวฏฺฐิตตีรา, ตตฺถ ปติฏฺฐาตพฺพฏฺฐานํฯ

ทามลิสุตฺตวณฺณนา นิฏฺฐิตาฯ