เมนู

10. ปชฺโชตสุตฺตวณฺณนา

[80] ตํ ตํ สมวิสมํ ปชฺโชตตีติ ปชฺโชโตฯ ปทีโป อนฺธการํ วิธมิตฺวา ปจฺจกฺขโต รูปคตํ ทสฺเสติ, เอวํ ปญฺญาปชฺโชโต อวิชฺชนฺธการํ วิธมิตฺวา ธมฺมานํ ปรมตฺถภูตํ รูปํ ทสฺเสติฯ ชาครพฺราหฺมโณ วิยาติ ชาครขีณาสวพฺราหฺมโณ วิยฯ โส หิ สติปญฺญาเวปุลฺลปฺปตฺติยา สพฺพทาปิ ชาคโร โหติฯ คาโวติ โคชาติโยฯ อิทํ คุนฺนํ โคณานญฺจ สามญฺญโต คหณํฯ กมฺเมติ กรณตฺเถ ภุมฺมวจนํฯ ชีวนํ ชีโว, สห ชีเวนาติ สชีวิโนฯ เตนาห ‘‘กมฺเมน สห ชีวนฺตาน’’นฺติ, กสิวาณิชฺชาทิกมฺมํ กตฺวา ชีวนฺตานนฺติ อตฺโถฯ โคมณฺฑเลหิ สทฺธินฺติ โคคเณน สหฯ น เตน วินา กสิกมฺมาทีนิ อุปฺปชฺชนฺติ, โครสสิทฺธิยา เจว กสนภารวหนสิทฺธิยา จ กสิกมฺมเอกจฺจวาณิชฺชกมฺมาทีนิ อิชฺฌนฺติฯ สตฺตกายสฺสาติ อาหารุปชีวิโน สตฺตกายสฺส กสิโต อญฺญถา ชีวิกํ กปฺเปนฺตสฺสปิ กสิชีวิตวุตฺติยา มูลการณํ ผลนิปฺผตฺตินิมิตฺตตฺตา ตสฺสฯ อิริยาปโถ จ อิริยนกิริยานํ ปวตฺตนุปาโยฯ ‘‘สีตนฺติ นงฺคลสีตกมฺม’’นฺติ วทนฺติฯ

ปชฺโชตสุตฺตวณฺณนา นิฏฺฐิตาฯ

11. อรณสุตฺตวณฺณนา

[81] รณนฺติ กนฺทนฺติ เอเตหีติ รณา, ราคาทโยฯ เตหิ อภิภูตตาย หิ สตฺตา นานปฺปการํ กนฺทนฺติ ปริเทวนฺติฯ เต ปน สพฺพโส นตฺถิ เอเตสํ รณาติ อรณาฯ นิกฺกิเลสา ขีณาสวาฯ วุสิตวาโสติ วุสิตพฺรหฺมจริยวาโสฯ โภชิสฺสิยนฺติ ภุชิสฺสภาโวฯ เตนาห ‘‘อทาสภาโว’’ติฯ สมณาติ สมิตปาปสมณาติ อาห ‘‘ขีณาสวสมณา’’ติฯ ปุถุชฺชนกลฺยาณกาเล โลกิยปริญฺญาย, เสกฺขา ปุพฺพภาเค โลกิยปริญฺญาย, ปจฺจเวกฺขเณ โลกิยโลกุตฺตราย ปริญฺญาย ปริญฺเญยฺยํ เตภูมกํ ขนฺธปญฺจกํ ปริชานนฺติ ปริจฺฉิชฺชนฺติฯ ขีณาสวา ปน ปริญฺญาตปริญฺเญยฺยา โหนฺติฯ ตถา หิ เต สามี หุตฺวา ปริภุญฺชนฺติฯ วนฺทนฺติ นํ ปติฏฺฐิตนฺติ วุตฺตํ, วนฺทนียภาโว จ สีลสมฺปนฺนตายาติ อาห ‘‘ปติฏฺฐิตนฺติ สีเล ปติฏฺฐิต’’นฺติฯ อิธาติ อิมสฺมิํ โลเกฯ ขตฺติยาติ ลกฺขณวจนนฺติ อาห ‘‘น เกวลํ ขตฺติยาวา’’ติอาทิฯ

อรณสุตฺตวณฺณนา นิฏฺฐิตาฯ

เฉตฺวาวคฺควณฺณนา นิฏฺฐิตาฯ

สารตฺถปฺปกาสินิยา สํยุตฺตนิกาย-อฏฺฐกถาย

เทวตาสํยุตฺตวณฺณนาย ลีนตฺถปฺปกาสนา สมตฺตาฯ

2. เทวปุตฺตสํยุตฺตํ

1. ปฐมวคฺโค