เมนู

4. สํโยชนสุตฺตวณฺณนา

[64] กิํ สุ สํโยชโนติ สูติ นิปาตมตฺตนฺติ อาห ‘‘กิํ-สํโยชโน’’ติ? วิจรนฺติ เอเตหีติ วิจารณา, ปาทาฯ พหุวจเน หิ วตฺตพฺเพ เอกวจนํ กตํฯ ตสฺสาติ โลกสฺสฯ

สํโยชนสุตฺตวณฺณนา นิฏฺฐิตาฯ

5. พนฺธนสุตฺตวณฺณนา

[65] จตุตฺเถ อาคตอตฺโถ เอว อนนฺตเรปิ วุตฺโต, พฺยญฺชนเมว นานนฺติ อาห ‘‘ปญฺจเมปิ เอเสว นโย’’ติฯ

พนฺธนสุตฺตวณฺณนา นิฏฺฐิตาฯ

6. อตฺตหตสุตฺตวณฺณนา

[66] ‘‘เกนสฺสุพฺภาหโต’’ติ ปาโฐติ อธิปฺปาเยน ‘‘สุ-กาโร นิปาตมตฺต’’นฺติ อาห, ‘‘เกนสฺสพฺภาหโต’’ติ ปน ปาเฐ อุ-การโลเปน ปทสนฺธิฯ อิจฺฉาธูปายิโตติ อสมฺปตฺตวิสยิจฺฉาลกฺขณาย ตณฺหาย สนฺตาปิโต ทฑฺโฒฯ เตนาห ‘‘อิจฺฉาย อาทิตฺโต’’ติฯ

อตฺตหตสุตฺตวณฺณนา นิฏฺฐิตาฯ

7. อุฑฺฑิตสุตฺตวณฺณนา

[67] อุลฺลงฺฆิโตติ อุพฺพนฺธิตฺวา ลงฺฆิโตฯ สทฺทาทีสูติ สทฺทาทินาคทนฺเตสุ โสตาทีนิ อุฑฺฑิตานิ ตณฺหารชฺชุนา ทฬฺหพนฺธเนน พทฺธตฺตา ตทนติวตฺตนโตฯ โลโกติ อายตนโลโกฯ ตถา อตฺถโยชนาย กตตฺตา ขนฺธาทิโลกวเสนปิ โยชนา กาตพฺพาฯ น ทูรํ อนนฺตรภวกตฺตาฯ จุติจิตฺตอนฺตริตตฺตา เอกจิตฺตนฺตรภวสฺส กมฺมสฺส อพุชฺฌนํ, เอวํ สนฺเต กสฺมา สตฺตา น พุชฺฌนฺตีติ อาห ‘‘พลวติยา’’ติอาทิฯ

อุฑฺฑิตสุตฺตวณฺณนา นิฏฺฐิตาฯ

8. ปิหิตสุตฺตวณฺณนา

[68] ปญฺโหติ ญาตุํ อิจฺฉิโต อตฺโถฯ ปุจฺฉิโตติ สตฺตมสุตฺเต คาถาย ปุริมทฺธํ ปจฺฉิมทฺธํ, ปจฺฉิมํ ปุริมํ กตฺวา อฏฺฐมสุตฺเต เทวตาย ปุจฺฉิตตฺตา วุตฺตํ ‘‘เหฏฺฐุปริยายวเสน ปุจฺฉิโต’’ติฯ ปุจฺฉานุรูปํ วิสฺสชฺชนนฺติ อวุตฺตมฺปิ สิทฺธเมตนฺติ อนาหฏํฯ

ปิหิตสุตฺตวณฺณนา นิฏฺฐิตาฯ

9. อิจฺฉาสุตฺตวณฺณนา

[69] นวเม วินยายาติ วินเยนฯ กรณตฺเถ หิ อิทํ สมฺปทานวจนํฯ กิสฺสสฺสูติ กิสฺส, สุ-กาโร นิปาตมตฺตํฯ สพฺพํ ฉินฺทติ พนฺธนนฺติ สพฺพํ ทสวิธมฺปิ สํโยชนํ สมุจฺฉินฺทติฯ น หิ ตํ กิญฺจิ กิเลสพนฺธนํ อตฺถิ, ยํ อสมุจฺฉินฺนํ หุตฺวา ฐิตํ อสฺสา ตณฺหาย สมุจฺฉินฺนายฯ สฺวายมตฺโถ สุวิญฺเญยฺโยติ อาห ‘‘สพฺพํ อุตฺตานเมวา’’ติฯ

อิจฺฉาสุตฺตวณฺณนา นิฏฺฐิตาฯ