เมนู

ภูตวาราทิวณฺณนา

[3] ‘‘ปถวิํ มญฺญติ, ปถวิยา มญฺญตี’’ติอาทีหิ ปเทหิ ‘‘รูปํ อตฺตโต สมนุปสฺสติ, รูปสฺมิํ อตฺตานํ สมนุปสฺสตี’’ติอาทีนํ สกฺกายทิฏฺฐีนํ นิทฺธาริตตฺตา วุตฺตํ ‘‘เอวํ รูปมุเขน สงฺขารวตฺถุกํ มญฺญนํ วตฺวา’’ติ เตสุ สงฺขาเรสุ สตฺเตสุปีติ ตทุปาทาเนสุปิ สตฺเตสุ ธาตูสูติ ปถวีอาทีสุ จตูสุ ธาตูสุฯ ‘‘ชาตํ ภูตํ สงฺขต’’นฺติอาทีสุ (ที. นิ. 2.207; สํ. นิ. 5.379) ภูต-สทฺโท อุปฺปาเท ทิสฺสติ, สอุปสคฺโค ปน ‘‘ปภูตมริโย ปกโรติ ปุญฺญ’’นฺติอาทีสุ วิปุเล, ‘‘เยภุยฺเยน ภิกฺขูนํ ปริภูตรูโป’’ติอาทีสุ หิํสเน, ‘‘สมฺภูโต สาณวาสี’’ติอาทีสุ (จูฬว. 450) ปญฺญตฺติยํ, ‘‘อภิภูโต มาโร วิชิโต สงฺคาโม’’ติอาทีสุ วิมถเน, ‘‘ปราภูตรูโป โข อยํ อเจโล ปาถิกปุตฺโต’’ติอาทีสุ (ที. นิ. 3.23, 25, 31, 32) ปราชเย, ‘‘อนุภูตํ สุขทุกฺข’’นฺติอาทีสุ เวทิยเน, ‘‘วิภูตํ วิภาวิตํ ปญฺญายา’’ติอาทีสุ ปากฏีกรเณ ทิสฺสติฯ เต สพฺเพ รุกฺขาทีสูติฯ อาทิ-สทฺเทน สงฺคหิตาติ ทฏฺฐพฺพาฯ ‘‘กาโล ฆสติ ภูตานีติ (ชา. 1.2.190), ภูตา โลเก สมุสฺสย’’นฺติ (ที. นิ. 2.220; สํ. นิ. 1.186) จ อาทีสุ อวิเสเสน สตฺตวาจโกปิ ภูตสทฺโท, อุปริ เทวาทิปเทหิ สตฺตวิเสสานํ คหิตตฺตา อิธ ตทวสิฏฺฐา ภูตสทฺเทน คยฺหนฺตีติ อาห ‘‘โน จ โข อวิเสเสนา’’ติฯ เตเนวาห – ‘‘จาตุมหาราชิกานญฺหิ เหฏฺฐา สตฺตา อิธ ภูตาติ อธิปฺเปตา’’ติฯ โย หิ สตฺตนิกาโย ปริปุณฺณโยนิโก จตูหิปิ โยนีหิ นิพฺพตฺตนารโห, ตตฺถายํ ภูตสมญฺญา อณฺฑชาทิวเสน ภวนโตฯ

ภูเตติ วุตฺตเทสอาเทสิเต ภูเตฯ ภูตโต สญฺชานาตีติ อิมินา ‘‘ภูตา’’ติ โลกโวหารํ คเหตฺวา ยถา ตตฺถ ตณฺหาทิมญฺญนา สมฺภวนฺติ, เอวํ วิปรีตสญฺญาย สญฺชานนํ ปกาสียติฯ สฺวายมตฺโถ เหฏฺฐา ‘‘ปถวิโต สญฺชานาตี’’ติ เอตฺถ วุตฺตนยานุสาเรน สกฺกา ชานิตุนฺติ อาห ‘‘วุตฺตนยเมวา’’ติฯ ยถา สุทฺธาวาสา สพฺพทา อภาวโต อิมํ เทสนํ นารุฬฺหา, เอวํ เนรยิกาปิ สพฺพมญฺญนานธิฏฺฐานโตฯ เอเตเนว เอกจฺจเปตานมฺเปตฺถ อสงฺคโห ทฏฺฐพฺโพฯ อปเร ปน ‘‘ทิฏฺฐิมญฺญนาธิฏฺฐานโต เตสมฺเปตฺถ สงฺคโห อิจฺฉิโตเยวา’’ติ วทนฺติฯ ‘‘สมงฺคิภูตํ ปริจาเรนฺต’’นฺติอาทินา สุตฺเต วุตฺตนเยนรชฺชตีติ ‘‘สุภา สุขิตา’’ติ วิปลฺลาสคฺคาเหน ตตฺถ ราคํ ชเนติฯ เอวเมตฺถ รชฺชนฺโต จ น เกวลํ ทสฺสนวเสเนว, สวนาทิวเสนปิ รชฺชเตวาติ ทสฺเสนฺโต ‘‘ทิสฺวาปิ…เป.… อุตฺวาปี’’ติ อาหฯ

ตตฺถ ฆายนาทิวเสน รชฺชนํ เตหิ อนุภูตคนฺธมาลาทิวเสน เจว วิสภาควตฺถุภูตานํ เตสํ ปริโภควเสน จ ยถานุภวํ อนุสฺสรณวเสน จ เวทิตพฺพํฯ เอวํ ภูเต ตณฺหามญฺญนาย มญฺญตีติ วุตฺตนเยน ภูเต ปฏิจฺจ ฉนฺทราคํ ชเนนฺโต เตสํ ปฏิปตฺติํ อสฺสาเทนฺโต อภินนฺทนฺโต อภิวทนฺโต อชฺโฌสาย ติฏฺฐนฺโต ‘‘อีทิสี อวตฺถา มม อนาคตมทฺธานํ สิยา’’ติอาทินา วา ปน นเยน ตตฺถ นนฺทิํ สมนฺนาเนนฺโต ภูเต ตณฺหามญฺญนาย มญฺญตีติ อตฺโถฯ อปฺปฏิลทฺธสฺส ขตฺติยมหาสาลาทิภาวสฺส, สมฺปตฺติํ วิปตฺตินฺติ ชาติวเสน อุกฺกฏฺฏนิหีนตํฯ ทหตีติ ฐเปติฯ โย เอวรูโป มาโนติ โย เอโส ‘‘อยํ ปุพฺเพ มยา สทิโส, อิทานิ อยํ เสฏฺโฐ อยํ หีนตโร’’ติ อุปฺปนฺโน มาโนฯ อยํ วุจฺจติ มานาติมาโนติ อยํ ภาราติภาโร วิย ปุริมํ สทิสมานํ อุปาทาย มานาติมาโน นามาติ อตฺโถฯ

นิจฺจาติอาทีสุ อุปฺปาทาภาวโต นิจฺจา, มรณาภาวโต ธุวา, สพฺพทา ภาวโต สสฺสตาฯ อนิจฺจปฏิปกฺขโต วา นิจฺจา, ถิรภาวโต ธุวา, สสฺสติสมตาย สสฺสตา, ชราทิวเสน วิปริณามสฺส อภาวโต อวิปริณามธมฺมาติ มญฺญติฯ สพฺเพ สตฺตาติ โอฏฺฐโคณคทฺรภาทโย อนวเสสา สญฺชนฏฺเฐน สตฺตาฯ สพฺเพ ปาณาติ ‘‘เอกินฺทฺริโย ปาโณ ทฺวินฺทฺริโย ปาโณ’’ติอาทิวเสน วุตฺตา อนวเสสา ปาณนฏฺเฐน ปาณาฯ สพฺเพ ภูตาติ อนวเสสา อณฺฑโกสาทีสุ ภูตา สญฺชาตาติ ภูตาฯ สพฺเพ ชีวาติ สาลิยวโคธูมาทโย อนวเสสา ชีวนฏฺเฐน ชีวาฯ เตสุ หิ โส วิรูหภาเวน ชีวสญฺญีฯ อวสา อพลา อวีริยาติ เตสํ อตฺตโน วโส วา พลํ วา วีริยํ วา นตฺถีติ ทสฺเสติฯ นิยติสงฺคติภาวปริณตาติ เอตฺถ นิยตีติฯ นิยตตา, อจฺเฉชฺชสุตฺตาวุตอเภชฺชมณิ วิย อวิชหิตปกติตาฯ สงฺคตีติ ฉนฺนํ อภิชาตีนํ ตตฺถ สงฺคโมฯ ภาโวติ สภาโวเยว, กณฺฑกานํ ติขิณตา, กปิฏฺฐผลาทีนํ ปริมณฺฑลาทิตา, มิคปกฺขีนํ วิจิตฺตวณฺณาทิตาติ เอวมาทิโกฯ เอวํ นิยติยา จ สงฺคติยา จ ภาเว จ ปริณตา นานปฺปการตํ ปตฺตาฯ เยน หิ ยถา ภวิตพฺพํ, โส ตเถว ภวติฯ เยน น ภวิตพฺพํ, โส น ภวตีติ ทสฺเสติฯ ฉสฺเววาภิชาตีสูติ กณฺหาภิชาติอาทีสุ ฉสุ เอว อภิชาตีสุ ฐตฺวา สุขญฺจ ทุกฺขญฺจ ปฏิสํเวเทนฺติ, อญฺญา สุขทุกฺขภูมิ นตฺถีติ ทสฺเสติฯ วา-สทฺเทน อนฺตาทิเภเท ทิฏฺฐาภินิเวเส สงฺคณฺหาติฯ

อุปปตฺตินฺติ อิมินา ตสฺมิํ ตสฺมิํ สตฺตนิกาเย ภูตานํ สหพฺยตํ อากงฺขตีติ ทสฺเสติฯ สุขุปฺปตฺตินฺติ อิมินา ปน ตตฺถ ตตฺถ อุปฺปนฺนสฺส สุขุปฺปตฺติํฯ เอกจฺเจ ภูเต นิจฺจาติอาทินา เอกจฺจสสฺสติกทิฏฺฐิํ ทสฺเสติฯ อหมฺปิ ภูเตสุ อญฺญตโรสฺมีติ อิมินา ปน จตุตฺถํ เอกจฺจสสฺสติกวาทํ ทสฺเสติฯ

ยโต กุโตจีติ อิสฺสรปุริสาทิเภทโต ยโต กุโตจิฯ เอกา ตณฺหามญฺญนาว ลพฺภตีติ อิธาปิ เหฏฺฐา วุตฺตนเยน อิตรมญฺญนานมฺปิ สมฺภโว นิทฺธาเรตพฺโพฯ วุตฺตปฺปกาเรเยว ภูเต ตณฺหาทิฏฺฐีหิ อภินนฺทตีติอาทินา วตฺตพฺพตฺตา อาห ‘‘วุตฺตนยเมวา’’ติฯ โยชนา กาตพฺพาติ ‘‘โย ภูตปญฺญตฺติยา อุปาทานภูเต ขนฺเธ ปริชานาติ, โส ตีหิ ปริญฺญาหิ ปริชานาตี’’ติอาทินา โยชนา กาตพฺพาฯ อปเร ปเนตฺถ ภูตคาโมปิ ภูต-สทฺเทน สงฺคหิโตติ รุกฺขาทิวเสนปิ มญฺญนาวิภาคํ โยเชตฺวา ทสฺเสนฺติ, ตถา มหาภูตวเสนปิ, ตํ อฏฺฐกถายํ นตฺถิฯ

ภูมิวิเสสาทินา เภเทนาติ ภูมิวิเสสอุปปตฺติวิเสสาทิวิภาเคนฯ อิทฺธิยาติ ปุญฺญวิเสสนิพฺพตฺเตน อานุภาเวนฯ กิญฺจาปิ เทว-สทฺโท ‘‘วิทฺเธ วิคตวลาหเก เทเว’’ติอาทีสุ (สํ. นิ. 1.110; 3.102; 5.146-148; ม. นิ. 1.486; อ. นิ. 10.15; อิติวุ. 27) อชฏากาเส อาคโต, ‘‘เทโว จ โถกํ โถกํ ผุสายตี’’ติอาทีสุ เมเฆ, ‘‘อยญฺหิ เทว กุมาโร’’ติอาทีสุ (ที. นิ. 2.34, 35, 36) ขตฺติเย อาคโต, ‘‘ปญฺจหิ กามคุเณหิ สมปฺปิโต สมงฺคิภูโต ปริจาเรติ เทโว มญฺเญ’’ติอาทีสุ (ที. นิ. 1.183; ม. นิ. 2.211) วิย อิธ อุปปตฺติเทเวสุ อาคโต, เทว-สทฺเทน ปน วตฺตพฺพสตฺเต อนวเสสโต อุทฺธริตฺวา ตโต อิธาธิปฺเปเต ทสฺเสตุํ ‘‘เต ติวิธา’’ติอาทิ วุตฺตํฯ เสสา ฉ กามาวจรา อิธ เทวาติ อธิปฺเปตา อิตเรสํ ปทนฺตเรหิ นิวตฺติตตฺตาติ อธิปฺปาโยฯ ภูตา เทวาติ คหิเตสุ สตฺเตสุ ตณฺหาทิมญฺญนานํ ปวตฺตากาเรนปิ ติวิธลกฺขณนฺติ อาห ‘‘ภูตวาเร วุตฺตนเยน เวทิตพฺพา’’ติฯ

‘‘อญฺญตรสฺส อุปาสกสฺส ปชาปติ อภิรูปา โหตี’’ติอาทีสุ (ปารา. 168) ปชาปติ-สทฺโท ฆรณิยํ อาคโต, ‘‘ปชาปติ กามทายี สุวณฺณวณฺณา เม ปชา โหตู’’ติอาทีสุ ทิฏฺฐิคติกปริกปฺปิเต, ‘‘ปชาปติสฺส เทวราชสฺส ธชคฺคํ อุลฺโลเกยฺยาถา’’ติอาทีสุ (สํ. นิ. 1.249) เทวเชฏฺฐเก, อิธ ปน อธิปตีติ วทนฺติ, ตํ อุปริ พฺรหฺมุโน คยฺหมานตฺตา เตสํ มติมตฺตํฯ เทวานนฺติ จาตุมหาราชิกาทิเทวานํฯ มหาราชาทีนนฺติ อาทิ-สทฺเทน สกฺกสุยามสนฺตุสฺสิตสุนิมฺมิตวสวตฺติโน คหิตาฯ เตสนฺติ มหาราชาทีนํฯ สตฺตสงฺขาตายาติ กามภูมิยํ สตฺตสงฺขาตายฯ ปชาปตินฺติ ปชาปติภาวํฯ ปชาปติภาเวน หิ มานํ ชปฺเปนฺโต ปชาปติํ มานมญฺญนาย มญฺญตีติ วุตฺโตฯ

เอกา ทิฏฺฐิมญฺญนาว ยุชฺชตีติ วุตฺตํ, ปชาปติโน ปน สมิปตํ สโลกตํ วา อากงฺขโต, ตถาภาวาย จิตฺตํ ปณิทหโต, ตถาลทฺธพฺพาย สมฺปตฺติยา อตฺตโน เสยฺยาทิภาวํ ทหโต จ ตณฺหามานมญฺญนาปิ สมฺภวนฺตีติ สกฺกา วิญฺญาตุํฯ เย จ ธมฺมาติ อายุวณฺณาทิเก วทติฯ ปชาปตินฺติ เอตฺถาปิ เหฏฺฐา วุตฺตนเยน อิตรมญฺญนานมฺปิ สมฺภโว เวทิตพฺโพฯ

พฺรูหิโตติ ปริวุทฺโธฯ คุณวิเสเสหีติ ฌานาทีหิ วิสิฏฺเฐหิ คุเณหิ อุตฺตริมนุสฺสธมฺมตายฯ พฺรหฺม-สทฺทสฺส สติปิ อวิเสสโต วิสิฏฺฐวาจกตฺเต ยตฺถ ยตฺถ ปนสฺส คุณวิเสสยุตฺตาทิรูปา ปวตฺติ, ตํ ทสฺเสตุํ ‘‘อปิจา’’ติอาทิ วุตฺตํฯ สหสฺโสติ สหสฺสิยา โลกธาตุยา อธิปติภูโตฯ ปฐมาภินิพฺพตฺโตติ ปณีเตน ปฐมฌาเนน นิพฺพตฺโต, ปฐมชฺฌานภูมิยํ วา ปฐมํ อภินิพฺพตฺโตฯ คหิตาติ เวทิตพฺพา ปธานคฺคหเณน อปฺปธานานมฺปิ เกนจิ สมฺพนฺเธน คหิตภาวสิทฺธิโตฯ เอตฺถ จ พฺรหฺมาติ มหาพฺรหฺมา อธิปฺเปโตฯ โส หิ วณฺณวนฺตตาย เจว ทีฆายุกตาย จ พฺรหฺมปาริสชฺชาทีหิ มหนฺโต พฺรหฺมาติ มหาพฺรหฺมา, ตสฺส ปน ปุโรหิตฏฺฐาเน ฐิตาติ พฺรหฺมปุโรหิตา, ปริสายํ ภวา ปริจารกาติ พฺรหฺมปาริสชฺชาติ เวทิตพฺพาฯ อุกฺกฏฺเฐกปุคฺคลภาวโต ปชาปติสฺมิํ วิย พฺรหฺมนิ มญฺญนา วตฺตตีติ วุตฺตํ ‘‘ปชาปติวาเร วุตฺตนเยเนว เวทิตพฺพา’’ติฯ ตถา หิ พหุปุคฺคลภาวสามญฺญโต อาภสฺสรวาราทีนํ ภูตวารสทิสตา วุตฺตาฯ

ยถาวุตฺตปภาย อาภาสนสีลา วา อาภสฺสราฯ

เอกตลวาสิโนติ อิทํ ฌานนฺตรภูมีนํ วิย เหฏฺฐุปริภาวาภาวโต วุตฺตํ, ฐานานิ ปน เนสํ ปริจฺฉินฺนาเนวฯ อาภสฺสเรหิ ปริตฺตา อาภา เอเตสนฺติ ปริตฺตาภาฯ อปฺปมาณา อาภา เอเตสนฺติ อปฺปมาณาภาฯ

สุภาติ โสภนา ปภาฯ กญฺจนปิณฺโฑ วิย สสฺสิริกา กญฺจนปิณฺฑสสฺสิริกาฯ ตตฺถ โสภนาย ปภาย กิณฺณา สุภากิณฺณาติ วตฺตพฺเพ ภา-สทฺทสฺส รสฺสตฺตํ, อนฺติม-ณ-การสฺส ห-การญฺจ กตฺวา ‘‘สุภกิณฺหา’’ติ วุตฺตาฯ สุภาติ จ เอกคฺฆนา นิจฺจลา ปภา วุจฺจติ, ปริตฺตา สุภา เอเตสนฺติ ปริตฺตสุภาฯ อปฺปมาณา สุภา เอเตสนฺติ อปฺปมาณสุภา

วิปุลผลาติ วิปุลสนฺตสุขายุวณฺณาทิผลาฯ

สติปิ เทวพฺรหฺมาทีนํ ปุญฺญผเลน ฌานผเลน จ ปฏิปกฺขาภิภเว เยสํ ปน ปุถุชฺชนอสญฺญสตฺเตสุ อภิภูโวหาโร ปากโฏ นิรุฬฺโห จ, เตสํ วเสนายํ เทสนา ปวตฺตาติ ทสฺเสนฺโต อาห ‘‘อสญฺญภวสฺเสตํ อธิวจน’’นฺติฯ ยถา ปชาปติวาเร ‘‘อิเธกจฺโจ ปชาปติสฺมิํเยวา’’ติอาทินา มญฺญนาปวตฺติ ทสฺสิตา, ตถา อิธาปิ ตํ ทสฺเสตุํ สกฺกาติ อาห ‘‘เสสํ ปชาปติวาเร วุตฺตนยเมวา’’ติฯ

ภูตวาราทิวณฺณนา นิฏฺฐิตาฯ

อากาสานญฺจายตนวาราทิวณฺณนา

[4] เอวํ สตฺตวเสน ภูมิกฺกมทสฺสเน สุทฺธาวาสานํ อคฺคหเณ การณํ นิทฺธาเรนฺโต ‘‘เอวํ ภควา’’ติอาทิมาหฯ ตตฺถ อนาคามิขีณาสวาติ อนาคามิโน จ ขีณาสวา จฯ กิญฺจาปิ สุทฺธาวาสา อตฺเถว อเนกกปฺปสหสฺสายุกา, อุกฺกํสปริจฺเฉทโต ปน โสฬสกปฺปสหสฺสายุกาว, น ตโต ปรนฺติ อาห ‘‘กติปยกปฺปสหสฺสายุกา’’ติฯ กามรูปภเวสุ ปวตฺตมานาปิ อากาสานญฺจายตนาทิธมฺมา อรูปาวจรภาวโต ตํภูมิกโวหารํ น ลภนฺตีติ ‘‘ตตฺรูปปนฺนาเยวา’’ติ อวธาเรตฺวา วุตฺตํฯ อภิภูวาเร วุตฺตนเยน เวทิตพฺพา ยถารหนฺติ อธิปฺปาโยฯ น เหตฺถ วณฺณวนฺตตาทิ สมฺภวตีติฯ ปชาปติวาเร วุตฺตนเยนาติ เอตฺถ ‘‘อหมสฺมิ อรูโป ปหีนรูปปฏิฆสญฺโญ’’ติอาทินา มานมญฺญนา เวทิตพฺพาฯ

อากาสานญฺจายตนวาราทิวณฺณนา นิฏฺฐิตาฯ

ทิฏฺฐสุตวาราทิวณฺณนา

[5] รูปมุเขน มญฺญนาวตฺถุทสฺสนํ สงฺเขโปติ กตฺวา วุตฺตํ ‘‘วิตฺถารโตปี’’ติฯ ตมฺปิ หิ ‘‘ยตฺถ เนว ปถวี, น อาโป, น เตโช, น วาโย, น อากาสานญฺจายตน’’นฺติอาทิคฺคหณํ วิย สงฺเขปโต ปญฺจโวการภวทสฺสนํ โหตีติฯ

ทิฏฺฐนฺติ ยํ จกฺขุทฺวาเรน กตทสฺสนกิริยาสมาปนํ, ยญฺจ จกฺขุ ทฺวยํ ปสฺสติ ปสฺสิสฺสติ สติ สมฺภเว ปสฺเสยฺย, ตํ สพฺพกาลนฺติ วิเสสวจนิจฺฉาย อภาวโต ทิฏฺฐนฺเตว วุตฺตํ ยถา ‘‘ทุทฺธ’’นฺติฯ เตนาห ‘‘รูปายตนสฺเสตํ อธิวจน’’นฺติฯ อยญฺจ นโย สุตาทีสุปิ โยเชตพฺโพฯ สตฺตาติ รูปาทีสุ สตฺตา วิสตฺตาติ สตฺตาฯ สญฺชนฏฺเฐน สามญฺญสทฺโทปิ เจส สตฺต-สทฺโท ‘‘อิตฺถิรูเป’’ติ วิสยวิเสสิตตฺตา อิธ ปุริสวาจโก ทฏฺฐพฺโพฯ รตฺตาติ วตฺถํ วิย รงฺคชาเตน จิตฺตสฺส วิปริณามการเกน ฉนฺทราเคน รตฺตา สารตฺตาฯ คิทฺธาติ อภิกงฺขนสภาเวน อภิคิชฺฌเนน คิทฺธา เคธํ อาปนฺนาฯ คธิตาติ คนฺถิตา วิย โลเภน ทุมฺโมจนียภาเวน อารมฺมเณ ปฏิพทฺธาฯ มุจฺฉิตาติ กิเลสวเสน วิสญฺญีภูตา วิย อนญฺญกิจฺจา มุจฺฉํ โมหํ อาปนฺนาฯ อชฺโฌสนฺนาติ วิสเย อญฺญสาธารเณ วิย กตฺวา คิลิตฺวา ปรินิฏฺฐาเปตฺวา วิย ฐิตาฯ อิมินาติ สุวณฺณวณฺณาทิอากาเรนฯ มงฺคลํ อมงฺคลนฺติ อีทิสํ ทิฏฺฐํ มงฺคลํ, อีทิสํ อมงฺคลนฺติ รูปสฺมิํ อตฺตานํ สมนุปสฺสนนเยนาติ อิทํ เวทนาทิอรูปธมฺเม, รูปายตนวินิมุตฺตสพฺพธมฺเม วา อตฺตโต คเหตฺวา ตโต อชฺฌตฺติกํ, พาหิรํ วา รูปายตนํ ตสฺโสกาสภาเวน ปริกปฺเปตฺวา ‘‘โส โข ปน เม อยํ อตฺตา อิมสฺมิํ รูปายตเน’’ติ มญฺญนฺโต ทิฏฺฐสฺมิํ มญฺญตีติ อิมํ นยํ สนฺธาย วุตฺตํฯ